តម្លៃហាងឆេងមាសបន្តធ្លាក់ចុះ ក្រោយសម្ពាធពន្ធអាមេរិក-ចិន ធូរស្រាល

តម្លៃហាងឆេងមាសបានបន្តធ្លាក់ចុះ បន្ទាប់ពីការធូរស្រាលសម្ពាធ​ពន្ធរវាងអាមេរិក និងចិន ក្នុងនោះអាមេរិកទម្លាក់ពន្ធលើទំនិញចិនពី ១៤៥% មកនៅ ៣០% ខណៈចិន​ទម្លាក់​ពន្ធ​លើ​ទំនិញអាមេរិកពី ១២៥% មកត្រឹម ១០%។

លោក ឡុង សំណាង ​ប្រធានផ្នែកប្រឹក្សាយោបល់ហិរញ្ញវត្ថុក្រុមហ៊ុន ​PP Link securities ប្រាប់​កម្ពុជាថ្មីនៅថ្ងៃទី ១៥ ខែឧសភា ២០២៥ថា៖​ «បន្ទាប់ពីការចរចាររវាង​សហរដ្ឋ​អាមេរិក​អំពី​សម្ពាធ​​​ពន្ធ ហើយក៏ទទួលបានផលវិជ្ជមាន ធ្វើឱ្យទំនោរតម្លៃហាងឆេងមាសធ្លាក់ចុះ សម្រាប់​មួយ​សប្ដាហ៍​​​នេះ នៅតែជាចំហាយ នៃផលវិជ្ជមាននៃការដាក់សម្ពាធពន្ធទៅវិញទៅមក»។

ម្យ៉ាងទៀត សន្ទុះកម្រិតប្រាក់ដុល្លារ មានកំណើនឡើងវិញក្នុងអត្រាការប្រាក់ ៤.៥០ ដែល​រក្សា​ទុក ខណៈអតិផរណា​របស់អាមេរិកនៅជាង ២% ដែលកម្រិតនេះអាច​នៅរក្សា​អត្រាការ​ប្រាក់​ដែល​​​ល្អសម្រាប់ខែនេះ ដូច្នេះតម្លៃមាសអាច​បន្តធ្លាក់ចុះបន្តិចទៀតក្នុងសប្ដាហ៍នេះ។

ហាងឆេងមាសបានបើកផ្សារនៅក្នុងតម្លៃ ៣៨២៧ ដុល្លារ​មួយតម្លឹង នៅថ្ងៃទី ១៥ ខែឧសភា ឆ្នាំ២០២៥ ខណៈតាមបណ្ដាហាងនានាក្នុងរាជធានីភ្នំពេញលក់ចេញក្នុងតម្លៃ ៣៨៨ ដុល្លារក្នុង​មួយ​ជី៕

អត្ថបទ៖ ឡេង ដេត