ជីវិតគូ Archives - Kampuchea Thmey Daily

មុនពេលរៀបការ គួរពិនិត្យសុខភាពលើ ៤ ចំណុចនេះ

សាង ស្រីល័ក្ខ — Thu, 03 Feb 2022 09:30:00 +0000

មុននឹងសម្រេចចិត្តចូលរោងការ គ្នាយើងមិនថាប្រុស ឬស្រី មិនគួររំលងការពិនិត្យសុខភាព មុនចាប់ផ្ដើមជីវិតជាគូនោះទេ។ ការពិនិត្យសុខភាពមុនរៀបការ គឺជារឿងគួរធ្វើដើម្បីជីវិតអាពាហ៍ពិពាហ៍ ប្រកបដោយភាពរីករាយ និងមានសុខភាពល្អ។

យើងគួរពិនិត្យសុខភាពមុនរៀបការទៅលើចំណុចអ្វីខ្លះ?

ការពិនិត្យសុខភាពមុនពេលរៀបការពិតជាផ្ដល់អត្ថប្រយោជន៍ច្រើនខ្លាំងណាស់ដល់ជីវិតជាដៃគូរបស់ប្ដីប្រពន្ធថ្មីថ្មោង ព្រោះយើងអាចដឹងពីដំណាក់កាលដំបូងនៃជំងឺមួយចំនួនមុនចាប់ផ្ដើមរស់នៅជាមួយគ្នា និងផ្ដល់ភាពងាយស្រួលក្នុងការសម្រេចទាក់ទងនឹងបញ្ហាសុខភាពទៅថ្ងៃអនាគត។ គ្នាយើងគួរពិនិត្យសុខភាពមុនរៀបការលើ ៤ ចំណុចខាងក្រោមនេះ៖

១. តេស្តរកមេរោគអេដស៍ និងជំងឺកាមរោគផ្សេងៗ

មេរោគអេដស៍ ជំងឺរលាកថ្លើមប្រភេទ B និង C ជាស្ថានភាពជំងឺដែលអាចនៅជាប់ជាមួយយើងពេញមួយជីវិត ហើយប្រសិនបើមិនគ្រប់គ្រង ឬព្យាបាលត្រឹមត្រូវទេ នោះអាចធ្វើឲ្យចំណងអាពាហ៍ពិពាហ៍កាន់តែមានភាពតានតឹង។ ហេតុនេះហើយទើបចាំបាច់យ់ងត្រូវបញ្ចូលក្នុងតារាងពិនិត្យសុខភាពមុនរៀបការ។ ការដែលយើងបានដឹងពីស្ថានភាពជំងឺទាំងនេះរបស់ដៃគូជាមុន យើងអាចរកវិធីការព្យាបាល ឬគ្រប់គ្រងច្បាស់លាស់ណាមួយបាន និងអាចការពារខ្លួនពីការឆ្លងជំងឺពីដៃគូបានថែមទៀតផង។ ជំងឺកាមរោគផ្សេងៗដូចជា ជំងឺប្រមេះទឹកបាយ ជំងឺស្វាយ បាក់តេរីទ្វារមាស ឬកើតឫស អាចព្យាបាលដោយការថែទាំត្រឹមត្រូវតិចតួច ហើយជួយកាត់បន្ថយហានិភ័យនៃភាពគ្មានកូន និងការរលូតកូនបានថែមទៀតផង។

២. តេស្ដភាពស៊ីគ្នានៃក្រុមឈាម

ក្រុមឈាមត្រូវតែមានភាពស៊ីគ្នារវាងដៃគូទាំងសងខាង ដើម្បីចៀសវាងបញ្ហាអំឡុងពេលមានផ្ទៃពោះដូចជាជំងឺរេស៊ីសជាដើម។ ជំងឺនេះ ជាស្ថានភាពនៃអង្គបដិប្រាណនៅក្នុងឈាមរបស់ស្ត្រីមានផ្ទៃពោះបំផ្លាញកោសិកាឈាមរបស់ទារក។ នេះអាចបណ្ដាលឲ្យគភ៌នៅក្នុងផ្ទៃប្រឈមនឹងបញ្ហាស្លាប់នៅក្នុងពោះ និងការរលូតចេញតែម្ដង។

៣. តេស្តភាពអាចមានកូន

ការតេស្តនេះមានភាពចាំបាច់ដោយថា បើសិនជាមានបញ្ហាទាក់ទងនឹងការមិនអាចមានកូន យើងអាចដោះស្រាយបានយ៉ាងឆាប់រហ័ស តាមដែលអាចធ្វើទៅបាន ដោយមិនបង្កឲ្យមានបញ្ហាផ្លូវចិត្ត ជម្លោះក្នុងគ្រួសារ ឬប៉ះពាល់ដល់អារម្មណ៍ដៃគូទាំងសង ខាងក្រោយរៀបការឡើយ។

៤. តេស្តហ្សែន ឬជំងឺរ៉ាំរ៉ៃ

ការពិនិត្យសុខភាពមុនពេលរៀបការ លើផ្នែកហ្សែន អាចជួយគ្នាយើងរកឃើញជំងឺនៅដំណាក់កាលដំបូងៗ និងមានវិធានការព្យាបាល ឬការពារយ៉ាងមានប្រសិទ្ធភាព មុនពេលជំងឺឈានដល់ដំណាក់កាលចុងក្រោយ។ ការធ្វើតេស្ដនេះគួរតែរួមបញ្ចូលការពិនិត្យជំងឺទឹកនោមផ្អែម ជំងឺលើសសម្ពាធឈាម កោសិកាមហារីក និងជំងឺឈាម Thalassemia៕

អត្ថបទផ្ដល់ដោយ៖ Hello Krupet

ចុចអាន៖ស្រីៗគួរដឹង! ប្រុសៗគិតរឿងសិចខ្លាំងមិនធម្មតា

ចុចអាន៖ខ្វះជាតិស័ង្កសី អាចចេញរោគសញ្ញាទាំង ៨នេះ

The post មុនពេលរៀបការ គួរពិនិត្យសុខភាពលើ ៤ ចំណុចនេះ appeared first on Kampuchea Thmey Daily.

