ប្រធានរដ្ឋ និងនាយករដ្ឋមន្ត្រីឡាវបង្ហាញអារម្មណ៍កក់ក្ដៅចំពោះវត្តមានសម្ដេចធិបតី

ប្រធានរដ្ឋ និងនាយករដ្ឋមន្ត្រីនៃសាធារណរដ្ឋប្រជាមានិតឡាវបានបង្ហាញអារម្មណ៍កក់ក្ដៅចំពោះវត្តមានរបស់សម្ដេចធិបតី ហ៊ុន ម៉ាណែត ដែលបានធ្វើដំណើរទៅចូលរួមដោយផ្ទាល់ គោរពវិញ្ញាណក្ខន្ធអតីតប្រធានរដ្ឋឡាវលោក ខាំតៃ ស៊ីផាន់ដន នាទីក្រុងវៀងច័ន្ទ ប្រទេសឡាវកាលពីថ្ងៃសៅរ៍ ទី៥ ខែមេសា។

ក្នុងជំនួបជាមួយសម្ដេចធិបតីនារសៀលថ្ងៃសៅរ៍ ប្រធានរដ្ឋឡាវលោក ថងលុន​ ស៊ីសូលីត បានវាយតម្លៃ​ខ្ពស់​ចំពោះ​វត្តមានរបស់សម្តេច​បវរ​ធិបតី​ និង​គណៈប្រតិភូ​ជាន់ខ្ពស់​កម្ពុជា​​ ​ក្នុង​ឱកាសដ៏ក្រៀមក្រំ​ ដែលនេះជាការ​បង្ហាញ​ឱ្យ​ឃេីញ​នូវ​ទំនាក់ទំនង​ជាប្រពៃណី​ មិត្ត​ភាព​ សាមគ្គីភាព​ និង​ភាពជា​ដៃគូ​យុទ្ធសាស្ត្រ​គ្រប់​ជ្រុងជ្រោយ​ និង​យូរអង្វែង​ រវាង​ប្រទេសទាំងពីរ​។

ដោយឡែកនាយករដ្ឋមន្ត្រីឡាវលោក សនសៃ ស៊ីផាន់ដន បានលើកចំពោះសម្ដេចធិបតីថា វត្តមានរបស់សម្ដេច គឺជាការលើកទឹកចិត្តដ៏ធំធេងមួយសម្រាប់លោក, ក្រុមគ្រួសារ, រដ្ឋាភិបាល និងប្រជាជនឡាវ និងជាសក្ខីភាពបង្ហាញពីភាពរឹងមាំនៃទំនាក់ទំនង និងកិច្ចសហប្រតិបត្តិការដ៏ល្អប្រសើរ ប្រកបដោយមិត្តភាព និងសាមគ្គីភាពរវាងប្រទេសទាំងពីរ។

ក្នុងឱកាសនៃជំនួបជាមួយប្រធានរដ្ឋ និងនាយករដ្ឋមន្ត្រីឡាវ សម្ដេចធិបតី ហ៊ុន ម៉ាណែត បានចូលរួមរម្លែកទុក្ខជាមួយរដ្ឋាភិបាល និងប្រជាជនឡាវ ក្នុងនោះសម្ដេចបានគូសបញ្ជាក់ថាកម្ពុជា-ឡាវ មិនមែន​មានទំនាក់ទំនងត្រឹមតែការងារប៉ុណ្ណោះទេតែជាទំនាក់ទំនងមនោសញ្ចេតនា «ជាបង ជាប្អូន និងក្រុមគ្រួសារ»។

ទាំងមេដឹកនាំឡាវ និងសម្ដេចធិបតី បាន​គូសបញ្ជាក់សាជាថ្មី​ថា នឹងបន្តជំរុញការពង្រឹង និងពង្រីក​ទំនាក់ទំនង និងកិច្ចសហប្រតិបត្តិការគ្រប់វិស័យកម្ពុជា-ឡាវឱ្យកាន់តែរឹងមាំ និងរីកចម្រើនបន្ថែមទៀត។

ទំនាក់ទំនងកម្ពុជានិងប្រទេសឡាវបានបង្កើតឡើងក្នុងឆ្នាំ១៩៥៦ ប្រទេសទាំងពីររួមជាមួយវៀតណាមផងនោះធ្លាប់ស្ថិតក្រោមអាណានិគមបារាំងជាមួយគ្នា ហើយក៏ងើបទាមទារឯករាជ្យជាមួយគ្នាផងដែរ។ ទំនាក់ទំនងកាន់តែជិតស្និតរវាងកម្ពុជា-ឡាវ មួយរយៈចុងក្រោយនេះមានលក្ខណៈគួរឱ្យកត់សម្គាល់ជាច្រើន ក្នុងនោះមានទាំងការផ្លាស់ប្ដូរដំណើរទស្សនកិច្ចរបស់ថ្នាក់ដឹកនាំញឹកញាប់ ជាមួយនឹងការប្រកាសពីភាពជាអ្នកជិតខាងល្អ បងប្អូនល្អជានិច្ចផងដែរ៕

អត្ថបទដោយ ហ៊ុន សិរីវឌ្ឍន៍