អាកាសធាតុនៅ គុយវ៉ែត អាចជាបញ្ហាប្រឈម​សម្រាប់​ ព្រះខ័នរាជស្វាយរៀង វគ្គផ្តាច់ព្រ័ត្រ ACGL

អាកាសធាតុនៅប្រទេស គុយវ៉ែត អាចជាបញ្ហាប្រឈមធំសម្រាប់កីឡាករ ព្រះខ័នរាជស្វាយរៀង ប្រកួតទល់នឹងក្រុមម្ចាស់ផ្ទះ Kuwait SC ក្នុងវគ្គផ្តាច់ព្រ័ត្រពានរង្វាន់ AFC Challenge League រដូវកាល ២០២៥-២០២៦ នេះ ដោយសារនៅទីនោះមាន​អាកាស​ធាតុ​ក្តៅជាង​នៅ​កម្ពុជា។

ក្រុម ព្រះខ័នរាជស្វាយរៀង នឹងត្រូវជួបក្រុម Kuwait SC ក្នុងវគ្គផ្តាច់ព្រ័ត្រពាន ACGL នៅកីឡដ្ឋាន Jaber Al-Ahmad ក្នុងប្រទេស គុយវ៉ែត ថ្ងៃទី ១៣ ខែ ឧសភា ឆ្នាំ ២០២៦។ យ៉ាងណាមិញ សម្រាប់ការប្រកួតនេះ គឺចំពេលរដូវក្តៅនៅក្នុងប្រទេសនេះចូលមកដល់ ដែលចាប់ផ្តើមពីខែ ឧសភា ដល់ខែ តុលា។

នៅប្រទេស គុយវ៉ែត ត្រូវបានគេដឹង ថា ជាប្រទេសក្តៅស្ងួតហែង​ ហើយក៏អាចមានព្រុះខ្សាច់ញឹកញាប់ផងដែរ។ ប្រទេសនៅតំបន់មិជ្ឃឹមបូព៌ាមួយនេះ មានអាកាសធាតុក្តៅខ្លាំងបំផុតចាប់ពីខែ មិថុនា ដល់ខែ តុលា ដែលអាចមានសីតុណ្ហភាពចាប់ពី ៤៥ ទៅ ៥០ អង្សាសេ។ ចំណែកនៅខែ ឧសភា នេះវិញ អាចមានសីតុណ្ហភាពចាប់ពី ៣៥ ទៅ ៤២ អង្សាសេ។

យោងតាមការព្យាករ​អាកាសធាតុដោយគេហទំព័រ Accu Weather បានឱ្យដឹង ថា នៅ គុយវ៉ែត នា​ថ្ងៃទី ១៣ ខែ ឧសភា ដែលជាថ្ងៃប្រកួត សីតុណ្ហភាព អាច​ឡើង​កម្តៅ​​ខ្ពស់បំផុតដល់ ៤២ អង្សាសេ។ អាកាសធាតុបែបនេះពិតជាអាចបង្ក​​ការលំបាកខ្លាំង​សម្រាប់​កីឡាករក្រុម ព្រះខ័នរាជស្វាយរៀង ដោយសារមានលក្ខណៈក្តៅខ្លាំង បើធៀបនឹង កម្ពុជា ។

នៅ កម្ពុជា បច្ចុប្បន្នមានសីតុណ្ហភាពចន្លោះពី ៣០ ទៅ ៣៦ អង្សាសេ ខណៈបើប្រៀបធៀបគ្នា គឺនៅ គុយវ៉ែត ក្តៅជាងខ្លាំង។ អ្វីដែលជាបញ្ហាប្រឈមមួយទៀត គឺនៅទីនោះក្តៅស្ងួត ពោលគឺមិនដូចនៅ កម្ពុជា នោះទេ ដែលក្តៅហើយសើម។

ទោះបីជាយ៉ាងណា កីឡាករ ព្រះខ័នរាជស្វាយរៀង មានពេលយូរថ្ងៃដែរ ពោលគឺចំនួន ៦ ថ្ងៃ ដើម្បីបន្ស៊ាំបរិយាកាស និងអាកាសធាតុនៅទីនោះ ដោយកាលពីយប់មិញថ្ងៃទី ៧ ខែ ឧសភា ឆ្នាំ ២០២៦ ក្រុមគ្រូបង្វឹក និងកីឡាករ បានធ្វើដំណើរចេញពី កម្ពុជា ទៅកាន់ប្រទេស គុយវ៉ែត ហើយ៕

អត្ថបទ៖ សេម កុសល