អ្នកនៅលីវ មើលឱ្យហើយ ក្រោយរៀបការរួច រឿងទាំងនេះនឹងផ្លាស់ប្ដូរ១៨០ដឺក្រេ

Sonya — Fri, 29 Oct 2021 08:50:00 +0000

ក្រោយពីរៀបអាពាហ៍ពិពាហ៍ មានរឿងរ៉ាវមួយចំនួនមិនអាចនៅតែដដែលដូចកាលជាសង្សារនឹងគ្នានោះទេ។ ហេតុនេះគូស្នេហ៍មិនទាន់រៀបការ គួរបានត្រៀមខ្លួនជាមុនសម្រាប់ភាពប្រែប្រួលដែលនឹងកើតឡើង ដើម្បីចៀសបញ្ហាមួយចំនួន។

១. បំពេញឲ្យគ្នាទៅវិញទៅមក

ក្រោយការរៀបការមនុស្សពីរនាក់ត្រូវរស់នៅជាមួយគ្នា ដោយបង្កើតគ្រួសារថ្មីមួយ។ ម្ខាងៗមិនមែននៅតែឯងទៀតទេ ដូច្នេះការព្យាយាមធ្វើឲ្យស្នេហាមានការចុះសម្រុងគ្នា ជារឿងល្អបំផុត ប៉ុន្តែកុំបណ្ដោយខ្លួនឯងឲ្យទន់ជ្រាយ ឬចាំតែពឹងពាក់លើនរណាម្នាក់។

២. ដៃគូមិនទាក់ទាញរហូតនោះទេ

ជាធម្មតា រូបរាង និងសម្រស់រមែងប្រែប្រួលទៅតាមពេលវេលា ហើយយូរៗទៅភាពទាក់ទាញនៃដៃគូក៏ចុះអន់ថយតាមនោះ។ ដូច្នេះបន្ទាប់ពីរៀបការរួច ត្រូវត្រៀមខ្លួនទទួលយកបម្រែបម្រួលនេះឲ្យហើយ និងព្យាយាមស្រឡាញ់ភាពស្រស់ស្អាតដែលប្ដីឬប្រពន្ធមានចេញពីបេះដូងបរិសុទ្ធរបស់គេ។

៣. ចរិតពិតនឹងលេចឡើង

ជាទូទៅមនុស្សស្រឡាញ់គ្នាដំបូង ពិតជាមិនទាន់ស្គាល់ចរិតគ្នាច្បាស់នៅឡើយទេ។ ប៉ុន្តែក្រោយបានគ្នាជាប្ដីប្រពន្ធ ទម្លាប់ប្លែកៗនិងចរិតហ្ស៊ីនចេញមកអស់ហើយ។ ហេតុនេះ បានជាការសម្រេចចិត្តរស់នៅជាមួយគ្នា ត្រូវចេះយោគយល់ អធ្យាស្រ័យ ទើបជីវិតគូពោរពេញដោយក្ដីសុខ។

៤. ថង់ប្រាក់តែមួយ

លុយដែលរកបានពីមុន ចង់ចាយប៉ុន្មាន ចង់ទុកប៉ុន្មាន មិនចាំបាច់ទៅឈឺក្បាលហាលថ្ងៃជាមួយនរណាទេ។ ប៉ុន្តែបន្ទាប់ពីចាប់ដៃគូជាស្វាមីភរិយា មុនចាយវាយត្រូវគិតគូរពីគ្រួសារ ព្រោះតែឈប់ខ្លួនមួយដូចមុន ហើយត្រូវប្រឹងរកលុយខ្លាំងជាងមុនទៀត។

៥. សាច់ញាតិកាន់តែច្រើន

បន្ទាប់ពីរៀបការ មិនត្រឹមតែមានគ្រួសារថ្មីទេ ប៉ុន្តែសាច់ញាតិក៏កើនច្រើនដែរ។ អ្នកខ្លះអាចគិតថា រៀបការហើយនៅតែពីរនាក់ឬគ្រួសារតូចមួយប៉ុណ្ណោះ តែវាខុសស្រឡះ ដោយសារប្ដីប្រពន្ធត្រូវមានសាច់ថ្លៃបន្ថែមជាញាតិទៀត ទោះមិនបានរស់នៅក្នុងទ្រនំតែមួយក៏ដោយ។ ហេតុនេះ ត្រូវចេះស្រឡាញ់ញាតិខាងប្ដីឬប្រពន្ធដូចជាញាតិខ្លួនផង៕

ប្រែសម្រួល៖ សន្យា

ប្រភព៖ Bright Side

ចុចអាន៖ មុនសម្រេចចិត្តរៀបការ ផែនការ ៣ចំណុចនេះ ត្រូវគិតគូរទុកឱ្យហើយ

ចុចអាន៖ សងបំណុលមុនរៀបការ ពាក់ព័ន្ធអ្វីនឹងជីវិតគូ?

The post អ្នកនៅលីវ មើលឱ្យហើយ ក្រោយរៀបការរួច រឿងទាំងនេះនឹងផ្លាស់ប្ដូរ១៨០ដឺក្រេ appeared first on Kampuchea Thmey Daily.

៦ ចំណុចអំពីប្ដីប្រពន្ធឬសង្សារ កុំពិភាក្សាជាមួយអ្នកដទៃដាច់ខាត

Sonya — Mon, 20 Sep 2021 04:37:02 +0000

មនុស្សកើតទុក្ខតប់ប្រមល់ តែងចង់រកគ្នានិយាយលេង រំសាយកង្វល់។ ប៉ុន្តែមិនមែនគ្រប់រឿង គ្រប់បញ្ហា សុទ្ធតែគួរពិភាក្សាជាមួយអ្នកផ្សេងឡើយ ជាពិសេសរឿងជីវិតគូ។

១. អាថ៌កំបាំងអ្នកទាំងពីរ

ពេលខ្លះយើងអាចនឹងចង់អួតប្រាប់គេពីការសម្ងាត់នៃភាពផ្អែមល្ហែមរបស់យើងទាំងពីរ ដើម្បីឱ្យគេសរសើរ ឬស្ញប់ស្ញែង។ មិនថាខាងប្រុសឬខាងស្រីឡើយ អ្វីដែលអ្នកទាំងពីរនិយាយគ្នា ឬធ្វើជាមួយគ្នា បើមិនមានការយល់ព្រមពីម្ខាងទៀត ការដែលឱ្យអ្នកដទៃដឹងឮ គឺជាកំហុសឆ្គង មិនគួរបញ្ចេញជាដាច់ខាត។ អ្វីដែលយើងយល់ថាមិនអី មិនប្រាកដថា ដៃគូយើង គ្មានបញ្ហានោះទេ។

