កសិករខេត្តបាត់ដំបង រំពឹងទិន្នផលស្រូវប្រាំង​​ឆ្នាំនេះ​កើន​ខ្ពស់ ដោយសារ​អាកាសធាតុអំណោយផល

កសិករ​នៅ​តាមបណ្តាស្រុកគោល​ដៅកសិកម្មផលិត​ស្រូវមួយចំនួន កំពុង​តែ​មមាញឹក​ធ្វើ​ស្រូវ​ប្រាំង ជាពិសេស​ស្រុក​មោងឬស្សី ដែល​ជាស្រុក​មួយ​មាន​សក្តានុពល​ផ្នែកវិស័យកសិកម្ម ជាង​បណ្តា​ស្រុកមួយចំនួនទៀត នា​រដូវ​កាល​ចុង​ឆ្នាំ២០២៤ នេះ។

កសិករ បាន​លើក​ឡើង​ថា ការ​សម្រុកធ្វើស្រូវប្រាំង​នេះ ដោយ​សារតែពួកគេមើលឃើញថា ឆ្នាំនេះ​អាកាសធាតុ​ហាក់​ប្រសើរ​ជាងឆ្នាំកន្លង​ទៅ និង​ការធ្វើ​តាំងពីដូនតា​ដែល​មិន​មានមុខរបរណា​ក្រៅ​ពីពឹង​ផ្អែកលើ​ដំណាំ​កសិកម្ម​នោះ​ទេ ទើបពួកគេសម្រុក​ទៅ​លើ​តែ​ដំណាំ​ស្រូវ​ទាំងរដូវវស្សា ទាំង​រដូវប្រាំង ដែល​ជា​ជង្រុក​សេដ្ឋកិច្ចគ្រួសារ​ទ្រទ្រង់លើជីវិត​រស់​នៅប្រចាំថ្ងៃពីមួយឆ្នាំទៅមួយឆ្នាំ។

លោក ផន ហាក់ កសិករ នៅក្នុង​ឃុំ​កំពុង​ព្រះ ស្រុក​មោងឫស្សី បាន​ឲ្យដឹង​ថា ឆ្នាំនេះ​អាកាស​ធាតុ​ហាក់​មាន​សភាពល្អប្រសើរ​សម្រាប់​ពេលវេលា​ដែល​ត្រូវបង្ក​​បង្កើន​ស្រូវ​ប្រាំង ដោយ​លោក​​បាន​ចាប់ផ្តើម​ធ្វើចាប់​ពីពាក់​កណ្តាល​ខែតុលា ហើយ​ឆ្នាំនេះ​លោក​សង្ឃឹម​ថា ទិន្នផល​នឹងបានប្រសើរ និង​អាច​ទទួល​បាន​ចំណូល​កើនជាងឆ្នាំកន្លងទៅ។

លោកបញ្ជាក់​យ៉ាង​ដូច្នេះ​ថា «ឆ្នាំ​នេះ ខ្ញុំ​ក៏​បាន​បង្កើន​ផ្ទៃដីដាំដុះ​ស្រូវប្រាំងច្រើន​ជាង​ឆ្នាំ​មុន ពី​ព្រោះ​តែ​ឆ្នាំមុនខ្ញុំធ្វើតែ ២ ហិកតា តែ​ឆ្នាំនេះខ្ញុំធ្វើ ៤ ហិកតា»។

កសិករ​ម្នាក់​ទៀត លោក ម៉ាប់ នៅ​ក្នុងភូមិ​កូនខ្លុង ឃុំ​កំពង់​ព្រះ ស្រុក​មោងឬស្សី បាន​ឲ្យដឹងដែរថា ពីមួយឆ្នាំ​ទៅមួយឆ្នាំ ក្រៅ​ពីមុខរបរ​តិចតួច លោក​មិ​នដែល​​ខកខានធ្វើ​ស្រែនោះទេ ព្រោះ​ដំណាំស្រូវជា​ជង្រុកសេដ្ឋកិច្ច​គ្រួសាររបស់​លោកតាំងពីដូនតា។

