តម្លៃ​លេខពិសេសផ្ទាល់ខ្លួនបំពាក់លើម៉ូតូ ទាបបំផុត​ ១០ ម៉ឺនរៀល និងខ្ពស់បំផុត ៨ ​លានរៀល

ក្រសួងសាធារណការនិងដឹកជញ្ជូន បាន​បង្ហើប​ពី​តម្លៃ​លេខពិសេសផ្ទាល់ខ្លួនសម្រាប់​បំពាក់ទៅលើ​ទោចក្រយានយន្ត ត្រីចក្រយានយន្ត និងម៉ូតូកង់បួន ដែលទើបប្រកាស​ដាក់​ឲ្យដំណើរការសាកល្បង​ ជាមួយការកំណត់តម្លៃតាមជម្រើស​ដោយ​ទាប​បំផុតតម្លៃ​ ១០ ម៉ឺន​រៀល និងខ្ពស់បំផុត​តម្លៃ ៨ លាន​រៀល។

បើតាមប្រភពពី​មន្រ្តីក្រសួង​សាធារណការនិងដឹកជញ្ជូន​បាន​​បញ្ជាក់ពីភាព​ចាំបាច់ សម្រាប់​ដាក់​ឲ្យដំណើរការ​លេខពិសេស​ផ្ទាល់ខ្លួន (លេខកម្ពុជា) សម្រាប់ម៉ូតូ ដោយ​អនុវត្ត​តាមការ​ណែនាំ​របស់ប្រមុខរដ្ឋាភិបាល​ ក្នុងគោលបំណងផ្តល់នូវ​ជម្រើសកាន់តែសម្បូរបែបជូនប្រជាពលរដ្ឋ និងកៀរគរចំណូលចូលថវិកាជាតិ។

បន្ថែមពីនេះ ការ​រៀបចំឱ្យមានការលក់ចុះបញ្ជីលេខពិសេសផ្ទាល់ខ្លួនសម្រាប់ទោចក្រយានយន្ត ត្រីចក្រយានយន្ត និងម៉ូតូកង់បួនបន្ថែមទៀត ក៏​ផ្អែកតាមការសិក្សានិងបានធ្វើការស្ទង់មតិប្រជាពលរដ្ឋឃើញថា ប្រជាពលរដ្ឋ​ជាច្រើនមានបំណង​ចង់បានលេខចុះបញ្ជីពិសេសផ្ទាល់ខ្លួនដើម្បីបំពាក់លើម៉ូតូរបស់ខ្លួន។

កាលពី​ល្ងាចថ្ងៃទី១៣ ខែឧសភា ឆ្នាំ២០២៥ ក្រសួងសាធារណការ និងដឹកជញ្ជូន បានដាក់ឲ្យ​សាកល្បងដោយអនុញ្ញាត​ឱ្យពលរដ្ឋ​អាចចូលទៅស្វែងរកទិញលេខ និងបំពេញបែបបទចុះបញ្ជីលេខ​ពិសេស​ផ្ទាល់ខ្លួន ដែលកំពុងឃើញការចាប់អារម្មណ៍ខ្ពស់ និង​ផុសផុលក្នុងការស្វែងរកតាមរយៈប្រព័ន្ធស្វ័យប្រវត្តិកម្ម។

លេខចុះបញ្ជីពិសេសផ្ទាល់ខ្លួនសម្រាប់ទោចក្រយានយន្តត្រីចក្រយានយន្ត និងម៉ូតូកង់បួន ដាក់លក់តាមប្រព័ន្ធស្វ័យប្រវត្តិកម្មរបស់ក្រសួងសាធារណការ និងដឹកជញ្ជូន ដែល​ពលរដ្ឋអាចចូលទៅស្វែងរកលេខដែលខ្លួនពេញចិត្ត ហើយអាចបំពេញពាក្យស្នើសុំចុះបញ្ជី និងពាក់ផ្លាកលេខបាន។

តម្លៃលេខពិសេសផ្ទាល់ខ្លួនសម្រាប់ ទោចក្រយានយន្ត ត្រីចក្រយានយន្ត និងម៉ូតូកង់បួន ត្រូវ​បានរៀបចំក្នុងតម្លៃមួយទៅ​តាម​ជម្រើស​​និង​ចំណង់ចំណូលចិត្តរបស់​ពលរដ្ឋ ដែលតម្លៃទាបបំផុត​ ១០ ម៉ឺនរៀល និងតម្លៃ​ខ្ពស់បំផុត ៨​ លាន​រៀល។

គិតចាប់ពីឆ្នាំ១៩៩០ ដល់ខែមេសា ឆ្នាំ២០២៥ ម៉ូតូដែលបានចុះបញ្ជីសរុបមានចំនួន៦ ៦៨៤ ១៦៤គ្រឿង៕