២. ជម្លោះរបស់អ្នកទាំងពីរ

ពេលឈ្លោះប្រកែកគ្នា ពេលមិនល្អនឹងគ្នា ដើរនិយាយប្រាប់មិត្តភក្តិ ញាតិផៅ ឱ្យដឹងឮ ឱ្យគេបញ្ចេញមតិ ដល់ពេលត្រូវរ៉ូវគ្នា អ្នកដឹងឮជាអ្នកខុសទៅវិញ។ ស្នេហាជាការយោគយល់ អភ័យទោស និងនៅជាកណ្ដាលជានិច្ច មិនថាឈ្លោះគ្នាប៉ុនណាទេ កុំនាំរឿងឱ្យអ្នកផ្សេងខឹងសម្បារជាមួយ គេមិនដឹងរឿងពិតយើងឡើយ។

៣. ភាពឯកជនរបស់ដៃគូ

បញ្ហាឯកជនរួមមាន រូបរាងកាយ សុខភាពផ្លូវចិត្ត សុខភាពបន្តពូជជាដើម មិនគួរចែករំលែកជាមួយអ្នកដទៃនោះទេ។ ទាំងនេះជារឿងរបស់យើងទាំងពីរ ហេតុអីត្រូវកកាយ ខណៈគេបានត្រឹមតែស្ករប៉ុណ្ណោះ។ មិនពេញចិត្តអ្វី និយាយគ្នាឯង កុំនាំអ្នកផ្សេងឈឺឆ្អាល ព្រោះគេមានរឿងរបស់គេត្រូវដោះស្រាយដែរ ម្យ៉ាងការហែកកេរ្តិ៍គ្នាបែបនេះ នាំឱ្យដៃគូខ្មាស់អៀន ឬខ្វះទំនុកចិត្តជាមួយយើង។

៤. បង្ហាញរឿងលើគ្រែ

មិនថាយើងជាប្ដីប្រពន្ធ ឬជាគូសង្សារក្ដី ធ្លាប់មានអីៗនឹងគ្នាប៉ុន្មានដង ឬអារម្មណ៍បែបណា គួររក្សាជាការសម្ងាត់ជារៀងរហូតសម្រាប់តែអ្នកទាំងពីរបានហើយ។ បើចង់និយាយពីសុខភាពផ្លូវភេទ ឬមានបញ្ហានេះជាមួយគូស្នេហ៍ គួរពិភាក្សាជាមួយគ្រូពេទ្យ ព្រោះពេទ្យនឹងរក្សាអាថ៌កំបាំងឱ្យយើង ជាជាងប្រាប់ញាតិមិត្ត ដែលថ្ងៃណាមួយអាចនឹងបែកធ្លាយនូវអ្វីដែលយើងមិនចង់ឮក៏ថាបាន។

៥. បញ្ហាហិរញ្ញវត្ថុ

ស្ថានភាពហិរញ្ញវត្ថុ និងប្រាក់ចំណូលខ្ពស់ឬទាប មិនគួរពិភាក្សាជាមួយអ្នកដទៃ សូម្បីតែសាច់ញាតិជិតស្និទ្ធក៏ដោយ។ ថវិកាគ្រួសារឬចំណូលដៃគូ គឺជារឿងផ្ទាល់ខ្លួនរបស់អ្នកទាំងពីរ។ មានក្រ ប្រឹងរកខ្លួនឯង ប្រឹងដោះស្រាយខ្លួនឯង ជាជាងត្អូញត្អែរប្រាប់គេ នាំឱ្យគេវាយតម្លៃ។ ជាពិសេសលើកទឹកចិត្តគ្នា ឱ្យខំធ្វើការ សន្សំទ្រព្យ ទើបអាចបន្ថែមសុភមង្គលឱ្យជីវិតគូបាន។

៦. ចំណុចខ្សោយរបស់ដៃគូ

គ្មាននរណាលើលោកនេះ ល្អឥតខ្ចោះ គ្រប់ដប់ គ្មានចំណុចអវិជ្ជមានឡើយ ដែលនេះយើងត្រូវទទួលស្គាល់ និងចេះលើកទឹកចិត្តគ្នាទៅវិញទៅមក។ ផ្ទុយទៅវិញ បើយើងយកចំណុចខ្សោយរបស់សង្សារឬប្ដីប្រពន្ធ ទម្លាយប្រាប់ពិភពលោក មិនខុសអីពីបង្ហាញកេរ្តិ៍ខ្មាស់គ្នាអ៊ីចឹងដែរ។

សូម្បីដៃគូយើងខ្លាចអ្វី ក៏ពុំគួរយកទៅនិយាយកំប្លែងលេង នាំភាពអាម៉ាស់ដែ។ មនុស្សយើងមានរឿងភ័យខ្លាចរៀងខ្លួន ហើយគេជ្រើសយើងជាដៃគូ គេសង្ឃឹមថា យើងអាចជួយគាំទ្រ ផ្ដល់ភាពកក់ក្ដៅ មិនមែនចំអែចំអន់ បង្កើតសំណើចខ្លួនឯងនោះទេ។ បែបនេះគេហៅថា និយាយមិនចេះគិត ឬ គ្មានសីលធម៌៕

ប្រែសម្រួល៖ សន្យា

ប្រភព៖ Bright Side

ចុចអាន៖ មិនចង់ឱ្យអ្នកចាស់មាក់ងាយ ក្រោយពេលបែកគ្នា បញ្ឈប់ទង្វើឆោតល្ងង់ទាំងនេះ

ចុចអាន៖ បុគ្គលិកលក្ខណៈសាមញ្ញៗរបស់បុរសដែលនារីជាច្រើនចង់បានជាគូអនាគត

The post ៦ ចំណុចអំពីប្ដីប្រពន្ធឬសង្សារ កុំពិភាក្សាជាមួយអ្នកដទៃដាច់ខាត appeared first on Kampuchea Thmey Daily.

