អ្នកជំនាញថៃព្រមាន​ពីការគំរាមកំហែងសេដ្ឋកិច្ច​ធំៗ​ បើការចរចាពន្ធ ត្រាំ បរាជ័យ

សេដ្ឋកិច្ចរបស់ប្រទេសថៃ អាចប្រឈមនឹងការគំរាមកំហែងផ្សេងៗ ​ប្រសិន​បើរដ្ឋាភិបាល​ថៃបរាជ័យក្នុងការចរចារ​ជាមួយ​សហរដ្ឋអាមេរិក ពាក់ព័ន្ធនឹងពន្ធ ៣៦ ភាគរយ របស់ប្រធានាធិបតី ដូណាល់ ត្រាំ ដែល​កំណត់ចូលជាធរមាន​នៅថ្ងៃទី ១ សីហា។ ​នេះបើតាមការចុះផ្សាយកាសែត The Nation។

មជ្ឈមណ្ឌលស៊ើបការណ៍សម្ងាត់សេដ្ឋកិច្ចរបស់ធនាគារ Siam Commercial Bank (SCB EIC) ​បាន​និយាយថា ការពន្យារពេលក្នុងដំណើរការចរចា អាចជះឥទ្ធិពលយ៉ាងធ្ងន់ធ្ងរដល់វិស័យផ្សេងៗនៃសេដ្ឋកិច្ចថៃ ជាពិសេសប្រសិនបើសហរដ្ឋអាមេរិកដាក់ពន្ធគយខ្ពស់លើ​ថៃ ​ធៀបនឹងដៃគូប្រកួតប្រជែងសំខាន់ៗដូចជាវៀតណាម កូរ៉េខាងត្បូង និងជប៉ុនជាដើម​។

​ការគំរាមកំហែងធំៗ​សម្រាប់សេដ្ឋកិច្ច ប្រសិន​បើ​ការចរចាបរាជ័យរួមមាន​៖ ​

១. បាត់បង់ចំណែកទីផ្សារនាំចេញនៅសហរដ្ឋអាមេរិក៖ ការ​នាំ​ចេញ​របស់​ថៃ ជា​ពិសេស​គ្រឿង​អេឡិច​ត្រូនិក និង​គ្រឿងប្រើប្រាស់ក្នុងផ្ទះ​​អេឡិច​ត្រូនិក អាច​នឹង​បាត់​បង់​ចំណែក​ទីផ្សារ​នៅ​សហរដ្ឋ​អាមេរិក​ទៅ​ឱ្យ​គូ​ប្រជែង។ បច្ចុប្បន្ន គូប្រជែងសំខាន់ៗ​ថៃ ភាគច្រើនទទួលរងនូវពន្ធគយទាបជាង​ថៃ។

២. ហានិភ័យលើវិស័យកសិកម្ម និងការចិញ្ចឹមសត្វ៖ ប្រសិនបើ​ថៃយល់ព្រមបើកទីផ្សាររបស់ខ្លួន​ឱ្យ​ទំនិញអាមេរិកដោយគ្មានលក្ខខណ្ឌ វិស័យដូចជាកសិកម្ម និង​ការចិញ្ចឹម​សត្វ ជាពិសេស​ជ្រូក សាច់​ និងពោតអាចរងផលប៉ះពាល់យ៉ាងធ្ងន់ធ្ងរ។ ថ្លៃដើមផលិតកម្មនៅ​ថៃ​ខ្ពស់ជាងនៅ​អាមេរិក​។ ខណៈថៃ​ពឹងផ្អែកខ្លាំងលើ​ផលិតកម្ម​ក្នុងស្រុក ការបើកទីផ្សារឱ្យ​ទំនិញ​អាមេរិក ​នឹង​ធ្វើឱ្យ​កសិករខ្នាតតូច​ងាយរងគ្រោះជាងគេ។ ​

៣. តម្រូវការក្នុងស្រុកចុះខ្សោយនៅឆមាសទី២ ឆ្នាំនេះ៖ ការវិនិយោគក្នុងវិស័យឯកជន​រំពឹងថានឹងធ្លាក់ចុះ ដែលអាច​បង្កកម្សោយ​វិស័យការងារ ហើយប៉ះពាល់ដល់​ការចំណាយរបស់អ្នកប្រើប្រាស់​ ជាពិសេសនៅ​ត្រីមាសចុងក្រោយ​។ ភាពមិនប្រាកដប្រជាជុំវិញពន្ធនាំចូលលើប្រទេសផ្សេងៗ​របស់​ ត្រាំ និងពន្ធលើ​ទំនិញថៃ អាចនាំឱ្យផែនការវិនិយោគពន្យារពេល។ ប្រសិនបើដៃគូប្រកួតប្រជែងរបស់​ថៃប្រឈមនឹងការយកពន្ធទាប ការវិនិយោគពីបរទេសអាចនឹងផ្លាស់ប្តូរពីថៃ ទៅកាន់ប្រទេស​ទាំងនោះ ហើយធ្វើឱ្យថៃលែងសូវទាក់ទាញសម្រាប់ការបណ្ដោះទុន។ ​

៤. ​ធនាគារកណ្ដាលថៃអាចកាត់អត្រាការប្រាក់បន្ថែមទៀត​៖ ប្រសិនបើ​ការចរចាពន្ធជាមួយ​អាមេរិកបរាជ័យ ​ថៃនឹងប្រឈមមុខនឹងហានិភ័យធ្លាក់ចុះកាន់តែខ្លាំង។ ដើម្បីជំរុញសេដ្ឋកិច្ច គណៈកម្មាធិការគោលនយោបាយរូបិយវត្ថុ (MPC) នៃធនាគារកណ្ដាល អាចនឹងកាត់បន្ថយអត្រាការប្រាក់ ២ ដងក្នុងឆ្នាំនេះ ដើម្បីស្របតាមលក្ខខណ្ឌសេដ្ឋកិច្ចដែលកាន់តែយ៉ាប់យ៉ឺន។ ​

ជាមួយគ្នានោះ SCB EIC បាន​ជំរុញឱ្យរដ្ឋាភិបាលថៃថ្លឹងថ្លែងពីគុណសម្បត្តិ និងគុណវិបត្តិនៃការបើកទីផ្សារឱ្យ​ទំនិញអាមេរិក​។ ​ខណៈ​ការ​ទម្លាក់ពន្ធលើទំនិញអាមេរិក​អាចផ្តល់អត្ថប្រយោជន៍ដល់ពាណិជ្ជកម្ម វាក៏អាចប៉ះពាល់ដល់អាជីវកម្មក្នុងស្រុក ដែលប្រឈមនឹងការប្រកួតប្រជែងកាន់តែច្រើនផងដែរ​៕

​