ផលិតកម្មគ្រាប់ស្វាយចន្ទីកម្ពុជា សម្រេចបាន ៨៥ ម៉ឺន​តោន ខណៈប្រាក់ចំណូលជាង ១ ពាន់លានដុល្លារនៅឆ្នាំនេះ

សមាគមស្វាយចន្ទីកម្ពុជាបានព្យាករណ៍ថា នៅក្នុងឆ្នាំ២០២៤នេះ កម្ពុជានឹង​ផលិត​​​​គ្រាប់ស្វាយចន្ទីឆៅបានចំនួន ៨៥ ម៉ឺនតោន ក្នុងនោះនាំចេញទៅក្រៅ​ប្រទេស ៧៥ ម៉ឺនតោន ដែលអាចរកចំណូលបានជាង ១ ពាន់លានដុល្លារ ខណៈ​ផលិត​កម្ម​ស្វាយ​​​ចន្ទីពិភព​លោកធ្លាក់ចុះ ប្រមាណ​៣០ភាគរយ។

សមាគមស្វាយចន្ទីកម្ពុជាបញ្ជាក់ថា ការនាំចេញគ្រាប់ស្វាយចន្ទីឆៅទៅវៀតណាមសម្រេចបានលើសផែន​ការ​មានចំនួន ៧២ ម៉ឺនតោន គិតជាទឹកប្រាក់ជាង ៩២១ លានដុល្លារ។

លោក អួន ស៊ីឡុត ​ប្រធានសមាគមស្វាយចន្ទីកម្ពុជា បានឱ្យដឹងនៅថ្ងៃទី ២៨ ខែមិថុនានេះថា សមាគមបាន​អំពាវនាវ ឱ្យសមាជិកហាលគ្រាប់ទុកក្នុងអំឡុង​​ពេលតម្លៃចន្ទីធ្លាក់​ចុះកាលពីដើមឆ្នាំ បានធ្វើឱ្យតម្លៃគ្រាប់ស្វាយចន្ទីងើបឡើងវិញនៅពាក់​កណ្ដាលខែមីនា រហូតដល់ខែមេសា ដែលមានតម្លៃ ៥ ៤០០ រៀល ក្នុងមួយគីឡូ។ ម្យ៉ាងទៀត នៅអាហ្វ្រិកទិន្នផល​ស្វាយចន្ទីបានធ្លាក់ចុះប្រមាណ ៥០% ដោយសារបាតុភូត​អេលនីណូ (El Nino)។

បើតាមលោក អួន ស៊ីឡុត បច្ចុប្បន្ន តម្លៃគ្រាប់ស្វាយចន្ទីអាចលក់បានក្នុងតម្លៃ ៧ ២០០ រៀលក្នុងមួយគីឡូក្រាម ដែលមានការធ្លាក់ចុះបន្តិច បន្ទាប់ពីហក់ឡើងខ្ពស់បំផុតមិនធ្លាប់មានដល់ ៨ ២០០ រៀលក្នុងមួយគីឡូក្រាម កាលពីដើមខែមិថុនានេះ។

លោក អួន ស៊ីឡុត បញ្ជាក់ថា មូលហេតុធ្លាក់ចុះបន្តិចវិញ ដោយសារតែ​ប្រទេសកូឌីវ័រ ដែលជាប្រទេសផលិតស្វាយចន្ទីច្រើនជាងគេលើពិភពលោក បានបើកការនាំចេញឡើងវិញ បន្ទាប់ពីបិទមួយរយៈសម្រាប់ការកែច្នៃក្នុងស្រុក។

យោងតាមរបាយការណ៍​របស់​សមាគមស្វាយចន្ទីកម្ពុជា នៅក្នុងរយៈពេល៥ខែឆ្នាំ២០២៤ កម្ពុជា​ផលិត​គ្រាប់ស្វាយចន្ទីឆៅសម្រេចបាន ៧១ ម៉ឺន ៦ ពាន់តោន ​ក្នុងនោះនាំចេញទៅ​ប្រទេសវៀត​ណាមចំនួន ៦៦ ម៉ឺន ៧ ពាន់តោន ​កើនឡើង ៣៨ ភាគរយ ​បើប្រៀប​ធៀបរយៈពេលដូចគ្នា​កាល​ពីឆ្នាំមុន ​ដែលគិតជាទឹកប្រាក់ចំនួន ៨៥១ លានដុល្លារ។

នៅឆ្នាំ ២០២៣ កម្ពុជាសម្រេចបាននូវការនាំចេញគ្រាប់ស្វាយចន្ទីឆៅទៅទីផ្សារ​អន្តជាតិចំនួន ៦៥ ម៉ឺន ៦ ពាន់តោន ថយចុះ ៧.៦% គិតជាទឹកប្រាក់ចំនួន ៨៣៧ លានដុល្លារ បើប្រៀបធៀបឆ្នាំ ២០២២។ នេះបើតាមរបាយការណ៍សមាគមស្វាយចន្ទីកម្ពុជា៕

អត្ថបទ៖ ឡេង ដេត