សង្សារក៏ដោយ ប្ដីប្រពន្ធក៏ដោយ អាចបែកគ្នា បើធ្វើរឿង ៨យ៉ាងនេះ

Sonya — Thu, 09 Sep 2021 07:44:55 +0000

ទម្លាប់តូចៗប្រចាំថ្ងៃអាចបំផ្លាញជីវិតជាសង្សារ ឬ ប្ដីប្រពន្ធយើងបាន ដល់ថ្នាក់លែងនិយាយរកគ្នា ពាក់មុខយក្សដាក់គ្នា ឬលែងលះគ្នាក៏មាន បើអស់ទ្រាំ។ ដើម្បីចៀសវាងរឿងនេះ កុំធ្វើរឿង ៨ យ៉ាងខាងក្រោម៖

១- និយាយដើមដៃគូ

ពិសេសស្រីៗអាចមានទម្លាប់នេះ នៅពេលពួកគេនៅជាមួយមនុស្សដែលចូលចិត្តនិយាយដើមគេ។ ភាគច្រើនមិនសូវសម្បូររឿងល្អប៉ុន្មានទេ។ គ្នាយើងខ្លះ សេពគប់ ឬមានអ្នកស្គាល់គ្នា (ស៊េរីទំនេរមិនបាន ជុំគ្នាស៊ីត្រាវ) ចាត់ចូលជាចំណុចអត់ល្អ។

២- គិតតែចំណុចខ្សោយ

ការប្រៀបធៀបដៃគូរបស់ខ្លួនទៅបុគ្គលផ្សេង សង្សារ ឬប្ដី/ប្រពន្ធរបស់មិត្តភ័ក្ដិ រកតែចំណុចអាក្រក់ ជាការសន្សំរឿងល្អក់កករក្នុងចិត្ត ហើយថ្ងៃណាមួយនឹងផ្ទុះជាជម្លោះជាមិនខាន។ បើដឹងខ្លួន មានទម្លាប់បែបនេះ គួរប្ដូរវាចេញ ព្រោះវាមានជះឥទ្ធិពលប្រេះឆាដល់អនាគត (ឬគ្រួសារ) ដែលយើងមានផែនការរស់នៅជាមួយគ្នាយូរ។

៣- មិនដែលគិតពីអារម្មណ៍ដៃគូ

រឿងអាក្រក់នរណាក៏មាន ខុសត្រង់ថា តិច ឬច្រើនប៉ុណ្ណោះ។ ពេលសម្រេចចិត្តនៅជាមួយគ្នា គឺបែងចែកខ្លួនពាក់កណ្ដាលទៅឲ្យដៃគូ មិនថា ពេលវេលា ឬចំណូលចិត្ត។ ស្វែងយល់ពីគ្នា ព្យាយាមលះបង់ឲ្យច្រើនតាមដែលអាចធ្វើបាន ដើម្បីសុភមង្គលថ្ងៃក្រោយ។ កើតជំងឺតួឯក ឬគិតតែខ្លួនឯងពេក ជាសញ្ញាប្រាប់ថា ត្រៀមរស់នៅម្នាក់ឯងឲ្យហើយទៅ បើមិនកែ។

៤- ចាប់ផ្ដើមឈ្លោះវាយតប់

ស្រីៗទំនងជាសម្បូរបញ្ហាលើកឡើងជាងបុរស។ បុរសចង់ឲ្យស្ថានការណ៍ស្ងប់ស្ងាត់ ពេលស្រីៗធ្វើអ្វីតាមអារម្មណ៍នឹកឃើញ ដូចជាចង់ស្រែក ឬប្រើពាក្យសម្ដីធ្ងន់ៗដែលអាចបង្កជម្លោះ។ ការហ៊ានលើកដៃ លើកជើង យកឈ្នះចាញ់ ភាគច្រើនក៏មិនអាចទ្រាំទ្រនៅជាមួយគ្នាបានដែរ។

៥- ពាក្យសម្ដី

ឈ្លោះគ្នា ឬប៉ះទង្គិច ចាប់ផ្ដើមពីពាក្យសម្ដីទ្រគោះបោះបោក ជេរជាដើម មុនឈានដល់ហិង្សា។ អ្នកខ្លះគេប្រកាន់ណាស់ ព្រោះសម្ដីវាធ្ងន់ជាងវាយទៀត។ ត្រូវចេះគ្រប់គ្រងខ្លួនឯង កុំបណ្ដោយឲ្យសម្ពាធ ឬកំហឹងមួយឆាវ បំផ្លាញក្ដីស្រឡាញ់ដែលខំសាងជាយូរ។

៦- មុខក្រញូវមិនលស់

ទោះបីព្យាយាមធ្វើចិត្តឲ្យត្រជាក់ តែរាងកាយមិនស្ដាប់យើង ហើយនៅតែបន្តទឹកមុខមិនល្អ លាក់បាំងអារម្មណ៍ពិត ហាក់ដូចជាទាត់ចោលនូវពេលវេលាយោគយល់គ្នារវាងដៃគូ។ ពេលខ្លះញញឹមមិនចេញ ក៏ត្រូវញញឹមដែរ។

៧- មិនឈ្លោះទាល់តែសោះ

បើមានបញ្ហាអ្វីមួយអាក់អន់ស្រពន់ចិត្ត ហើយមិនលើកឡើងទេ បញ្ហាទំនាក់ទំនងនឹងកាន់តែឆ្ងាយទៅៗ។ យកល្អ គួរលើកបញ្ហាមកដោះស្រាយជាជាងទុកវាឲ្យធ្ងន់ធ្ងរ។

៨- ទុកបញ្ហាចោលមិនដោះស្រាយ

ទុកបញ្ហាចោលយូរពេកមិនដោះស្រាយ អាចជំរុញឲ្យធ្លាក់ក្នុងបញ្ហារឹតតែធ្ងន់ធ្ងរ ដូចនេះត្រូវចេះប្រឈមនឹងបញ្ហាជាបន្ទាន់។

គ្រាន់តែថា ករណីបញ្ហាខ្លះត្រូវការពេលដោះស្រាយប៉ុណ្ណោះ។ អ៊ីចឹង យើងត្រូវរង់ចាំយូរបន្តិច ដើម្បីឱ្យអ្វីៗវិលត្រលប់មកវិញ។ សំខាន់ជាងគេ ភាគីទាំងសងខាងត្រូវមានឆន្ទៈជួយសង្គ្រោះទំនាក់ទំនង ឬអាពាហ៍ពិពាហ៍របស់ខ្លួនឡើងវិញ ពោលគឺចង់នៅជាមួយគ្នា៕

