អាជ្ញាធរខេត្ត​​ បន្ថែមម៉ាស៊ីនបូមទឹក​ សង្គ្រោះ​ស្រូវ​ប្រាំង​ជាង ១០០០ ហិកតា​នៅស្រុកព្រះនេត្រព្រះ

រដូវប្រាំងឆ្នាំនេះ រដ្ឋបាលខេត្តបន្ទាយមានជ័យ កំពុង​ស្វះស្វែង​រក​ប្រភព​ទឹក​មកស្រោចស្រពដំណាំស្រូវប្រាំង​ជាង ១,០០០ ហិកតា ដល់​កសិករនៅឃុំរហាល ស្រុកព្រះនេត្រព្រះ បាន​មកពីអាងត្រពាំងថ្ម។

លោក អ៊ុំ រាត្រី អភិបាលខេត្តបន្ទាយមានជ័យ កាលពី​ថ្ងៃទី២៥ ខែកុម្ភះ ឆ្នាំ២០២១ បាន​ដឹកនាំ​ប្រធានមន្ទីរធនធានទឹកនិងឧត្តុនិយម លោក ឃូ ពៅ អភិបាលស្រុកព្រះនេត្រព្រះ និងមន្ត្រីជំនាញជាច្រើននាក់ផ្សេងទៀត ចុះ​មក​ពិនិត្យ​ដើម្បីដោះស្រាយបញ្ហាខ្វះខាតទឹកនៅក្នុងឃុំរហាល ស្រុកព្រះនេត្រព្រះ។

បើ​តាមអភិបាល​ខេត្ត ដំណោះស្រាយបន្ទាន់ គឺបន្ថែមម៉ាស៊ីនបូមទឹករបស់មន្ទីរធនធានទឹក១គ្រឿង ពន្លឿនការបូមទឹកពីប្រឡាយមេ និងបើកទ្វារទឹកស្ពានទី២ បង្ហូរទឹក២បន្ថែមទៀតពីអាងត្រពាំងថ្ម ស្រុកភ្នំស្រុក។ នៅក្នុងរយៈពេល១ថ្ងៃទៅ២ថ្ងៃ នឹងមានម៉ាស៊ីនបូមទឹកមកបន្ថែមទៀតដើម្បីសង្គ្រោះឲ្យបានទាន់ពេលវេលា។

លោកអភិបាល​ខេត្ត ក៏​ស្នើ​ឲ្យកសិករចេះសន្សំសំចៃទឹក និង​បន្តកិច្ចសហការសាមគ្គីគ្នាចេះចែករំលែកទឹកសម្រាប់ប្រើប្រាស់នៅក្នុងរដូវប្រាំងឆ្នាំនេះ។

អត្ថបទ៖ វ៉ាន់ ណាង