ព័ត៌មានជាតិ

ចេកណាំវ៉ា ទោះលក់មិនបានតម្លៃខ្ពស់ ក៏មានទីផ្សារល្អ

បានផុស

១ year មុន

នៅ

ថ្ងៃពុធ ២១ ឧសភា ២០២៥

ដោយ

ផ្លែចេកណាំវ៉ា ចាស់ ឬទុំ ក៏នៅតែមានទីផ្សារល្អ ដែលជាតម្រូវការច្រើនយ៉ាងរបស់ប្រជាពលរដ្ឋ បើទោះបីជាបច្ចុប្បន្ន តម្លៃផ្លែចេកណាំវ៉ាមិនសូវជាទទួលបានខ្ពស់ក៏ដោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកស្រី វន សាយ័ន ដែលជាអ្នកប្រកបរបរលក់ផ្លែកចេកជាច្រើនប្រភេទ នៅក្នុងផ្សារមួយកន្លែងកណ្ដាលក្រុងបាត់ដំបង បានរៀបរាប់ថា គាត់បានប្រកបមុខរបរលក់ផ្លែចេកច្រើនឆ្នាំមកហើយ។ ក្នុងនោះមានដូចជា ចេកណាំវ៉ា ចេកពងមាន់ ចេកស្នាប់មុខ និងចេកអំបូងជាដើម ។

អាជីវកររូបនេះបានបន្តថា ជាទូទៅការប្រកបមុខរបររកស៊ីតែងមានចំណេញតិច ចំណេញច្រើន ឬអាចខាតក៏មានដែរ ប៉ុន្តែទោះបីជាយ៉ាងណា ការរកស៊ីនៅតែបន្តទៅមុខជារៀងរាល់ថ្ងៃ ដោយមិនសូវមានថ្ងៃឈប់សម្រាកឡើយ ព្រោះជាមុខរបរចិញ្ចឹមជីវិត។

អ្នកស្រី វន សាយ័ន បានបន្តថា សព្វថ្ងៃសម្រាប់ចេកណាំវ៉ា គឺមានទីផ្សារល្អជាងគេ ដោយសារតែតម្រូវការរបស់ប្រជាពលរដ្ឋមានច្រើនយ៉ាង ដូចជាយកទៅសែនព្រេន ធ្វើនំ ឬធ្វើចេកចៀនជាដើម។ ហេតុដូច្នេះហើយ ទើបចេកណាំវ៉ាមិនសូវលក់សល់នោះឡើយ។

ដោយឡែកសម្រាប់តម្លៃសព្វថ្ងៃនេះ គឺលក់ទៅតាមទំហំស្និត ដោយចាប់ពី ១.៥០០ រៀល ដល់ ៣.៥០០ រៀល ហើយចេកទាំងនេះ អ្នកស្រីផ្ទាល់តែងតែដើរទិញគេតាមស្រុកនានា ពិសេសនៅស្រុកបាណន់តែម្ដង។

ទន្ទឹមនេះ អ្នកស្រី បានត្អូញត្អែរដែរថា ការលក់ដូរមិនទៀងទាត់នោះទេ ដោយតម្លៃជួនឡើង ជួនចុះភ្លាមៗ ដោយពុំមានតម្លៃឋិតថេរនោះឡើយ ដូច្នេះហើយការទិញពីតាមចម្ការរបស់ប្រជាពលរដ្ឋយកមកលក់បន្ត ក៏មានការលំបាកខ្លះដែរក្នុងការជួលគេដឹកជញ្ជូនដើម្បីមកដល់ទីផ្សារ ហើយបើលក់មិនបានកម្រៃខ្លះទេក៏ជាផលវិបាកដែរ ប៉ុន្តែបើទោះបីជាចំណេញតិចក៏ដោយក៏ជាជាងដេកស្ងៀមនៅផ្ទះដោយគ្មានចំណូលនោះឡើយ៕

អត្ថបទ : សោ និយមរ័ត្ន