កសិករដាំចន្ទីនៅភ្នំគូលែន ចង់ចងក្រងជាសហគមន៍កសិកម្មទំនើប

ប្រជាកសិករដាំស្វាយចន្ទីប្រមាណជាង ១០០ គ្រួសារ នៅឃុំខ្នងភ្នំ ស្រុកខ្នងភ្នំ លើភ្នំគូលែន​ ខេត្តសៀមរាប ចាប់អារម្មណ៍​ចង់​ច​ង​​ក្រងគ្នា​ជា​សហគមន៍កសិកម្មទំនើប។

ឃុំខ្នងភ្នំនៃភ្នំគូលែន មានអ្នកដាំស្វាយចន្ទីប្រមាណ៨០០គ្រួសារ នៅលើផ្ទៃដី​ជាង​៣០០០ហិកតា ប៉ុន្តែភាគច្រើនមានទិន្នផលទាប ពូជប្រពៃណី ដាំខុសស្តង់ដាបច្ចេកទេស និង​ជាប្រភេទកសិកម្មយថាផល។

លោក ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ មានប្រសាសន៍ថា នៅទីនេះមានទាំង​បញ្ហាប្រឈម និងមានទាំងឱកាស ជាពិសេសសក្តានុពលពាក់ព័ន្ធ​នឹងវិស័យ​ទេសចរណ៍ ដែលអាចអនុញ្ញាតឱ្យបងប្អូនកសិករយើង​អាច«កែច្នៃរួចនាំចេញ​នៅនឹងកន្លែង»។

លោក ឃឹម ហ្វីណង់ បន្ថែមថា៖ «​វាមានសក្ដានុពលក្នុងការចងក្រងពួកគាត់ឱ្យទៅជា​សហគមន៍​កសិកម្មទំនើប ហើយធ្វើយ៉ាងណា ដើម្បីឱ្យពួកគាត់ទទួលបានប្រាក់ចំណេញ​ពីសក្ដានុពលដែល​ពួកគាត់មាន»។

អ្នកស្រី នាង ណេត កសិករដាំស្វាយចន្ទីភូមិអន្លង់ធំ ស្រុកស្វាយលើ ខេត្តសៀមរាបប្រាប់ថា ខ្លួននឹងចូលសហគមន៍កសិកម្មទំនើប ដោយសារកន្លងមកទិន្នផលដាំដុះរបស់នាងមិន​ទទួលបាន​ទិន្នផលច្រើន។

លោក តូច យន់ មេភូមិខ្លាឃ្មុំ ស្រុកខ្នងភ្នំ ខេត្តសៀមរាបថ្លែងថា៖ «ពីដើម​មកយើងធ្លាប់ធ្វើចម្ការចន្ទីលក្ខណៈប្រពៃណី ពេលឯកឧត្តមមកគាត់ចង់បង្កើត​សហគមន៍​កសិកម្ម​ទំនើប ខ្ញុំចង់ចូលរួមដោយសារតែយើងអាចប្រើប្រាស់ថ្នាំ ជី ក្នុងសហគមន៍​បានដើម្បីបង្កើន​ទិន្ន​ផល​យើង»។

យោងតាមសមាគមស្វាយចន្ទីកម្ពុជា នៅឆ្នាំ ២០២៤ កម្ពុជា​សម្រេច​​បានការ​ប្រមូលទិន្នផលគ្រាប់​ស្វាយចន្ទីចំនួន ៨៥ ម៉ឺនតោន ក្នុង​នោះ​នាំចេញ​គ្រាប់ឆៅ​បាន​ចំនួន ៨១ ម៉ឺន ៥ ពាន់តោន កើន​ឡើង ២១% គិត​ជា​ទឹក​ប្រាក់​​ ១,១៥០ ពាន់​លាន​ដុល្លារ កើន ២៦,១៥%។ ក្នុងនោះ​នាំចេញ​ទៅវៀត​ណាមចំនួន ៧៩ ម៉ឺន ៥ ពាន់​តោន។

យោងតាមក្រសួងកសិកម្ម រុក្ខាប្រមាញ់ និងនេសាទ កម្ពុជាមានផ្ទៃដីប្រមូលផលស្វាយចន្ទី​សរុប​ចំនួនជាង ៥៨ ម៉ឺនហិកតា (៥៨០ ១១៧) ក្នុងនោះ​ខេត្ត​ចំនួន ១០ របស់កម្ពុជា មានផ្ទៃដី​ដាំដុះ​ស្វាយ​​​​​ចន្ទីច្រើនជាងគេរួមាន ខេត្តកំពង់ធំជិត ១៥ ម៉ឺន​ហិកតា (១៤៧ ៧០៣) ខេត្តក្រចេះជាង ១០ ម៉ឺនហិកតា (១០២ ៥២០) រតនគិរី ៩៧ ២៥៨ ហិកតា កំពង់ចាម ៤៦ ៥៨២ ហិកតា ស្ទឹងត្រែង ៤៤ ២៥០ ហិកតា ខេត្ត​ត្បូងឃ្មុំ ៣៦ ៤០៣ ហិកតា ខេត្តសៀមរាប ៣៥ ៩១៤ ហិកតា ខេត្តព្រះវិហារ ២៨ ៩៦៥ ហិកតា ឧត្តរមានជ័យ ១៣ ៨១៨ ហិកតា និងមណ្ឌលគិរី ៩ ៨៥៨ ហិកតា៕

អត្ថបទ៖ ឡេង ដេត