កិច្ចប្រជុំកំពូល ពូទីន-ហ្សេលេនស្គី-ត្រាំ មិន​ទាន់​ចាប់​ផ្ដើម​ផង​ក៏​បរាជ័យ​បាត់​ហើយ

កិច្ចប្រជុំកំពូលដែលមានគោលបំណងចរចាសន្តិភាព​​​នៅ​អ៊ុយក្រែន បានដួលរលំ បន្ទាប់ពីប្រធានាធិបតីរុស្ស៊ីលោក វ្ល៉ាឌីមៀរ ពូទីន បានបដិសេធចូលរួម ដែលជំរុញ​ឲ្យ​ប្រធានាធិបតីអាមេរិកលោក ដូណាល់ ត្រាំ និង​ប្រធានាធិបតីអ៊ុយក្រែនលោក វ៉ូឡូឌីមៀរ ហ្សេលេនស្គី ក៏​​ប្រកាស​ដកខ្លួនចេញផងដែរ។

លោក ហ្សេលេនស្គី បានសម្តែងការខកចិត្តចំពោះការ​បាត់បង់​ឱកាសសម្រាប់ការចរចាដោយផ្ទាល់​​​នេះ ដែល​ដើម​ឡើយ​គ្រោង​ធ្វើ​នៅ​​ទីក្រុងអ៊ីស្តង់ប៊ុល​នា​ថ្ងៃ​ទី​១៥​ខែ​ឧសភា​ឆ្នាំ​២០២៥។

វិមានក្រឹមឡាំងបានបង្ហាញឈ្មោះគណៈប្រតិភូដែលនឹងត្រូវទៅជួបចរចាជាមួយភាគីអ៊ុយក្រែននៅ​ប្រទេសតួកគី ប៉ុន្តែអ្វីដែលគួរឲ្យកត់សម្គាល់ក្នុងនោះគឺថា មិនមានឈ្មោះលោក ពូទីន ទេ។ ផ្ទុយ​ទៅវិញ គណៈប្រតិភូនោះគឺនឹងត្រូវដឹកនាំដោយលោក Vladimir Medinsky ដែលជាជំនួយការប្រធានាធិបតី ហើយក៏មានការចូលរួមពីសំណាក់អនុរដ្ឋមន្ត្រីការបរទេស Mikhail Galuzin, អនុរដ្ឋមន្ត្រីការពារជាតិ Aleksandr Fomin និងមេចារកម្មយោធា Igor Kostyukov។

យោង​តាម​​​ការ​ចុះផ្សាយ​​កាលពី​ថ្ងៃ​ពុធ​របស់​ទីភ្នាក់ងារព័ត៌មាន Reuters លោក ត្រាំ ក៏​បាន​លុបចោល​នូវវត្តមានរបស់​ខ្លួន​ផងដែរ បន្ទាប់​ពី​​ភាគី​រុស្ស៊ី​ប្រកាស​ពី​ឈ្មោះ​​​គណៈ​ប្រតិភូ ដោយ​មិនមាន​វត្តមាន​របស់​លោក ពូទីន។

ការដួលរលំនៃកិច្ចប្រជុំកំពូល​កម្រិត​ខ្ពស់​នេះ គូសបញ្ជាក់ពីបញ្ហាប្រឈមក្នុងការសម្រេចបាននូវដំណោះស្រាយការទូតចំពោះជម្លោះដែលកំពុងបន្តនៅក្នុងប្រទេសអ៊ុយក្រែន។ ទន្ទឹម​នោះ សំណើរបស់លោក ហ្សេលេនស្គី សម្រាប់បទឈប់បាញ់រយៈពេល​៣០​ថ្ងៃ នៅតែមិនទាន់​​ត្រូវ​បាន​អនុវត្ត ដោយរុស្ស៊ី​បន្តបដិសេធគំនិតផ្តួចផ្តើមបែបនេះ ហើយ​លើកឡើងពីការព្រួយបារម្ភអំពីការ​ខាតបង់​យោធា​របស់​ខ្លួន​ដែលអាចកើតមាន។

សូម​ជម្រាប​ថា កិច្ចពិភាក្សានៅទីក្រុងអ៊ីស្តង់ប៊ុល ត្រូវបានផ្តួចផ្តើមដោយ​លោក ពូទីន កាល​ពី​ថ្ងៃទី​១១​​ឧសភា ហើយ​ទាំង​លោក ត្រាំ និង​លោក ហ្សេលេនស្គី បាន​បង្ហាញចំណាប់អារម្មណ៍ក្នុង​ការ​ចូលរួម។

លោក ពូទីន និង​លោក ហ្សេលេនស្គី មិនដែលជួបគ្នាផ្ទាល់ទេ ចាប់តាំងពីខែធ្នូឆ្នាំ២០១៩មក ប៉ុន្តែមន្ត្រីរុស្ស៊ីនិងអ៊ុយក្រែន បានធ្វើការចរចាដោយផ្ទាល់លើកចុងក្រោយក្នុងខែមីនាឆ្នាំ២០២២ នៅទីក្រុងអ៊ីស្តង់ប៊ុល ពោលគឺភ្លាមៗបន្ទាប់ពីទីក្រុងមូស្គូ បើកបើកប្រតិបត្តិការសឹកពេញទំហឹងលើប្រទេសជិតខាងរបស់ខ្លួន៕

ដោយ៖ ឈាង

ចុចអាន៖ គ្មានឈ្មោះ ពូទីន ទេ ក្នុងបញ្ជីគណៈប្រតិភូរុស្ស៊ី ដែលនឹងទៅចរចាជាមួយ អ៊ុយក្រែន នៅ តួកគី