ព័ត៌មានអន្ដរជាតិ

អ្នកជំនាញថា វិស័យទេសចរណ៍ថៃដើរដល់ «ផ្លូវបំបែក» ក្រោយទេសចរអន្តរជាតិធ្លាក់ចុះ

បានផុស

២៣ វិនាទី មុន

នៅ

ថ្ងៃព្រហស្បតិ៍ ១២ មិថុនា ២០២៥

ដោយ

ប្រធានអាជ្ញាធរឧស្សាហកម្មថៃ (IEAT) និងជាអតីតប្រធានអាជ្ញាធរទេសចរណ៍ថៃ (TAT) លោក Yuthasak Supasorn បានឱ្យដឹងថា ឧស្សាហកម្មទេសចរណ៍ថៃបានដើរមកដល់ «ផ្លូវបំបែក» ក្រោយពេលអ្នកជំនាញជាច្រើនព្រមានពី «វិបត្តិទេសចរណ៍» ដោយសារតែការធ្លាក់ចុះនៃភ្ញៀវទេសចរអន្តរជាតិ។ នេះបើតាមការចុះផ្សាយរបស់កាសែត The Thaiger។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ខណៈវិស័យទេសចរណ៍ថៃបានឆ្លងកាត់វិបត្តិជាច្រើននាពេលកន្លងមក ឥឡូវនេះវាត្រូវបានប្រឈមមុខនឹងការផ្លាស់ប្តូររចនាសម្ព័ន្ធដ៏សំខាន់ ក៏ដូចជាការធ្លាក់ចុះគួរឱ្យកត់សម្គាល់នៃចំនួនភ្ញៀវទេសចរ។

លោក Supasorn បានថ្លែងថា៖ «ទេសចរណ៍ថៃបានក្លាយជាកត្តាជំរុញសេដ្ឋកិច្ចរបស់យើង ប៉ុន្តែឥឡូវនេះវាស្ថិតនៅផ្លូវបំបែក។ បរិយាកាសកំពុងផ្លាស់ប្តូរ ហើយតួលេខថ្មីៗបង្ហាញពីការធ្លាក់ចុះដ៏គួរឱ្យព្រួយបារម្ភ»។

យោងតាមទិន្នន័យសម្រាប់រយៈពេល ៥ ខែដំបូងនៃឆ្នាំ ២០២៥ ថៃបានទទួលភ្ញៀវទេសចរបរទេសចំនួន ១៤,៣ លាននាក់ ដោយធ្លាក់ចុះ ២,៧ ភាគរយ ធៀបនឹងរយៈពេលដូចគ្នាកាលពីឆ្នាំមុន។ ក្តីបារម្ភដ៏ធំបំផុតនោះ គឺការធ្លាក់ចុះយ៉ាងខ្លាំងនៃទេសចរពីទីផ្សារអាស៊ី ដែលរួមចំណែកជិត ៦៣ ភាគរយ នៃភ្ញៀវអន្តរជាតិ។

ចំនួនអ្នកទេសចរចិន ដែលជាប្រភពភ្ញៀវបរទេសដ៏ធំបំផុតសម្រាប់ថៃ បានធ្លាក់ចុះយ៉ាងគំហុកប្រមាណ ៣២,៧ ភាគរយ ពី ២,៩១ លាននាក់ ក្នុងឆ្នាំ ២០២៤ មកត្រឹម ១,៩៥ លាននាក់ នៅឆ្នាំនេះ។ វាជាលើកដំបូងហើយក្នុងរយៈពេល ១២ ឆ្នាំ ដែលគេរំពឹងថា ចំនួនភ្ញៀវទេសចរចិនទៅលេងថៃនឹងធ្លាក់ចុះក្រោម ៥ លាននាក់ និងឆ្ងាយខ្លាំងពីកម្រិតខ្ពស់បំផុត ១១,១ លាននាក់ ក្នុងឆ្នាំ ២០១៩។

ប្រធានអាជ្ញាធរឧស្សាហកម្មថៃ (IEAT) និងជាអតីតប្រធានអាជ្ញាធរទេសចរណ៍ថៃ (TAT) លោក Yuthasak Supasorn

ការធ្លាក់ចុះនៃភ្ញៀវទេសចរចិន មួយភាគធំបណ្ដាលមកពីកង្វល់សុវត្ថិភាពផ្សេងៗ រួមទាំងការឆបោកប្រាស់ និងការជួញដូរមនុស្សជាដើម។ យោងតាមការស្ទង់មតិរបស់ Dragon Trail International ចំនួនភ្ញៀវទេសចរចិនដែលបង្ហាញពីការព្រួយបារម្ភអំពីការធ្វើដំណើរទៅថៃ បានកើនឡើងទ្វេដង។

ដើម្បីបញ្ច្រាសនិន្នាការនេះ លោក Supasorn បានអំពាវនាវឱ្យមានការកែប្រែដ៏សំខាន់ក្នុងវិស័យទេសចរណ៍ថៃ ដោយផ្តោតលើគុណភាព និរន្តរភាព និងការធ្វើពិពិធកម្មទេសចរណ៍។ លោកថ្លែងយ៉ាងដូច្នេះថា៖ «យើងត្រូវបង្កើតយុគសម័យថ្មីនៃវិស័យទេសចរណ៍ ដោយផ្តោតលើគោលដៅ គុណភាព និងអនាគតកាន់តែល្អប្រសើរ»។

យុទ្ធសាស្ត្រដែលបានស្នើឡើងរួមមានការពន្លឿនការត្រឡប់មកវិញនៃភ្ញៀវទេសចរចិន ខណៈកំណត់គោលដៅទាក់ទាញភ្ញៀវពីទីផ្សារថ្មីដូចជាឥណ្ឌា ដែលរំពឹងថានឹងវ៉ាដាច់រុស្ស៊ី ក្លាយជាប្រភពទេសចរធំជាងគេទី៣ ដោយសារការអនុវត្តគោលនយោបាយលើកលែងទិដ្ឋាការ។ ក្រៅពីនេះ លោក Supasorn ក៏បានសង្កត់ធ្ងន់ផងដែរ អំពីសារៈសំខាន់នៃការទាក់ទាញភ្ញៀវទេសចរដែលមានប្រាក់ចំណូលខ្ពស់ និងការលើកកម្ពស់ទេសចរណ៍ក្នុងស្រុក ដែលជាលំហូរប្រាក់ចំណូលមានស្ថេរភាព។

ជាមួយគ្នានោះ ថៃត្រូវតែកែលម្អការប្រកួតប្រជែងជាសាកលរបស់ខ្លួនដែលកំពុងតែធ្លាក់ចុះ ដូចអ្វីដែលបានបង្ហាញក្នុងសន្ទស្សន៍អភិវឌ្ឍន៍ទេសចរណ៍ និងទេសចរណ៍ឆ្នាំ ២០២៤ ថា ថៃបានធ្លាក់ចុះចំណាត់ថ្នាក់ចំនួន ១២ លេខ ដោយឈរនៅលេខរៀងទី ៤៧ លើពិភពលោក៕