បេនឡានចាស់ និងថ្មីត្រូវបានក្រុមហ៊ុន ឈឿន ចាន់ថនប្រគល់ឲ្យរដ្ឋបាលខេត្តកាន់កាប់វិញ

គេឃើញមានក្រុម និងមន្ត្រីសាលាខេត្តលោក ស្រេង សុផល អភិបាលក្រុងសិរីសោភ័ណ បានចុះរុះរើជញ្ជាំងបេនឡានថ្មី ស្ថិតក្នុងភូមិ៣ សង្កាត់ព្រះពន្លាក្រុងសិរីសោភ័ណ ខេត្តបន្ទាយមានជ័យ ដែលលោក ឈឿន ចាន់ថន ប្រធានក្រុមហ៊ុន ឈឿន ចាន់ថន អាហ័រណ នីអាហ័រណ និងសំណង់ ហ៊ុមព័ទ្ធយកធ្វើកម្មសិទ្ធទុកសំរាប់យកទៅអភិវឌ្ឍបន្ត។

កាលពីថ្ងៃទី ២៥ ខែសីហា រដ្ឋបាលខេត្តបានប្រកាសឱ្យអ្នកប្រកបអាជីវកម្មដឹកអ្នកដំណើរ និងភ្ញៀវទេសចរណ៍គ្រប់ប្រភេទនៅចំណតរថយន្តចាស់ ថ្មី រុះរើចេញដើម្បីយកទីតាំងទាំង២នេះទៅ អភិវឌ្ឍន៍ផ្សេងៗបន្ត។

ក្រោយមកនៅថ្ងៃទី៨ ខែកញ្ញា ឆ្នាំ២០២៣ ក្រុមហ៊ុន ឈឿន ចាន់ថនបានឲ្យអាជីវករ រុះរើចេញជាបន្ទាន់ ក្នុងករណីម្ចាស់រថយន្ត អាជីករនៅតែរឹងរូស មិនអនុវត្ត បង្កបញ្ហារដ្ឋបាលខេត្តនឹងចាត់វិធានការតាមផ្លូវច្បាប់។

ប៉ុន្តែបន្ទាប់មក អាជីវករ អ្នករត់តាក់សុី និងប្រជាពលរដ្ឋរស់នៅជុំវិញបេនឡានក្រុងសិរីសោភ័ណជាង២០០នាក់បានផ្តិតមេដៃសុំអន្តរាគមន៍ពីថ្នាក់លើជួយអន្តរាគមន៍ដើម្បីឲ្យឈ្មួញកុំផ្តាច់របរឬដង្ហើមរស់របស់ពួកគេនិងក៏បញ្ឈប់ការបណ្តេញពួកខ្លួនឈប់ឲ្យលក់ដូរ ប្រកបរបរនិងត្រូវរុះរើតូបពួកគាត់នៅតែគ្មានប្រសិទ្ធភាពដដែល។

ទើបលោក ឈឿន ចាន់ថន ឲ្យក្រុមជាងដឹកសម្ភារៈមកហ៊ុមព័ទ្ធបេនឡានថ្មីទាំងតក់ហល់ក្នុងរយៈពេល២ថ្ងៃហ៊ុមជិតអស់ហើយដេញអាជីវករឲ្យចូលមកលក់បណ្តោះអាសន្ននៅបេនឡានថ្មីសិន ទំរាំបេនឡានថ្មីមួយទៀតធ្វើរួចហើយត្រៀម​យក​បេនឡានចាស់ទៅអភិវឌ្ឍអ្វីផ្សេងៗ។

ស្រាប់តែថ្មីៗនេះបែកធ្លាយសារសំឡេងសម្ដេចតេជោ ហ៊ុន សែន អតីតនាយករដ្ឋមន្ត្រីនៅថ្ងៃទី ២៧ ខែកុម្ភៈ ឆ្នាំ ២០១៧ សម្តេចបានធ្វើការហាមដាច់ខាត រាល់សមសមិទ្ធិផលណាដែលមានស្រាប់ក្នុងខេត្ត ក្រុង នានា ដូចជាចំណតរថយន្តនៅសល់តាំងពីជំនាន់ប៉ារាំង សួនច្បារ ពិសេសសម្បត្តិរបស់រដ្ឋមិនឲ្យដោះដូរយកទៅដាក់កន្លែងផ្សេងជាដាច់ខាត បើលោកឧញ៉ាក្រុមហ៊ុនណាចង់វិនិយោគធ្វើអីមួយទិញដីកន្លែងផ្សេងធ្វើខ្លួនឯងទៅកុំចង់យករបស់មានស្រាប់យកទៅវិនិយោគហាមដាច់ខាត ពិសេសសម្តេច លើកយកពីរឿងបេនឡានចាស់ ថ្មី ក្នុងក្រុងសិរីសោភ័ណ សម្តេចចុះមកផ្ទាល់បញ្ជាដល់លោក​អភិបាលខេត្តហាមដោះដូរទៅទីកន្លែងផ្សេងជាដាច់ខាតបើជនណានៅតែរឹងធ្វើការដោះដូរបេនឡាន ចាស់ថ្មីទៀតសម្តេច និងដាក់វិធានការយ៉ាងតឹងរឹងបំផុតមិនអាចលើកលែងឲ្យជននោះបានឡើយ។

ក្រោយពីបានព័ត៌មាននេះហើយ លោកអភិបាលខេត្តបញ្ជាឲ្យក្រុមហ៊ុន ឈឿនចាន់ថន ឲ្យក្រុមជាងរុះរើរបងព័ទ្ធបេនឡានថ្មីជាបន្ទាន់ហើយប្រគល់ទៅឲ្យរដ្ឋបាលខេត្តកាន់មកាប់វិញពិសេសសម្រាប់ត្រៀមទទួលប្រជាពលរដ្ឋណាដែលផ្ទះលិច​លង់ដោយទឹកជំនន់នៅថ្ងៃខាងមុនេះផងដែរ៕

អត្ថបទ៖ វ៉ាន់ ណាង