អត្ថបទផ្ដល់សិទ្ធិ៖ Hello គ្រូពេទ្យ

ចុចអាន៖ “ស្នេហា” មានគុណប្រយោជន៍ស្ទើរមិនគួរឲ្យជឿ

ចុចអាន៖ គុណសម្បត្តិ ៣យ៉ាងនៃស្នេហាខុសជំនាន់ ឬរៀបការជាមួយដៃគូអាយុច្រើនជាង

The post សង្សារក៏ដោយ ប្ដីប្រពន្ធក៏ដោយ អាចបែកគ្នា បើធ្វើរឿង ៨យ៉ាងនេះ appeared first on Kampuchea Thmey Daily.

ជីវិតគូមិនរឹងមាំឬឈានដល់ផ្លូវបំបែក ដោយសារមាន ៥ចំណុចនេះ

Sonya — Thu, 05 Aug 2021 09:50:31 +0000

ជីវិតគូ ពិតជាលំបាកដែលអាចដើររួមផ្លូវយូរអង្វែង ចំពោះប្ដីប្រពន្ធទាំងឡាយណា ដែលមានប៉ុន្មានចំណុចនេះជាប់ខ្លួន ៖

១. ទុកការងារធំជាងគ្រួសារ

ការងារក៏ស្រឡាញ់ ប្ដីប្រពន្ធក៏ស្រឡាញ់ ធ្វើឱ្យរឿងទាំងពីរនេះឱ្យមានទម្ងន់ប្រហែលគ្នា ទើបអ្នកមិនជាប់អន្ទាក់លើភាពរវល់ ហើយទុកគ្រួសារចោល។

គូស្វាមីភរិយាបើរស់នៅក្រោមដំបូលតែមួយ តែដូចឆ្ងាយគ្នាមួយយោជន៍ ដោយសារម្នាក់ៗរវល់រៀងខ្លួនជួនជួបមុខគ្នាតែពេលយប់ ជួនមិនបានជួបមុខគ្នាក៏មាន ព្រោះទុកការងារសំខាន់ពេក គ្មានពេលសូម្បីញ៉ាំបាយជាមួយគ្នា នោះហើយជាបញ្ហាដែលត្រូវដោះស្រាយបន្ទាន់។

២. មិនរស់នៅជុំគ្នា ក្រោយរៀបការរួច

ការរស់នៅឆ្ងាយពីគ្នា អាចនាំឱ្យប្ដីប្រពន្ធមិនសូវបានទាក់ទង មិនសូវនឹករឭកគ្នា និងជួនកាលបណ្ដាលឲ្យដៃគូម្ខាងៗមានទម្លាប់ឯកោបាន ឬបែកចិត្តមានថ្មី។ សញ្ញានេះកំពុងបញ្ជាក់ថា ចំណងអាពាហ៍ពិពាហ៍មិនរឹងមាំឡើយ។ បើមិនអាចរស់នៅជុំគ្នាទេ កុំទាន់រៀបការល្អជាង។

៣. មិនជួយមើលថែគ្នាពេលមានជំងឺ

ប្ដីប្រពន្ធ ត្រូវរួមទាំងសុខនិងទុក្ខជាមួយគ្នា ប៉ុន្តែបើពេលឈឺថ្កាត់ គ្មានអ្នកអើពើ គ្មានអ្នកយកចិត្តទុកដាក់ រៀបការរួចមែន តែដូចមិនរៀបការដដែល។ មូលហេតុនេះហើយ ទើបជីវិតគូ គ្មានសុភមង្គល និងមិនអាចបន្តជាមួគ្នាបានយូរ។

៤. មិនជួយគិតគូអនាគតគ្រួសារជាមួយគ្នា

ក្រោយរៀបការហើយ ម្នាក់ៗត្រូវជាចំណែកនៃគ្នា។ ដូច្នេះអនាគតគ្រួសារ ចំណូលចំណាយ ការចិញ្ចឹមបីកូន ត្រូវតែគិតគូរនិងដោះស្រាយជាមួយគ្នា។ ប៉ុន្តែបើមិនខំជួយរៀបផែនការជាមួយគ្នាទេ គ្រួសារធ្វើម៉េចនឹងបានក្ដីសុខទៅ?

៥. មិនត្រូវគ្នាជាមួយសាច់ថ្លៃ

ក្នុងនាមជាកូនប្រសាសាច់ថ្លៃ បញ្ហារមែងមានតិចឬច្រើន ម្នាក់ៗត្រូវចេះអត់ធន់ លើកលែងនិងជួយសម្របសម្រួល ដោះស្រាយឱ្យបានល្អវិញកុំបន្លាយយូរពេក។ វិវាទបែបនេះ ពិបាកសាងជីវិតគ្រួសារជាមួយគ្នាបានយូរអង្វែងណាស់៕

ប្រែសម្រួល៖ សន្យា

ប្រភព៖ Bright Side

ចុចអាន៖ នារីដែលបុរសត្រូវការ មិនមែនស្អាតសុភាពស្រគត់ស្រគំតែម្យ៉ាង តែមាន ២ ចំនុច ខ្លឹមនេះវិញទេ

ចុចអាន៖ រឿងមិនអាចរំលង ៦ យ៉ាងទាំងប្រុសនិងស្រី គួរគិតមុនឈានដល់អាពាហ៍ពិពាហ៍ជាមួយគ្នា

The post ជីវិតគូមិនរឹងមាំឬឈានដល់ផ្លូវបំបែក ដោយសារមាន ៥ចំណុចនេះ appeared first on Kampuchea Thmey Daily.

ទម្លាប់អាក្រក់ ៤ ចំណុចរបស់ភរិយា មិនគួរឱ្យស្វាមីដឹងជារៀងរហូត

Sonya — Thu, 08 Jul 2021 10:18:30 +0000

តើជាទម្លាប់អ្វីខ្លះទៅ?

