ឥណ្ឌូណេស៊ី​ចរចា​ពន្ធ​ជាមួយ​អាមេរិក ដោយផ្ដោត​លើ​​ភាពជាដៃគូពាណិជ្ជកម្ម​​​ក្នុងវិស័យរ៉ែសំខាន់

ឥណ្ឌូណេស៊ី​ចាប់ផ្ដើមចរចាពន្ធដំណាក់កាលថ្មី​ជាមួយសហរដ្ឋអាមេរិក ក្រោយប្រធានាធិបតី ដូណាល់ ត្រាំ ប្រកាសអត្រាពន្ធ ៣២ ភាគរយ លើប្រទេសនេះ ដែល​បង្ក​​ជាក្ដីបារម្ភសេដ្ឋកិច្ចពីគ្រប់ភាគីពាក់ព័ន្ធ​​ និងការភ្ញាក់ផ្អើលពីមន្រ្តីជាន់ខ្ពស់ ដែល​​ខកចិត្ត​នឹង​សេចក្ដីសម្រេច​របស់អាមេរិក ទោះឥណ្ឌូណេស៊ីផ្ដល់សំណើរសក្តានុពលផ្សេងៗ។ ​

ប្រធានក្រុម​អ្នកចរចា និងជារដ្ឋមន្ត្រីសេដ្ឋកិច្ចឥណ្ឌូណេស៊ី​ លោក Airlangga Hartarto បានប្រាប់​រ៉យទ័រ​ថា​ លោកបានជួបជាមួយរដ្ឋមន្ត្រីក្រសួងពាណិជ្ជកម្មអាមេរិក​ លោក Howard Lutnick និងប្រធាន​តំណាងពាណិជ្ជកម្មអាមេរិក លោក Jamieson Greer ​នៅទីក្រុងវ៉ាស៊ីនតោន ឌីស៊ី កាលពីថ្ងៃពុធ។ នេះបើតាមសេចក្ដីថ្លែងការណ៍របស់ក្រសួងសេដ្ឋកិច្ចឥណ្ឌូណេស៊ី។ ​

ការចរចាបាន​ប្រព្រឹត្តទៅដោយ​វិជ្ជមាន ដោយ​ភាគីទាំង២​ បាន​ផ្ដោតលើប្រធានបទសំខាន់ៗរួមមាន​របាំងពាណិជ្ជកម្មពន្ធគយ និងមិនមែនពន្ធគយ ក៏ដូចជាភាពជាដៃគូសម្រាប់ពាណិជ្ជកម្មលើរ៉ែសំខាន់ៗរបស់ឥណ្ឌូណេស៊ី។

លោក Airlangga បាន​និយាយក្នុងសេចក្ដីថ្លែងការណ៍នោះថា ​ឥណ្ឌូណេស៊ី និងអាមេរិក​ នឹង​បង្កើនការចរចាក្នុងរយៈពេល​ ៣ សប្ដាហ៍ទៅមុខ មុនពេល​ពន្ធខ្ពស់របស់ ត្រាំ ចូលជាធរមាន​នៅថ្ងៃទី ១ សីហា។ លោក​បន្តយ៉ាងដូច្នេះថា៖ «យើងមានការយល់ដឹងស្រដៀងគ្នារួចទៅហើយជាមួយសហរដ្ឋអាមេរិកអំពី​ការចរចា​។ ទៅមុខទៀត​ យើងនឹងធ្វើការបញ្ចប់ការចរចាដោយផ្អែកលើផលប្រយោជន៍ទៅវិញទៅមក»។

គួរគូសបញ្ជាក់ថា កន្លងមក​ មាន​សេចក្ដីរាយការណ៍ថា ឥណ្ឌូណេស៊ី និង​អាមេរិក កំពុងស្វែងរកការពង្រីក​ភាពជាដៃគូ​ទ្វេភាគីក្នុងវិស័យរ៉ែ​សំខាន់ៗរបស់​ឥណ្ឌូណេស៊ី ដែល​សម្បូរទៅដោយ​​នីកែល ទង់ដែង និងកូបាល់ ពោលគឺពពួករ៉ែប្រើក្នុងបច្ចេកវិទ្យាសំខាន់ៗ រួមទាំងរថយន្តអគ្គិសនី។

​ក្រៅពីនេះ ក្នុងការចរចាពន្ធ ឥណ្ឌូណេស៊ីបាន​ដាក់សំណើ​កាត់បន្ថយពន្ធលើផលិតផលអាមេរិកឱ្យជិតសូន្យ ខណៈប្ដេជ្ញា​បង្កើនការទិញ​ ឬនាំចូលពីសហរដ្ឋអាមេរិក​ឱ្យ​បាន​ ៣៤ ប៊ីលាន​ដុល្លារ ដើម្បីកាត់បន្ថយឱនភាព​ពាណិជ្ជកម្មសម្រាប់អាមេរិក។

ថ្មីៗនេះ ក្រុមហ៊ុនឥណ្ឌូណេស៊ីជាច្រើនបានចុះហត្ថលេខាលើកិច្ចព្រមព្រៀង​ជាមួយសមភាគី​អាមេរិក ដើម្បីបង្កើនការទិញ​ថាមពល ស្រូវសាលី ពោត និងកប្បាស ក្នុងចំណោម​ទំនិញដទៃទៀត៕

​