ថៃកំណត់គោលដៅ​ភ្ញៀវទេសចរអាស៊ាន និងមជ្ឈិមបូព៌ា ដើម្បីប៉ះប៉ូវភ្ញៀវពីចិន ដែលធ្លាក់ចុះ

ប្រទេសថៃកំណត់គោលដៅជំរុញ​ការមកកម្សាន្ត និងការចំណាយទេសចរណ៍របស់ភ្ញៀវទេសចរមក​ពីតំបន់អាស៊ីអាគ្នេយ៍ និងមញ្ឈិមបូព៌ា ដើម្បីប៉ះប៉ូវការធ្លាក់ចុះនៃភ្ញៀវពីចិន ជុំវិញកង្វល់សុវត្ថិភាព និងបញ្ហា​ផ្សេងៗ។ នេះបើតាមការចុះផ្សាយរបស់កាសែត South China Morning Post (SCMP)។

ប្រធាន​អាជ្ញាធរទេសចរណ៍​ថៃ (TAT) លោកស្រី Thapanee Khiatpaibool បាននិយាយកាលពីថ្ងៃចន្ទថា៖ «ទីផ្សារមជ្ឈិមបូព៌ាគឺជាកត្តា​ជួយជំរុញប្រាក់ចំណូល​ពីទេសចរណ៍ ​ដោយ​បច្ចុប្បន្នមានកំណើនប្រហែល ១៧-១៨ ភាគរយ។ ​យើង​ត្រូវ​បង្កើន​បរិមាណនៃការ​​មក​ដល់​ពី​មជ្ឈិមបូព៌ា និង​ជើងហោះហើររបស់​ក្រុមហ៊ុន​អាកាសចរណ៍»។

ការនិយាយបែបនេះ ធ្វើឡើង​ក្រោយ​ TAT ទម្លាក់ការព្យាករ​ភ្ញៀវទេសចរអន្តរជាតិ​ប្រចាំឆ្នាំមកត្រឹម ៣៥ លាន​នាក់ ពី ៤០ លាន​នាក់ ដោយសារតែកម្សោយខ្លាំងជាងការរំពឹង​ទុកនៃ​ចំនួន​ភ្ញៀវទេសចរចិន​។ ដោយសារតែបញ្ហា​នេះ TAT បាន​និយាយ​ថា ចំណូលពីវិស័យទេសចរណ៍នឹង​ខកការរំពឹងទុក ៣ ទ្រីលា​នបាត ដោយ​ទទួល​បាន​ត្រឹមតែ ២,៨ ទ្រីលាន​បាត (៨៦ ប៊ីលាន​ដុល្លារ)។

​ទិន្នន័យ​ពីក្រសួងទេសចរណ៍ និងកីឡាថៃ បាន​បង្ហាញថា ​ភ្ញៀវទេសចរចិន​ទៅលេងថៃនៅឆមាសទី ១ ឆ្នាំនេះ មាន​ត្រឹមតែ ២,៣ លាន​នាក់ ដោយ​ធ្លាក់ចុះពី ៣,៤ លាន​នាក់ ក្នុងរយៈពេលដូចគ្នាកាលពីឆ្នាំមុន។ ​

កន្លងមក មាន​សេចក្ដីរាយការណ៍ថា ការធ្លាក់ចុះនៃភ្ញៀវទេសចរអន្តរជាតិ ដែល​បង្កជាក្ដីបារម្ភវិបត្តិទេសចរណ៍ថៃ ដោយសារតែកង្វល់សុវត្ថិភាព ពាក់ព័ន្ធនឹង​ការជួញដូរមនុស្ស សកម្មភាពសង្ស័យពាក់ព័ន្ធភេរវកម្ម គ្រោះរញ្ជួយដី ការផ្លាស់ប្ដូរចំណង់ចំណូលចិត្តរបស់ភ្ញៀវ និងការប្រកួតប្រជែងពីប្រទេសទិសដៅទេសសចរណ៍ផ្សេងទៀតជាដើម។ ​

លោកស្រី Thapanee បាននិយាយថា ការទាក់ទាញភ្ញៀវទេសចរចិននៅតែជាអាទិភាព​ ប៉ុន្តែទីភ្នាក់ងារ​ខ្លួន​​កំពុងផ្តោតលើទីផ្សារផ្សេងទៀតផងដែរ រួមទាំង​អូសេអានី និងអាស៊ីអាគ្នេយ៍ ដែល​ជា​ទីផ្សារសំខាន់សម្រាប់ជំរុញការមកដល់នៃភ្ញៀវ។

គួរគូសបញ្ជាក់ថា ឧស្សាហកម្មទេសចរណ៍ រួមចំណែកប្រហែល ១២ ភាគរយ នៃផលិតផលក្នុងស្រុកសរុបរបស់​ថៃ។ គិតពីដើមឆ្នាំ មកដល់ថ្ងៃទី ៦ កក្កដា ថៃទទួល​ភ្ញៀវទេសចរអន្តរជាតិ ១៧,២ លាន​នាក់ ដោយធ្លាក់ចុះ ៥,១ ភាគរយ ធៀប​នឹង​រយៈពេលដូចគ្នាកាលពីឆ្នាំមុន ខណៈវិស័យទេសចរណ៍ទាំងមូលបង្កើតប្រាក់ចំណូលប្រមាណ ៧៩៤,៧ ប៊ីលា​នដុល្លារ ក្នុងរយៈពេលដដែល​។ នេះបើតាមការឱ្យដឹងរបស់ក្រសួងទេសចរណ៍ និងកីឡា​ថៃ៕