១. តាមដានចាប់កំហុស

ទម្លាប់អាក្រក់បំផុតរបស់មនុស្សស្រី គឺចូលចិត្តតាមដានដៃគូ ដើម្បីតាមចាប់កំហុស។ ទង្វើបែបនេះគេហៅថា ខ្វះភាពជឿជាក់ ហើយបើមិនជឿជាក់ដដែល តើរៀបការនឹងគ្នាធ្វើអី? បើភរិយាទាំងឡាយមានទម្លាប់ចូលចិត្តតាមដានស្វាមី គួរកែប្រែភ្លាមៗ ព្រោះបើគាត់ដឹង វានឹងធ្វើឱ្យគាត់ធុញទ្រាន់ ហើយចាប់ផ្តើមមិនចូលចិត្តប្រពន្ធបែបប៉ូសិសស៊ើបអង្កេតបែបនេះ។

២. លួចឆែកទូរសព្ទ

ឱ្យតែមានឱកាស តែងតែលួចឆែកមើលទូរសព្ទដៃរបស់បុរស នេះជាទង្វើរបស់ភរិយាធន់អន់។ គិតមើល៍! បើប្ដីដឹង តើគាត់មានអារម្មណ៍បែបណា? គាត់អាចខ្វះទំនុកចិត្តលើអ្នក ហើយបើរឿងនេះកើតឡើងញឹកញាប់ ច្បាស់ណាស់ភ្លើងជម្លោះប្រាកដជាឆេះមិនខាន។

៣. យកបញ្ហាប្ដីប្រាប់អ្នកក្រៅ

មិនថាញាតិឬភឿនមិត្តទេ ពួកគេមិនគួរដឹងបញ្ហារបស់ស្វាមីអ្នកឡើយ ដែលវារួមមាន បញ្ហាផ្លូវភេទ បញ្ហាហិរញ្ញវត្ថុ ឬអសមត្ថភាពអាជីពជាដើម។ គ្មានបុរសណាម្នាក់ចង់ឱ្យប្រពន្ធខ្លួនហែកកេរ្តិ៍ប្ដីប្រាប់ពិភពលោកឡើយ។ រឿងក្ដៅរឿងត្រជាក់ជារឿងគ្រួសារយើង ហេតុអីត្រូវប្រកាសប្រាប់គេឯង ឱ្យម្នាក់ៗជួបភាពអាម៉ាស់នោះ?

៤. រំឭកគូស្នេហ៍ចាស់

នរណាៗក៏មានអតីតកាល ហើយក្នុងនោះ ស្ត្រីមុនពេលរៀបការ នាងអាចធ្លាប់មានសង្សារ។ បើមានមែន វាក៏មិនសំខាន់ទៀតដែរ តែសំខាន់កុំរំលើកបើកកគាស់កកាយអំពីគូស្នេហ៍ចាស់ឱ្យស្វាមីបានឮ ដែលទង្វើនេះហាក់បីដូចជាទម្លុះបេះដូងរបស់គាត់អ៊ីចឹង។ មានន័យអីទៀត ក្នុងការរំឭកពីគេ? ព្រោះពេលនេះ អ្នករៀបការមានសុភមង្គលហើយ!

ប្រែសម្រួល៖ សន្យា

ប្រភព៖ Useful Gen

ចុចអាន៖ ៣ តិចនិកខ្លឹមៗ ប្រើផ្សះផ្សាជម្លោះប្ដីប្រពន្ធឱ្យឆាប់ជានាគ្នាវិញ

ចុចអាន៖ ឧត្តមភរិយា ដែលបុរសទាំងឡាយគេងស្រមៃប៉ុនប៉ង

The post ទម្លាប់អាក្រក់ ៤ ចំណុចរបស់ភរិយា មិនគួរឱ្យស្វាមីដឹងជារៀងរហូត appeared first on Kampuchea Thmey Daily.

សងបំណុលមុនរៀបការ ពាក់ព័ន្ធអ្វីនឹងជីវិតគូ?

Sonya — Wed, 30 Jun 2021 09:52:42 +0000

បំណុលសឹងទាំងអស់ សុទ្ធតែជាបន្ទុក និងសម្ពាធមិនថាចំពោះជីវិតផ្ទាល់ខ្លួន ឬគ្រួសារឡើយ។ ជាពិសេស ចំពោះអ្នកនៅលីវបម្រុងនឹងរៀបការ ប្រសិនបើគូស្នេហ៍ម្ខាងៗ ជាប់បំណុលមុនភ្ជាប់ចំណងអាពាហ៍ពិពាហ៍ វារឹតតែជារឿងដែលត្រូវដោះស្រាយឱ្យរួចរាល់សិន ទើបជាការល្អ។ ហេតុអ្វី? នេះជាហេតុផល ៥ សំខាន់ៗដែលបង្ហាញថា អ្នកគួរសងបំណុលជាមុន មុនពេលរៀបចំគ្រួសារថ្មី!

១. រំខានដល់ការសន្សំប្រាក់

នៅពេលជាប់បំណុល ជាពិសេសជាប់បំណុលច្រើន អ្នកនឹងពិបាកសន្សំប្រាក់សម្រាប់ថ្ងៃរៀបការ ឬបើរៀបការហើយនៅតែជាប់បំណុល ជីវភាពគ្រួសារថ្មីថ្មោងនឹងមិនងាយងើបពីភាពខ្វះខាតឡើយ។ ការសន្សំប្រាក់ជាការឆ្លៀតទុកដាក់ប្រាក់ចំណូលខ្លះសម្រាប់ផែនការអនាគត ដូច្នេះបើមិនទាន់សងគេរួចទេ មុខតែសន្សំមិនបាន។

២. មិនងាយមានផ្ទះជារបស់ខ្លួន

ការបង់រំលោះកាន់តែពិបាកច្រើនឡើង ប្រសិនបើនៅជាប់បំណុលមុខក្រោយ។ វាបង្ហាញថា អ្នកមិនអាចបែងចែកប្រាក់បានល្អ ហើយនេះជាហានិភ័យទៅដល់ជីវភាពគ្រួសាររួមមានការទិញគេហដ្ឋាន យានជំនិះ ឬសម្ភារប្រើប្រាស់ក្នុងផ្ទះ។ល។

