អាមេរិក​ ​បង្កើត​អាវុធ​ឡាស៊ែរ​សាហាវ​បំផុតលើលោក អាចបំផ្ទុះមីស៊ីល លឿងជាងសំឡេងលើមេឃរបស់ ចិន

យោធា​អាមេរិក​បានបញ្ជា​ឲ្យក្រុមហ៊ុន General Atomics និងក្រុមហ៊ុន Boeing ​សហការ​គ្នា​បង្កើត​អាវុធឡាស៊ែរ​​ដ៏​មាន​ឥទ្ធិពល​បំផុត​របស់​ពិភពលោក ។

ក្រុមហ៊ុន General Atomics នឹងទទួលខុសត្រូវក្នុងការអភិវឌ្ឍន៍អាវុធឡាស៊ែរ ខណៈពេលដែលក្រុមហ៊ុន Boeing នឹងស្វែងរកការរួមបញ្ចូលសមត្ថភាព និងបច្ចេកវិទ្យាសំខាន់ៗលើអាវុធឡាស៊ែរកម្រិត ៣០០ គីឡូវ៉ាត់មួយនេះ ។

លោក Scott Forney ប្រធានក្រុមហ៊ុន General Atomics បាននិយាយនៅក្នុងសេចក្តីថ្លែងការណ៍មួយថា “គំរូប្រព័ន្ធអាវុធឡាស៊ែរដែលមានថាមពលខ្ពស់ និងរូបរាងតូចដែលក្រុមហ៊ុននឹងផលិត គឺមានសមត្ថភាពសាហាវជាងអ្វីទាំងអស់ដែលយើងមានរហូតមកដល់បច្ចុប្បន្ននេះ” ។

ប្រព័ន្ធអាវុធឡាស៊ែរកម្រិត ៣០០ គីឡូវ៉ាត់មួយនេះ មានសមត្ថភាពបំផ្ទុះមីស៊ីលហោះពីលើមេឃរបស់សត្រូវ ហើយត្រូវបានគេចាត់ទុកថា មានបច្ចេកវិទ្យាចាប់ប្រព័ន្ធមីស៊ីលលឿនជាងសំឡេងដែលកំពុងតែអភិវឌ្ឍយ៉ាងឆាប់រហ័សរបស់ប្រទេសចិន ។

ទន្ទឹមនោះ លោកឧត្តមសេនីយ John Hyten អគ្គសេនាធិការចម្រុះអាមេរិក បាននិយាយថា ប្រទេសចិនបានធ្វើតេស្តមីស៊ីលលឿនជាងសំឡេងរាប់រយដង និងមានសមត្ថភាពក្នុងការគេចពីប្រព័ន្ធការពារមីស៊ីលរបស់សហរដ្ឋអាមេរិក ។

លោកបញ្ជាក់ថា តាមរយៈប្រព័ន្ធថាមពលដ៏ល្អឥតខ្ចោះ ប្រព័ន្ធការពារឡាស៊ែរទាំងនេះអាចចល័តបានខ្ពស់ ដោយផ្តល់ឲ្យសហរដ្ឋអាមេរិកនូវអត្ថប្រយោជន៍ការពារដ៏សំខាន់ប្រឆាំងនឹងមីស៊ីលសត្រូវដែលមានល្បឿនលឿនជាងសំឡេង ។

គួរបញ្ជាក់ថា ក្នុងឆ្នាំ ២០១៤ កងទ័ពជើងទឹកសហរដ្ឋអាមេរិកបានដាក់ពង្រាយប្រព័ន្ធឡាស៊ែរកម្រិត ៣០ គីឡូវ៉ាត់ ហើយកាលពីឆ្នាំមុនពួកគេក៏បានបង្ហាញពីប្រព័ន្ធអាវុធឡាស៊ែរមួយទៀតផងដែរកម្រិត ១៥០ គីឡូវ៉ាត់ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ អាមេរិក ផ្តល់ជំនួយយោធាប្រចាំឆ្នាំជា មីស៊ីលល្បឿនលឿនជាងសំឡេងដល់ តៃវ៉ាន់ ដើម្បីទប់ទល់ ចិន