សមាគមអតីតយុទ្ធជនកម្ពុជា នឹងរៀបចំសន្និបាតវិសាមញ្ញចុងខែនេះក្រោមអធិបតីភាពសម្តេចតេជោ

សមាគមអតីតយុទ្ធជនកម្ពុជា (C.V.A) នឹងរៀបចំសន្និបាតវិសាមញ្ញទូទាំងប្រទេសតំណាងសមាគមអតីតយុទ្ធជកម្ពុជា នៅថ្ងៃទី ២៦ ខែកក្កដា ឆ្នាំ ២០២៥ ខាងមុខនេះ ក្រោមអធិបតិភាពដ៏ខ្ពង់ខ្ពស់សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា និងជាប្រធានសមាគមអតីតយុទ្ធជនកម្ពុជា។

មុនមហាសន្និបាតមកដល់ លោក គន់ គីម ទេសរដ្ឋមន្រ្តី អនុប្រធាន និងជាអគ្គលេខាធិការសមាគមអតីតយុទ្ធជនកម្ពុជា កាលពីថ្ងៃទី១០ ខែកក្កដា ឆ្នាំ២០២៥ បានអញ្ជើញដឹកនាំកិច្ចប្រជុំពិភាក្សាការងារ ក៏ដូចជារៀបចំផែនការឱ្យប្រព្រឹត្តទៅដោយរលូន។ កិច្ចប្រជុំនេះ មានការចូលរួមពី រដ្ឋមន្រ្តីប្រតិភូអមនាយករដ្ឋមន្រ្តី, តំណាងក្រសួងការពារជាតិ, ក្រសួងមហាផ្ទៃ, ក្រសួងយុត្តិធម៌, ក្រសួងមុខងារសាធារណៈ, អគ្គបញ្ជាការនៃកងយោធពលខេមរភូមិន្ទ, អគ្គលេខាធិការរង សមាជិកគណៈអចិន្រ្តៃយ៍, និងប្រធានគណៈជំនាញ សមាគមអតីតយុទ្ធជនកម្ពុជា។

នាឱកាសនោះ លោក គន់ គីម បានវាយតម្លៃខ្ពស់ចំពោះការចូលរួមផ្តល់ជាយោបល់ពីបណ្តាថ្នាក់ដឹកនាំក្រសួង-ស្ថាប័ន ផ្តល់ធាតុចូលសំខាន់ៗ ក្នុងការធ្វើវិសោធនកម្មលក្ខន្តិកៈថ្មីរបស់សមាគម ដើម្បីឱ្យសមាជិកជាអតីតយុទ្ធជន និងនិវត្តជនទាំងអស់ ទទួលបានការយកចិត្តទុកដាក់ និងទទួលបានឧត្តមប្រយោជន៍កាន់តែល្អប្រសើរ ស្របតាមអនុសាសន៍របស់សម្តេច តេជោ ហ៊ុន សែន ក្នុងការរួមបញ្ចូលទាំង អតីតយុទ្ធជន មន្ត្រីរាជការ គ្រូបង្រៀន និងកងកម្លាំងប្រដាប់អាវុធគ្រប់ប្រភេទដែលចូលនិវត្តន៍ ។

យោងតាមការចុះជួបសំណេះសំណាលជាមួយនិវត្តជនតាមបណ្តាខេត្តកន្លងទៅ គឺនិវត្តជនបានសម្តែងការគាំទ្រ និងពេញចិត្តជាទីបំផុតចំពោះការរៀបចំបញ្ចូលនិវត្តជន ឱ្យមកជ្រកក្រោមឆ័ត្រតែមួយរបស់សមាគមអតីតតយុទ្ធជន និងនិវត្តជនកម្ពុជា។ ជាការកត់សម្គាល់ រដ្ឋមន្រ្តី ថ្នាក់ដឹកនាំតាមស្ថាប័ន ក៏ដូចជាសប្បុរជន បានចូលរួមឧបត្ថម្ភជាថវិកាទៅតាមលទ្ធភាព ដើម្បីរៀបចំសន្និបាតវិសាមញ្ញទូទាំងប្រទេសនេះ។

សូមជម្រាបថា ការធ្វើវិសោធនកម្មលក្ខន្តិកៈសមាគមអតីតយុទ្ធជនកម្ពុជា ទៅជាសមាគមអតីតយុទ្ធជន និងនិវត្តជនកម្ពុជា (អ.ន.ក) បានកែសម្រួលមកនូវត្រឹម ១៦ជំពូក និង ៤៤ប្រការ ហើយលក្ខន្តិកៈថ្មីនេះនឹងត្រូវសម្រេចអនុម័តដោយមហាសន្និបាតវិសាមញ្ញតំណាង អ.ន.ក នៅទូទាំងប្រទេស នាថ្ងៃទី២៦ ខែកក្កដា ឆ្នាំ២០២៥ ខាងមុខ ក្រោមអធិបតីភាពដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន ប្រធានសមាគម៕