៣. គ្មានលទ្ធភាពផ្គត់ផ្គង់តម្រូវការពេលជួបបញ្ហាបន្ទាន់

បើទោះបីចង់សន្សំប្រាក់ទុកសម្រាប់ភាពបន្ទាន់យ៉ាងណា ក៏ពិបាកបែងចែកដែរ ត្បិតត្រូវសងគេជាមុន។ នៅជាប់បុលគេ ប្រាក់ភាគច្រើននឹងត្រូវសងឱ្យបំណុល។ ដូច្នេះ ការដែលសងបំណុលអស់ហើយ រួចរៀបការ ទើបមិននាំទុក្ខដាក់ប្ដីប្រពន្ធ ក្រោយចាប់គ្នាសាងគ្រួសារថ្មី។ ពេលនោះអ្នកក៏អាចសន្សំប្រាក់តិចតួចសម្រាប់ពេលបន្ទាន់ ដូច្នេះបញ្ហាហិរញ្ញវត្ថុ ក៏ប្រឈមហានិភ័យតិចដែរ។

៤. ជីវិតគូជួបភាពរកាំរកូស

ចង់ឱ្យខ្លួនជ្រះស្រឡះ ក្រោយពេលរៀបការ? បើអ៊ីចឹង ទាល់តែគិតគូរធ្វើយ៉ាងណារើខ្លួនឱ្យជ្រះស្រឡះពីបំណុលសិនដែរ។ ជាប់បំណុលតាមខ្លួនក្រោយមង្គលការ ដៃគូម្ខាងទៀត ច្បាស់ជាលួចអន់ចិត្ត ឬអាចទាស់ទែងគ្នា ដោយសារគេហត់នឹងជួយសងបំណុលជាមួយអ្នក។ វរតែរៀបការហើយ គ្មានការងារធ្វើទៀត អ្នកទាំងពីរ ប្រាកដជាជួបភាពរកាំរកូសមិនលែងឡើយ។

៥. ពិបាកបង្កើតគ្រួសារថ្មី

ការជំពាក់បំណុល នឹងបង្កបញ្ហាផ្សេងក្រៅហិរញ្ញវត្ថុនោះគឺ ការចាប់ផ្ដើមគ្រួសារថ្មី។ អ្នកពិតជាមិនចង់បង្កើតកូនមកនៅក្នុងផ្ទះដែលពោរពេញទៅដោយការជំពាក់បំណុលនោះទេ។ ពេលមានកូន អ្នកនឹងត្រូវចំណាយធំជាងមុនដើម្បីទិញសម្ភារៈសម្រាប់កូន និងចំណាយលើការសិក្សារបស់ពួកគេ។ល។ ដោយមូលហេតុនេះ បំណុលអាចរារាំងមិនឱ្យឆាប់មានបុត្រនោះទេ។ បែបនេះហើយ ទើបការដែលខំប្រឹងរកប្រាក់សងបំណុលឱ្យចប់សព្វគ្រប់ មុនឈានដល់មង្គលការ ជារឿងចាំបាច់ដែលត្រូវបញ្ចប់ជាដាច់ខាត៕

ប្រែសម្រួល៖ សន្យា

ប្រភព៖ Lifehack

ចុចអាន៖ អំពីការរៀបអាពាហ៍ពិពាហ៍លើកទី ២ ក្រោយលែងលះម្ដងហើយ

ចុចអាន៖ វិធីសងបំណុលបានរហ័ស និងចាប់ផ្ដើមជីវិតភ្លឺស្វាងសាជាថ្មី

The post សងបំណុលមុនរៀបការ ពាក់ព័ន្ធអ្វីនឹងជីវិតគូ? appeared first on Kampuchea Thmey Daily.

អំពីការរៀបអាពាហ៍ពិពាហ៍លើកទី ២ ក្រោយលែងលះម្ដងហើយ

Sonya — Tue, 01 Jun 2021 04:06:33 +0000

ខណៈដែលមនុស្សពីរនាក់ឈានចូលដល់វិថីអាពាហ៍ពិពាហ៍ នោះដោយសារពួកគេមានសង្ឃឹមថានឹងអាចរស់នៅជាមួយគ្នាបានរហូត ទើបព្រមចាប់ដៃគ្នាជាគូ។ ប៉ុន្តែគ្រប់យ៉ាងមិនសមបំណងទាំងអស់ទេ គូស្នេហ៍មួយចំនួនក៏ដើរដល់ផ្លូវទាល់ រហូតលែងលះដោយមូលហេតុផ្សេងៗ។

ក្រោយពីនោះ ដើម្បីព្យាបាលជំងឺបែកបាក់កាលពីពេលអតីត បុរសពោះម៉ាយនិងស្ត្រីមេម៉ាយខ្លះក៏សម្រេចចិត្តឆ្លងកាត់ផ្លូវអាពាហ៍ពិពាហ៍ម្ដងទៀត ស្របពេលដែលខ្លួនឈានដល់វ័យជ្រេ។

តើអាពាហ៍ពិពាហ៍លើកទី ២ អាចជោគជ័យជាងមុនដែរឬអត់?

អាពាហ៍ពិពាហ៍មួយដែលអាចបន្តរស់នៅជាមួយគ្នារហូតចាស់ព្រឹទ្ធចាស់ព្រាង កំពុងធ្លាក់ចុះនៅទូទាំងពិភពលោក។ នៅសហរដ្ឋអាមេរិក ៥០% នៃអាពាហ៍ពិពាហ៍បញ្ចប់ដោយការបែកគ្នា ឬលែងលះគ្នាជារៀងរហូត។ រីឯនៅក្នុងប្រទេសឥណ្ឌា តួលេខនេះទាបជាងសហរដ្ឋអាមេរិកបន្តិច។ ក្នុងនោះមានតែ ១៣ គូក្នុងចំណោមស្វាមីភរិយា ១០០០ គូប៉ុណ្ណោះ ដែលអាចបញ្ចប់ជីវិតអាពាហ៍ពិពាហ៍ដោយជោគជ័យ។

តើមានស្វាមីភរិយាដែលលែងលះគ្នាប៉ុន្មានគូ ដែលនឹងរៀបការម្ដងទៀត?

