ហ្វេនផ្អើលព្រាត ស្ងាត់ៗ Park Shin Hye ប្រកាសពិធីរៀប​ការ

តារា​សម្ដែងស្រីជួរមុខកូរ៉េខាងត្បូង Park Shin Hye និង​តារា​សម្ដែងប្រុស Choi Tae Joon បានប្រកាស​ពិធី​រៀប​ការនៅប៉ុន្មានខែខាងមុខនេះ ខណៈពួកគេក៏កំពុង​ពពោះ​កូន​ដំបូងផងដែរ។

យោងតាមសេចក្តីថ្លែងការណ៍របស់ផលិតកម្ម SALT Entertainment ដែលជាភ្នាក់ងាររបស់ Park Shin Hye បានឱ្យដឹងថា គូស្នេហ៍មួយគូនេះ នឹងរៀបអាពាហ៍ពិពាហ៍នៅថ្ងៃទី ២២ ខែមករា ឆ្នាំ ២០២២ ក្នុង​ទីក្រុង​សេអ៊ូល។

ផលិតកម្មបញ្ជាក់បន្ថែមថា Park Shin Hye និង Choi Tae Joon បានសម្រេចចិត្តរៀបការហើយ បន្ទាប់ពីអ្នក​ទាំង​ពីរ​បាន​ទាក់ទងគ្នាជិត ៥ឆ្នាំ ពោលចាប់តាំងពី​ឆ្នាំ ២០១៧ មកម្ល៉េះ។ លើសពីនេះ ដោយសារគូស្នេហ៍នេះ កំពុងមានកូនដំបូងក្នុងផ្ទៃផង ទើបពួកគេប្រញាប់រៀបការឱ្យបានលឿន។

ដោយឡែកសាមីខ្លួនខាងស្រី  Park Shin Hye ក៏បានបង្ហោះសារមួយនៅលើ fancafe ផ្ទាល់ខ្លួនរបស់នាង ដោយនិយាយថា “ខ្ញុំ​នឹង​រៀប​ការ​ជាមួយ​មិត្ត​យល់ចិត្តម្នាក់​ដែល​ខ្ញុំ​បាន​ស្គាល់​ជា​យូរ​មក​ហើយ។ ខ្ញុំ​នឹង​ចាប់​ផ្តើម​ជីវិត​ជា​ប្តី​ប្រពន្ធ​ជា​មួយគាត់ ដែលជា​អ្នកអាច​​ជួយ​មើលថែខ្ញុំ​ពេញមួយ​ជីវិត ហើយអាចទទួល​ចំណុច​ខ្វះខាត​ដែល​ខ្ញុំ​មាន”។

បន្ថែមពីលើនេះ នាងបានថ្លែងអំណរគុណចំពោះហ្វេនៗ ដែលស្រឡាញ់ គាំទ្រ និងចាំផ្ដល់កម្លាំងចិត្តដល់នាងកន្លងមក គឺតាំងពីពេលនាងចូលសិល្បៈដំបូងៗ។  

គួរបញ្ជាក់ថា Park Shin Hye និង Choi Tae Joon ធ្លាប់ត្រូវ​បានសារព៍ត៌មានចុះផ្សាយ​ថា​បាន​ណាត់​ជួប​គ្នា​ ​តាំងពីខែ​មីនា ​ឆ្នាំ ២០១៨ ប៉ុន្តែពេលនោះពួក​គេ​បដិសេធ​ព័ត៌មាន​នេះ។​ ​ក្រោយ​ប្រកាសពិធីអាពាហ៍ពិពាហ៍ ពួកគេ​បញ្ជាក់​ថា ​ខ្លួន​ចាប់​ផ្ដើម​​ទំនាក់ទំនង​គ្នាជាគូសង្សារតាំងពីឆ្នាំ ២០១៧ មកម្ល៉េះ៕

ប្រែសម្រួល៖ សន្យា

ចុចអាន៖ BTS ក្លាយជាក្រុមតារាចម្រៀងអាស៊ីដំបូងគេ ឈ្នះពានរង្វាន់កំពូលក្នុងកម្មវិធី AMA

ចុចអាន៖ Jennifer Aniston ថតឈុតអាក្រាតកាយទាំងស្រុង ក្នុងខ្សែភាពយន្តថ្មី