វៀតណាមចេញពិន័យថ្មី ​រឹតបន្តឹងទំនិញឆ្លងកាត់ដើម្បីផ្គាប់ការទាមទារពន្ធរបស់​អាមេរិក ​

វៀតណាមកំពុងត្រៀមចេញការផាកពិន័យ​តឹងរុឹងថ្មី ដើម្បីបង្ក្រាបការក្លែងបន្លំពាណិជ្ជកម្ម និងការដឹកជញ្ជូន «ទំនិញឆ្លងកាត់» ខុសច្បាប់ ហើយបានផ្តោតលើការត្រួតពិនិត្យ​លើផលិតផលចិន ​ដើម្បីជាផ្នែកមួយ​នៃកិច្ចខិតខំប្រឹងប្រែង​តាមការទាមទារ​ជុំវិញបញ្ហា​ពន្ធគយរបស់សហរដ្ឋអាមេរិក។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ ដែលស្រង់ព័ត៌មាន​ពីឯកសារដែលខ្លួន​បាន​ឃើញ​។

វាកើតឡើងក្រោយ​សហរដ្ឋអាមេរិក និងវៀតណាម កាលពីសប្ដាហ៍​មុន បាន​ប្រកាសកិច្ចព្រមព្រៀង​ពាណិជ្ជកម្មពាក់ព័ន្ធពន្ធគយ ដោយ​អាមេរិក​ដាក់ពន្ធ ២០ ភាគរយ លើគ្រប់មុខទំនិញ​វៀតណាម និង ៤០ ភាគរយ លើ​ទំនិញឆ្លងកាត់វៀតណាម។

យោងតាមឯកសាររបស់ក្រសួងពាណិជ្ជកម្ម​ចុះថ្ងៃទី ៣ ខែកក្កដា​ រដ្ឋាភិបាលវៀតណាមនឹងចេញក្រឹត្យថ្មីមួយ ដែលនឹង​បន្ថែមកម្រិតទណ្ឌកម្ម សម្រាប់ការក្លែងបន្លំប្រភពដើមទំនិញ និងដាក់ចេញនូវវិធានការ និងការត្រួតពិនិត្យយ៉ាងតឹងរុឹង ដើម្បីការពារការក្លែងបន្លំ។ ថ្ងៃទី ៣ កក្កដា ជាថ្ងៃដែលវៀតណាម សម្រេច​បាន​កិច្ចព្រមព្រៀងពាណិជ្ជកម្មជាមួយ ត្រាំ​។

ឯកសារដដែល ចាត់ឱ្យ​អាជ្ញាធរវៀតណាម​ពង្រឹងការត្រួតពិនិត្យលើការនាំចេញទៅកាន់សហរដ្ឋអាមេរិក ជាពិសេសលើមុខទំនិញ​ដែល​ប្រឈមមុខនឹង​ការក្លែងបន្លំពាណិជ្ជកម្ម ឬទំនិញចិន ដែល​ស្ថិតនៅក្រោមវិធានការ​ការពារ​ពាណិជ្ជកម្មរបស់សហរដ្ឋអាមេរិក ឬសហភាពអឺរ៉ុប។ ​ជាឧទាហរណ៍ ឯកសារ​ដដែល​បានលើកឡើងពីគ្រឿងសង្ហារឹមឈើ ក្តារបន្ទះ គ្រឿងបន្លាស់ម៉ាស៊ីនដែក កង់ ថ្ម កាសឥតខ្សែ និងផលិតផលអេឡិចត្រូនិកផ្សេងទៀត​។

គួរគូសបញ្ជាក់ថា ចំណាត់ការរបស់អាជ្ញាធរវៀតណាមនាពេលកន្លង ដែលរួមមាន​ការបង្រ្កាបលើការក្លែងបន្លំពាណិជ្ជកម្ម និងទំនិញនាំចូលក្លែងក្លែង ត្រូវបានគេមើលឃើញថាជា​វិធានការផ្គាប់ចិត្ត ត្រាំ ដែលចោទប្រកាន់វៀតណាម ថាជាមជ្ឍមណ្ឌលឆ្លងកាត់សម្រាប់ទំនិញចិន​នាពេល​កន្លង​មក​។ ​អាមេរិកចោទថា ​ទំនិញ​​មួយចំនួន​ដាក់​ស្លាក «ផលិតនៅ​វៀតណាម​» ​ដើម្បី​អនុញ្ញាតឱ្យ​ក្រុមហ៊ុន​នាំចេញ​ចិន ទាញយកអត្ថប្រយោជន៍​ពន្ធទាបរបស់​វៀតណាម និង​​បញ្ចៀសការយកពន្ធខ្ពស់​ ដែល​អាមេរិ​កដាក់លើចិន​៕