មនុស្សជិត ៨០% មានទំនោររៀបការម្តងទៀត បន្ទាប់ពីលែងលះឬបាត់បង់ដៃគូ ហើយភាគច្រើននៃពួកគេមានអាយុលើសពី ៤០ ឆ្នាំ។ ប៉ុន្តែគួរឲ្យកត់សម្គាល់ផងដែរ អត្រានៃការលែងលះរបស់គូស្វាមីភរិយាក្នុងដំណាក់កាលនេះមានភាគរយខ្ពស់ដូចគ្នា ដោយជិត ៦៥% ឈានដល់ការបែកបាក់ជាលើកទី២។

ហេតុផលមួយចំនួនធ្វើឱ្យអាពាហ៍ពិពាហ៍លើកទី ២ បរាជ័យ

-រំឭកទំនាក់ទំនងប្រេះឆាពីមុន

– មានគំនិតផ្ទុយគ្នាទាក់ទងនឹងប្រាក់កាស ការរួមភេទ និងគ្រួសារ

-មនុស្សអតីតនៅតែជ្រៀតជ្រែកក្នុងជីវិតគូស្នេហ៍ថ្មី

-ប្រញាប់ប្រញាល់រៀបការគូថ្មី ទាំងមិនទាន់ដាច់ស្រេចជាមួយអ្នកចាស់

ប៉ុន្តែមានសញ្ញាល្អដែរនៅក្នុងជីវិតរៀបការលើកទី២ ដោយសារស្ថិតិចង្អុលបង្ហាញថា អាពាហ៍ពិពាហ៍ម្ដងទៀតក្រោយលែងលះម្ដងហើយ ជាស្នេហាមានភាពចាស់ទុំជាងមុន ព្រោះផ្អែកលើបទពិសោធន៍ចាស់ គូស្នេហ៍នឹងមានសុភមង្គលជាងលើកទី១។

តើធ្វើយ៉ាងណាឲ្យការរៀបអាពាហ៍ពិពាហ៍លើកទី ២ រលូន?

រស់នៅជាមួយគ្នាប្រដោយសុភមង្គល មានរឿងជាច្រើនត្រូវលះបង់ អត់ធ្មត់ និងយោគយល់។ ដើម្បីកុំឲ្យស្នេហាលើកនេះបែកបាក់ម្ដងទៀត គប្បីចៀសវាងប្រៀបធៀបដៃគូបច្ចុប្បន្នជាមួយគូស្នេហ៍ចាស់ ដែលនាំឲ្យសៅហ្មងចិត្តប៉ុណ្ណោះ។

ចំណែកឯរូបមន្តសំខាន់មួយទៀតដើម្បីកសាងគ្រួសារពោរពេញដោយក្ដីសុខ នោះត្រូវស្មោះត្រង់ជាមួយគ្នា មិនថា អ្នកដទៃក្មេងជាង ស្អាតជាង ឬល្អជាងដៃគូខ្លួនយ៉ាងក៏ដោយ។ ភាពស្មោះត្រង់ជាគ្រឿងផ្សំដែលជួយឲ្យជីវិតគូអាចបន្តដំណើរដោយរលូននឹងគ្នាបានយូរអង្វែង។

ក្រៅពីនោះ គួរចេះទទួលយកនូវភាពខុសគ្នារវាងអ្នកទាំងពីរ ព្រោះលើលោកនេះគ្មាននរណាអាចមានអ្វីដែលស្របតាមយើងទាំងស្រុងនោះទេ។ ម្យ៉ាងអ្នកទាំងពីរក៏មានវ័យចំណាស់ហើយដែរ មិនគួរមានឈ្មោះជាមេម៉ាយឬពោះម៉ាយម្ដងជាពីរដងទៀតនោះឡើយ។

ចងចាំរឿងនេះ! សុភមង្គលគ្រួសារ ស្ថិតលើស្វាមីភរិយាទាំងគូជាអ្នកកំណត់ មិនមាននរណាអាចកំណត់វាសនាគ្រួសារយើងជំនួសយើងឡើយ៕

ប្រែសម្រួល៖ សន្យា

ប្រភព៖ BONOBOLOGY.COM

ចុចអាន៖ ចំណងអាពាហ៍ពិពាហ៍ជោគជ័យដែរឬអត់អាចសម្គាល់ដោយទង្វើទាំងនេះ

ចុចអាន៖ មិនធូរធារ គួរដឹងរបៀបសន្សំទាំងនេះ កុំឲ្យខ្វះមុខខ្វះក្រោយពេលកូនកើត

The post អំពីការរៀបអាពាហ៍ពិពាហ៍លើកទី ២ ក្រោយលែងលះម្ដងហើយ appeared first on Kampuchea Thmey Daily.

ជីវិតគូ Archives - Kampuchea Thmey Daily

មុនពេលរៀបការ គួរពិនិត្យសុខភាពលើ ៤ ចំណុចនេះ

​អ្នកនៅលីវ មើលឱ្យហើយ ក្រោយរៀបការរួច រឿងទាំងនេះនឹងផ្លាស់ប្ដូរ១៨០ដឺក្រេ

៦ ចំណុចអំពីប្ដីប្រពន្ធឬសង្សារ កុំពិភាក្សាជាមួយអ្នកដទៃដាច់ខាត

សង្សារ​ក៏​ដោយ ​ប្ដីប្រពន្ធ​ក៏​ដោយ អាច​បែក​គ្នា ​បើ​ធ្វើ​រឿង​ ៨យ៉ាង​នេះ

ជីវិតគូមិនរឹងមាំឬឈានដល់ផ្លូវបំបែក ដោយសារមាន ៥ចំណុចនេះ

ទម្លាប់អាក្រក់ ៤ ចំណុចរបស់ភរិយា មិនគួរឱ្យស្វាមីដឹងជារៀងរហូត

សងបំណុលមុនរៀបការ ពាក់ព័ន្ធអ្វីនឹងជីវិតគូ?

អំពីការរៀបអាពាហ៍ពិពាហ៍លើកទី ២ ក្រោយលែងលះម្ដងហើយ

អ្នកនៅលីវ មើលឱ្យហើយ ក្រោយរៀបការរួច រឿងទាំងនេះនឹងផ្លាស់ប្ដូរ១៨០ដឺក្រេ

សង្សារក៏ដោយ ប្ដីប្រពន្ធក៏ដោយ អាចបែកគ្នា បើធ្វើរឿង ៨យ៉ាងនេះ