សហរដ្ឋអាមេរិក មានអ្នកឆ្លងវីរុសកូរ៉ូណាបំប្លែងខ្លួនជិត ៤ពាន់ករណី

យោងតាមទិន្នន័យចុងក្រោយរបស់មជ្ឈមណ្ឌលគ្រប់គ្រងនិងបង្ការជំងឺសហរដ្ឋអាមេរិក (CDC) បានឲ្យដឹងថា មានករណីឆ្លងវីរុសកូរ៉ូណាបំប្លែងខ្លួនជិត៤,០០០ករណី ត្រូវបានរាយការណ៍នៅសហរដ្ឋអាមេរិកគិតត្រឹមថ្ងៃព្រហស្បតិ៍ (ថ្ងៃសុក្រនៅកម្ពុជា)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ភាគច្រើននៃករណីទាំងនេះពោលគឺ៣,៧០១ករណី ត្រូវបានបង្កឡើងដោយវីរុស B.1.1.7 ដែលត្រូវបានរកឃើញដំបូងនៅក្នុងប្រទេសអង់គ្លេស។

ស្របពេលជាមួយគ្នានោះ មានករណីឆ្លងវីរុសអាហ្វ្រិកខាងត្បូង B.1.351 ចំនួន១០៨ករណីនិងវីរុសប្រេស៊ីល P.1 ចំនួន១៧ករណី។ 

ករណីដែលត្រូវបានកំណត់ គឺផ្អែកលើសំណាកវិជ្ជមាននៃវីរុស SARS-CoV-2 ហើយមិនរាប់បញ្ចូលការឆ្លងវីរុសផ្សេងៗទៀតដែលកំពុងរាលដាលក្នុងសហរដ្ឋអាមេរិកនោះទេ។

CDC និងដៃគូរបស់ខ្លួនកំពុងពិនិត្យមើលសំណាកជាបន្តបន្ទាប់ ដែលមាននៅក្នុងមន្ទីរពិសោធន៍ទូទាំងប្រទេស។ ចំនួនវីរុសបំប្លែងខ្លួនត្រូវបានរាយការណ៍ថា ទំនងជានឹងកើនឡើងនៅពេលដែលសំណាកកាន់តែច្រើន ត្រូវបានពិនិត្យរួច។

ក្រុមអ្នកជំនាញកំពុងខ្វាយខ្វល់ អំពីវីរុសគួរឲ្យព្រួយបារម្ភមួយចំនួនទៀតដែលកំពុងមានវត្តមាននៅតាមទីកន្លែងនានាដូចជានៅ កាលីហ្វ័រនីញ៉ានិងញូវយ៉កជាដើម។

បើនិយាយពីជំងឺកូវីដ១៩វិញ សហរដ្ឋអាមេរិកមានការឆ្លងលើស២៩.៣៣លានករណី និងមានអ្នកស្លាប់ច្រើនជាង៥៣២,១០០នាក់គិតត្រឹមរសៀលថ្ងៃសុក្រ៕

ប្រែសម្រួលដោយ៖ Vann Vann

ប្រភព៖ Xinhua

ចុចអាន៖ វ៉ាក់សាំង Novavax មានប្រសិទ្ធភាពសឹង១០០ភាគរយប្រឆាំងកូវីដ និង៨៦ភាគរយប្រឆាំងវីរុសបំប្លែងខ្លួន

ចុចអាន៖ សូមប្រុងប្រយ័ត្ន! វៀតណាម ប្រកាសរកឃើញវីរុសបំប្លែងខ្លួន ៥ប្រភេទផ្សេងគ្នានៅក្នុងប្រទេស