ជាក់ស្តែង​ឆ្នាំនេះ ស្រូវប្រាំង​លោក​បានចា​ប់ផ្តើមធ្វើតាំងពីដើមខែតុលា​ មក​ម្ល៉េះ។

«ដីស្រែ​ខ្ញុំមានតែ ៥ ហិកតាប៉ុណ្ណោះ ដែលបានធ្វើស្រូវរាល់ឆ្នាំ ទាំង​វស្សា និងប្រាំង ដែល​ធ្វើឲ្យជីវភាព​គ្រួសារខ្ញុំ បានល្អ​ប្រសើរ​ពីមួយឆ្នាំទៅមួយឆ្នាំ មិន​មាន​ពេក ហើយ​ក៏មិន​ក្រពេក ស្រូវប្រាំង​ឆ្នាំនេះ ខ្ញុំបាន​ជួលដី​ពីអ្នកជិតខាង​បន្ថែម ៣ ហិកតា ទៀត​ផង​ដែរ ចឹងឆ្នាំនេះស្រូវប្រាំងខ្ញុំជិត ១០ ហិកតា​ដែរ»។

មិនខុសគ្នានេះដែរ លោក ណុប ឡឹក ជា​កសិករ នៅ​ក្នុងឃុំ​មោងឬស្សី បានឲ្យ​ដឹង​ថា ​ស្រូវប្រាំង​លោកឆ្នាំនេះ កំពុង​តែផ្តល់​កម្លាំងចិត្តដល់លោក ខណៈ​ការលូតលាស់​បាន​ល្អច្រើន​ជាងឆ្នាំមុន ហើយ​កត្តាអាកាសធាតុ​ក៏ល្អប្រសើរ​ខ្លាំង​សម្រាប់​ស្រូវប្រាំង​បើធៀប​និងឆ្នាំមុន។

លោកថា «ខ្ញុំសង្ឃឹម​ច្រើន​ឆ្នាំ​នេះ ព្រោះ​បើតាម​មើល​គិត​ត្រឹមថ្ងៃ​នេះ ស្រូវប្រាំងខ្ញុំទាំង ៩ ហិកតា គឺល្អស្របគ្នា​ទាំងអស់ ហើយ​ខ្ញុំគិតថា ឆ្នាំនេះ​តាមរយៈ​ទិន្នផលនេះ សន្ទស្សន៍​សេដ្ឋកិច្ច​គ្រួសារ ខ្ញុំអាច​បាន​ប្រសើរ​ច្រើន ព្រោះ​ក្តី​សង្ឃឹម​លើ​ជីវភាព​គ្រួសារ​ខ្ញុំមាន​តែ​ទិន្នផល​ស្រូវ​តែប៉ុណ្នឹង»។

លោក ហេង សិទ្ធ មន្ត្រី​នៃ​មន្ទីរ​កសិកម្ម​ខេត្ត ទទួល​បន្ទុក​ផ្នែក​ស្ថិតិ បាន​ឲ្យដឹង​ថា កសិករ​បាន​សម្រុក​បង្ករ​បង្កើន​ផលស្រូវរដូវប្រាំងឆ្នាំ​២០២៤-២០២៥ មាន​ល្បឿនលឿន ដោយ​សារ​តែ​កត្តាអាកាសធាតុអំណោយផល​។ លោកថា បើគិត​ត្រឹមថ្ងៃទី២៥ ខែវិច្ឆកា ឆ្នាំ២០២៤ ប្រជាកសិករ ទូទាំង​ស្រុក​គោល​ដៅ ក្នុង​ខេត្ត​បាត់ដំបង បានអាស្រ័យ​ផល​ស្រូវ​រដូវ​ប្រាំង ប្រភេទ​ស្រូវ​ស្រាលប្រមាណជាង ៩៩% ហើយ នៃផែន​ការលើផ្ទៃដីសរុប ២៥.០០០ហិកតា៕

អត្ថបទ​៖ សៅ សារិទ្ធ