ការដោះដូរទំនិញអន្តរជាតិរបស់កម្ពុជា កើនឡើងដល់ជាង ៣០ ពាន់លានដុល្លារ នៅឆមាសទី១

នៅឆមាសទី១ ឆ្នាំ ២០២៥ ការដោះដូរទំនិញរវាងប្រទេសកម្ពុជា ជាមួយដៃគូពាណិជ្ជកម្មអន្តរជាតិ សម្រេចបានជាង ៣០ ពាន់​លានដុល្លារ កើនឡើង ១៧,២% ធៀបនឹងរយៈពេលដូចគ្នាកាលពីឆ្នាំមុន។

ទិន្នន័យរបស់អគ្គនា​យកដ្ឋាន​គយ និង​រដ្ឋាករ​កម្ពុជា ​(GDCE) ចេញផ្សាយ​នៅ​ថ្ងៃទី ១០ ខែកក្កដា បង្ហាញថា ចាប់ពីខែមករា ដល់ខែមិថុនា ឆ្នាំ ២០២៥ ការនាំចេញ-នាំចូលទំនិញរវាងកម្ពុជា ជាមួយដៃគូអន្តរជាតិមានទឹកប្រាក់សរុប ៣០,៥៧ ពាន់លានដុល្លារ កើនឡើង ១៧,២% ធៀបនឹងរយៈពេលដូចគ្នាក្នុងឆ្នាំ ២០២៤ ក្នុងនោះកម្ពុជានាំចេញ ១៤,២៩ ពាន់លានដុល្លារ កើន ១៦,២% ចំណែកឯការនាំទំនិញចូល​មកវិញមាន​ទំហំ​ទឹកប្រាក់ ១៦,២៧ ពាន់លានដុល្លារ កើនឡើង ១៨%។

យោងតាម​ស្ថិតិ​ខាង​លើ​ ​ជញ្ជីង​ពាណិជ្ជ​កម្ម​អន្តរជាតិ​កម្ពុជា​​​រយៈ​ពេល ៦ ខែ​ ​ឆ្នាំ​២០២៥ មាន​ឱនភាព​ប្រមាណ​ ១,៩៨ ពាន់លានដុល្លារ។

​អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា មានប្រសាសន៍ថា ស្ថិរភាពនយោបាយ និងកំណើនសេដ្ឋកិច្ច បានទាក់ទាញអ្នកវិនិយោគមក​កម្ពុជាកាន់​តែ​ច្រើន ដែលធ្វើឱ្យការផលិតកែច្នៃនាំចេញកាន់តែច្រើន។

​អ្នកឧកញ៉ា លឹម ហេង បញ្ជាក់ថា៖ «ការដឹកនាំរបស់សម្ដេចធិបតី ហ៊ុន ម៉ាណែត គឺសម្ដេចទំនាក់ទំនងពាណិជ្ជ​កម្ម​យ៉ាងសកម្ម ដើរទាក់ម៉ូយជាអន្តរជាតិសឹងគ្រប់ប្រទេសដែលគាត់ទៅ ធ្វើឱ្យការ​ចាប់​អា​រម្មណ៍​គម្រោងវិនិយោគ នៅក្រុមប្រឹក្សាអភិវឌ្ឍន៍កម្ពុជា មិនដែលមានទេក្នុងប្រវត្តិសាស្ត្រ ឆ្នាំ ២០​២៤ និង ២០២៥ ​មានកំណើនខ្ពស់  ដែលធ្វើឱ្យការផលិត កែច្នៃ និងនាំចូល​វត្ថុ​ធាតុ​ដើម និងនាំចេញកើនឡើង»។​

លោកឧបនាយករដ្ឋមន្ត្រី ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍​កម្ពុជា មានប្រសាសន៍នៅថ្ងៃទី ០៨ ខែកក្កដាថា រាជរដ្ឋាភិបាលកម្ពុជាបន្តជំរុញការនាំចេញផលិតផលកសិផលរបស់កម្ពុជាឱ្យបានច្រើនបន្ថែមទៀត ខណៈរដ្ឋមន្ត្រីក្រសួងពាណិជ្ជកម្ម កំពុងខិតខំប្រឹងប្រែងចរចាកិច្ចព្រមព្រៀងពាណិជ្ជសេរី ជាមួយប្រទេសមួយចំនួន និងបើកទីផ្សារផ្សេងៗទៀត ដើម្បីលក់ផលិតផលកម្ពុជា។

លោកឧបនាយករដ្ឋមន្ត្រីបន្ថែមថា រាជរដ្ឋាភិបាលកម្ពុជាកំពុងធ្វើពិពិធកម្មសេដ្ឋកិច្ចកម្ពុជា ដោយមិនពឹងផ្អែកតែលើទំនិញសម្លៀកបំពាក់តែមួយនោះទេ ដើម្បីការពារផលប្រយោជន៍កម្ពុជា។

យោងតាមក្រសួងពាណិជ្ជកម្ម នៅឆ្នាំ ២០២៤ ពាណិជ្ជកម្មកម្ពុជា-អន្តរជាតិសម្រេចបាននូវ​ទំហំទឹកប្រាក់ជាង ៥៤,៧៤ ពាន់លានដុល្លារ កើនឡើង ១៦,៩% ធៀបនឹងឆ្នាំ ២០២៣។

ក្នុងនោះការនាំចេញទំនិញ​របស់​កម្ពុជា ​​មានទំហំទឹកប្រាក់ ២៦,១៩ ពាន់លានដុល្លារ កើនឡើង ១៥,៧% ចំណែកឯការនាំទំនិញចូល​មកវិញមាន​ទំហំ​ទឹកប្រាក់ ២៨,៥៤ ពាន់លានដុល្លារ កើន ១៨%។

​ទំនិញដែលកម្ពុជា នាំចេញទៅទីផ្សារអន្តរជាតិ រួមមាន សម្លៀកបំពាក់ ស្បែកជើង ម៉ាស៊ីន និង​ឧបករណ៍អគ្គិសនី វត្ថុធាតុធ្វើ​អំពីស្បែក បរិក្ខារធ្វើពីរោមសត្វ ធញ្ញជាតិ កៅស៊ូ និងផលិតផល​ធ្វើ​អំពី​កៅស៊ូ និងគ្រឿងសង្ហារឹមជាដើម៕

អត្ថបទ៖ ឡេង ដេត