ព័ត៌មានអន្ដរជាតិ

ទំនុកចិត្តឧស្សាហកម្មថៃ ធ្លាក់ចុះទាប ជុំវិញពន្ធខ្ពស់របស់ ត្រាំ

បានផុស

១ year មុន

នៅ

ថ្ងៃព្រហស្បតិ៍ ១៧ កក្កដា ២០២៥

ដោយ

សហព័ន្ធឧស្សាហកម្មថៃ (FTI) បានឱ្យដឹងកាលពីថ្ងៃពុធថា សន្ទស្សន៍ទំនុកចិត្តឧស្សាហកម្មរបស់ប្រទេសថៃ បានធ្លាក់ចុះក្នុងរយៈពេល ៤ ខែជាប់ៗគ្នានៅខែមិថុនា ដោយឈានដល់កម្រិតទាបបំផុតក្នុងរយៈពេល ៩ ខែ ដោយសារការព្រួយបារម្ភអំពីផលប៉ះពាល់នៃពន្ធខ្ពស់របស់ប្រធានាធិបតីសហរដ្ឋអាមេរិក លោក ដូណាល់ ត្រាំ។ នេះបើតាមការចុះផ្សាយរបស់កាសែតបាងកកប៉ុស្តិ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

FTI បាននិយាយថា សន្ទស្សន៍ទំនុកចិត្តឧស្សាហកម្មថៃ បានធ្លាក់ចុះមកត្រឹម ៨៧,៧ ពិន្ទុ នៅខែមិថុនា ពី ៨៨,១ ពិន្ទុ នៅខែ ឧសភា ខណៈការស្ទង់មតិសម្រាប់សន្ទស្សន៍នេះ ធ្វើឡើងតាំងតែពីមុនលោក ត្រាំ ប្រកាសពន្ធខ្ពស់កាលពីសប្ដាហ៍មុនទៅទៀត។ លោក ត្រាំ មិនកែប្រែអត្រាពន្ធ ៣៦ ភាគរយ លើប្រទេសថៃនោះទេ ហើយកំណត់នឹងចូលជាធរមាននៅថ្ងៃទី ១ សីហា។

ក្រោយការប្រកាសរបស់លោក ត្រាំ អ្នកជំនាញក្នុងស្រុកថៃបានព្រមានថា ពន្ធ ៣៦ ភាគរយ នឹងធ្វើឱ្យថៃបាត់បង់ការប្រកួតប្រជែង និងធ្លាក់ចុះការវិនិយោគ ជាពិសេសលើមុខទំនិញនាំចេញទៅអាមេរិក។ នោះនឹងធ្វើឱ្យប៉ះពាល់ដល់ទំនុកវិនិយោគិន ហើយបង្កលទ្ធភាពនៃការរើទីតាំងផលិតកម្មពីថៃ ទៅកាន់បណ្ដាប្រទេសជាប់ពន្ធទាប ជាពិសេសវៀតណាម (២០ ភាគរយ) ឥណ្ឌូណេស៊ី (១៩ ភាគរយ) និងបណ្ដាប្រទេសជាប់ពន្ធមូលដ្ឋានត្រឹម ១០ ភាគរយ ជាពិសេសនៅអាមេរិកខាងត្បូង។

យោងតាមទិន្នន័យពីរដ្ឋាភិបាលអាមេរិក ថៃបាននាំចេញទំនិញប្រមាណ ៦៣,៣ ប៊ីលានដុល្លារ ទៅអាមេរិកកាលពីឆ្នាំមុន និងទទួលបានអតិរេកពាណិជ្ជកម្មប្រមាណ ៤៥,៦ ប៊ីលានដុល្លារ។ នេះបង្ហាញថា សហរដ្ឋអាមេរិកគឺជាទីផ្សារនាំចេញដ៏ធំសម្រាប់ថៃ។

បច្ចុប្បន្ននេះ សេដ្ឋកិច្ចថៃប្រឈមមុខនឹងបញ្ហាផ្សេងៗរួចហើយ រួមទាំងកម្សោយតម្រូវការ កំណើនបំណុលគ្រួសារ វិបត្តិវិស័យទេសចរណ៍ និងភាពមិនប្រាកដប្រជានៃពាណិជ្ជកម្មសកល។

ក្រៅពីនេះ អនុប្រធាន FTI លោក Nava Chantanasurakon បាននិយាយថា ភាពតានតឹងព្រំដែនជាមួយកម្ពុជាគឺជាកត្តារួមចំណែកលើការធ្លាក់ចុះនៃទំនុកចិត្តឧស្សាហកម្មថៃផងដែរ ដោយសារតែការរាំងស្ទះនៃដំណឹងជញ្ជូនពាណិជ្ជកម្មរវាងប្រទេសទាំង២ និងការហាមឃាត់ការនាំចូលរបស់កម្ពុជានូវប្រេង និងឧស្ម័នឥន្ធនៈគ្រប់ប្រភេទរបស់ថៃ៕