ពលរដ្ឋ​រអ៊ូកាយផ្លូវ​ដាក់លូ ខណៈអាជ្ញាធរ​សម្រុក​ស្តារប្រព័ន្ធលូរំដោះទឹកកខ្វក់ ទាំង​ខាងកើតនិង​ខាងលិចស្ទឹងសង្កែ

ប្រធានមន្ទីរសាធារណការ និងដឹកជញ្ជូនខេត្តបាត់ដំបង​បានប្រាប់កម្ពុជាថ្មីកន្លងទៅ​ថា ការងារ​គម្រោង​ស្ថារ​ហេដ្ឋារចនាសម្ព័ន្ធ​ផ្នែកខាងកើតស្ទឹងសង្កែ​សម្រេចបានជាង ៩០ ភាគរយហើយ និង​ផ្នែកខាងលិចស្ទឹងកំពុងបន្តអនុវត្តបាន​ជិត ៥០ ភាគរយ ខណៈ​គម្រោងទាំងមូលនឹងរួចរាល់នៅចុងឆ្នាំ ២០២៥។

ប៉ុន្តែប៉ុន្មានថ្ងៃមកនេះ ប្រព័ន្ធលូរំដោះទឹកកខ្វក់និងអាងប្រព្រឹត្តកម្មទឹកកខ្វក់ចេញក្រៅក្រុងនៅប៉ែកខាងកើតស្ទឹងសង្កែ នៅចំណុច​ភូមិរចេក ៤ សង្កាត់រតនៈ ក៏ទើបតែបន្តស្ថារស្របពេលទឹកភ្លៀងធ្លាក់មិនដាច់ក្នុងក្រុង បង្ក​ការ​លំបាក​ដល់ពលរដ្ឋ​ធ្វើ​ដំណើរ ស្របពេលផ្លូវធ្វើដំណើរពិបាក​ស្រាប់ផង។

ប្រជាពលរដ្ឋបានប្រតិកម្មប្រហាក់ប្រហែលគ្នាថា «ពួកគាត់ចង់ដឹកកូនទៅរៀន ត្រូវធ្វើដំណើរតាមផ្លូវផ្សេងទើបបាន ខណះដែលពួកគាត់ដាក់សំណួរថា «ហេតុអីពេលនេះទើបតែកាយដីដាក់លូ កាលពី ១ ខែមុនម៉េចមិនធ្វើ។ ម្យ៉ាងទៀតផ្លូវក៏ពិបាក​ធ្វើដំណើរស្រាប់ផង”។

ការលើកឡើងពីអ្នកភូមិជាយក្រុង ក៏ប្រហាក់ប្រហែលពលរដ្ឋរស់នៅក្នុងក្រុងបានលើកឡើងដែរថា «មិនមែនតែនៅ​តាមភូមិជាយក្រុងទេ សូម្បីនៅកណ្តាលក្រុងផ្លូវមួយចំនួនដូចរន្ធបាយអីចឹង»។

បើតាមប្រធានមន្ទីរសាធារណការ​និង​ដឹកជញ្ជូន​ខេត្ត​បាត់ដំបង​បាន​គូស​បញ្ជាក់ថា នៅត្រើយខាងកើតស្ទឹងសង្កែ ក្រុមបច្ចេកទេស​កំពុងបន្តការងារដាក់រីហ្គា និង​ខួងនៅខ្សែផ្លូវជាតិលេខ៥ ដើម្បីបញ្ចប់គម្រោងនៅផ្នែកខាងកើតស្ទឹង (TS2)។ ចំណែកនៅត្រើយខាងលិចស្ទឹង (PWSSP) ដែលសម្រេចបានប្រមាណជិត ៥០ ភាគរយ កំពុងបន្តអនុវត្តគម្រោងមានដូចជា ១-ការងារកាយដាក់ទុយោរងនៅខ្សែផ្លូវព្រះវិហារ,១៥៦,១០៩,១១១។ ២-ការងារដាក់រីហ្គា និង ខួងទុយោមេនៅខ្សែ​ផ្លូវ ១០៩។ ៣-ការងារកាយដាក់ទុយោតាមផ្ទះនៅខ្សែផ្លូវ១១៥,១១៩,១១៦,៣, ១១៤នឹង១០៩។ ៤-ការងារកាយដាក់ទុយោមេនៅខ្សែផ្លូវ ១០១។ ៥-ការងាររៀបចំតម្លើងពុម្ព ធ្វើរបងនៅអាងប្រព្រឹត្ដិកម្មឯកភ្នំ។ ៦-ការងារវ៉ៃស៉ីផាយនៅខ្សែរផ្លូវ៥១២ និងផ្លូវ លេខ ០៣ ។ ៧-ការងារ ព្រេមកៅស៊ូខ្សែផ្លូវ ១១៩ នឹង ១១១ ជាដើម។

រដ្ឋបាលខេត្តបាត់ដំបងក៏​បានបង្ហោះនៅលើផេកផ្លូវការរបស់ខ្លួន ដែលក្នុងសំណេរនោះបានសរសេរថា «ក្រុងបាត់ដំបងបច្ចុប្បន្ន កំពុងអនុវត្តគម្រោងស្តារប្រព័ន្ធលូរំដោះ ទឹកកខ្វក់និង អាងប្រព្រឹត្តកម្មទឹកកខ្វក់ ចេញក្រៅក្រុងទាំងប៉ែកខាងកើតស្ទឹងសង្កែ (សង្កាត់រតនៈ សង្កាត់ព្រែកព្រះស្ដេច) ដែល​គ្រោងបញ្ចប់ចុងឆ្នាំ​២០២៤ និងប៉ែកខាងលិចស្ទឹងសង្កែ (សង្កាត់​ស្វាយប៉ោ សង្កាត់ទួលតាឯក និងសង្កាត់ចំការសំរោង) គ្រោងបញ្ចប់ចុងឆ្នាំ​២០២៥ ដែលគាំទ្រដោយថវិកា​ហិរញ្ញប្បទាន​ពីធនាគារអភិវឌ្ឍន៍អាស៊ី (ADB) អនុវត្តដោយក្រសួងសាធារណការ និងដឹកជញ្ជូន»។

ក្នុងដំណាក់កាលសាងសង់នេះ ក្នុងរដូវភ្លៀង​ជួបការលំបាកដែលជៀសមិនផុត។ តែរដ្ឋបាលខេត្តនិង​ប្រតិបត្តិករគម្រោងកំពុង​ខិតខំជួសជុល និងសាងសង់យ៉ាងយកចិត្តទុកដាក់បំផុត។

បើតាម​អាជ្ញាធរ​ខេត្ត នៅពេលគម្រោងប្រព័ន្ធលូរំដោះទឹកកខ្វក់សាងសង់និងធ្វើតេស្តតាមបច្ចេកទេសរបស់គម្រោងរួចរាល់ រដ្ឋបាលខេត្តនឹងជំរុញឱ្យក្រុមហ៊ុនជួសជុលផ្លូវដែលខូចខាតឡើងវិញជាបន្តបន្ទាប់​ឱ្យបានឆាប់រហ័ស។ អាស្រ័យហេតុនេះ សូមប្រជាពលរដ្ឋ និងសាធារណជន មេត្តាជ្រាប និងដោយការយោគយល់បំផុត៕

អត្ថបទ៖ សៅ សាររិទ្ធ