កម្ពុជានាំចេញទៅអាមេរិក មានទំហំទឹកប្រាក់ជាង ៨,២៣ ពាន់លានដុល្លារ ក្នុងរយៈពេល ១០ ខែ

គិតចាប់ពីខែមករា ដល់ខែតុលា ឆ្នាំ ២០២៤ ពាណិជ្ជកម្មទ្វេភាគីកម្ពុជា-អាមេរិក សម្រេច​បាន​ទឹក​​ប្រាក់ជាង ៨,៤៥ ពាន់លានដុល្លារ កើនឡើង ៩,៧ ភាគរយ បើធៀបនឹងរយៈពេលដូចគ្នាក្នុងឆ្នាំ ២០២៣។ នេះ​បើ​យោងតាម​អគ្គនា​យកដ្ឋាន​គយ និង​​​រដ្ឋាករ​កម្ពុជា ​(GDCE)​។​

ទិន្នន័យរបស់ GDCE បានបង្ហាញថា ចាប់ពីខែមករា-វិច្ឆិកា ឆ្នាំ ២០២៤ ការនាំចេញ-នាំចូល​ទំនិញ​​រវាង​ប្រទេស​​​​​ទាំងពីរមានទឹកប្រាក់សរុប ៨,៤៥ ពាន់លានដុល្លារ កើនឡើង ៩,៧ ភាគ​រយ ក្នុង​នោះ​កម្ពុជា​នាំចេញទំនិញទៅអាមេរិកមានតម្លៃ ៨,២៣ កើនឡើង ៩,៨ ភាគរយ និង​ទំនិញ​អាមេរិកនាំចូល​មក​​​កម្ពុជាតម្លៃជាង ២១៧ លានដុល្លារ កើនឡើង ៧,៥ ភាគរយ។

អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជាប្រាប់កម្ពុជាថ្មីនៅថ្ងៃទី ១២ ខែវិច្ឆិកា ឆ្នាំ ២០២៤ នេះថា ​កំណើននៃការនាំចេញទំនិញពីកម្ពុជាទៅសហរដ្ឋអាមេរិក មានភាព​ល្អប្រសើ ដោយសារអស្ថិរភាពនៅក្នុងតំបន់ ដូចជាប្រទេសមីយ៉ាន់ម៉ា ប្រទេសបង់ក្លាដេស ដែលបានធ្វើឱ្យរោងចក្រ​សហគ្រាសមួយចំនួន​មកកាន់កម្ពុជា ផលិតក្នុងការនាំចេញ ហើយទីផ្សារបញ្ជា​ទិញពីអាមេរិក​ក៏កើនឡើងខ្ពស់ ពិតមែនតែ GSP ត្រូវបានព្យួរមែន តែយើងនាំចេញក្នុងបន្ទាត់​បង់ពន្ធ ជា​សមាជិកអង្គការពាណិជ្ជកម្មពិភពលោក (WTO)​ យើងនៅតែប្រព្រឹត្ត​ទៅល្អប្រសើរ។

លោកបណ្ឌិត ហុង វណ្ណៈ អ្នកជំនាញ​សេដ្ឋកិច្ច​នៃ​រាជបណ្ឌិត្យសភាកម្ពុជា បានឱ្យដឹងថា រា​ជរដ្ឋាភិបាលកម្ពុជាមានទំនាក់ទំនងល្អជាមួយអាមេរិក ខណៈការបញ្ជាទិញរបស់អាមេរិក​ពីកម្ពុជាមានកំណើនរាល់ឆ្នាំ។

លោកថា គោលនយោបាយការបរទេសរបស់អាមេរិក នឹងនៅ​តែបន្តការផ្ដល់ការអនុគ្រោះ​ក្នុងការ​នាំចូលទំនិញពីកម្ពុជា។

​ទំនិញដែលកម្ពុជានាំចេញទៅអាមេរិកមានដូចជា សម្លៀកបំពាក់ សម្ភារធ្វើដំណើរ កង់ និង​សម្ភារ​ប្រើប្រាស់មួយចំនួនទៀត។

ចំណែកអាមេរិកនាំចូលមកវិញ មានដូចជារថយន្ត គ្រឿង​យន្ត គ្រឿង​អលង្ការ គ្រឿងសំអាង សម្ភារ​អគ្គិសនី អេឡិច​ត្រូនិក និងសម្ភារ​ប្រើប្រាស់​មួយ​ចំនួន​ទៀត៕

អត្ថបទ៖ ឡេង ដេត