ពូទីន ប្រកាសត្រៀមខ្លួនធ្វើការជាមួយអាមេរិក អភិវឌ្ឍអណ្តូងរ៉ែកម្រ

ថ្លែងក្នុងបទសម្ភាសជាមួយទូរទស្សន៍ Russia 1 ប្រធានាធិបតីរុស្ស៊ីលោក វ្ល៉ាឌីមៀរ ពូទីន បានបញ្ជាក់យ៉ាងច្បាស់ថា ទីក្រុងមូស្គូបានត្រៀមខ្លួនរួចជាស្រេចដើម្បីធ្វើការជាមួយសហរដ្ឋអាមេរិក លើការអភិវឌ្ឍអណ្តូងរ៉ែនិងរោងចក្រចម្រាញ់រ៉ែកម្រជាពិសេសនៅក្នុងតំបន់ចំនួន៤ ដែលរុស្ស៊ីកាត់យកពីអ៊ុយក្រែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មួយរយៈចុងក្រោយនេះ រដ្ឋបាលរបស់លោក ត្រាំ បានបង្ខំឲ្យប្រធានាធិបតីអ៊ុយក្រែន វ្លូឌីមៀរ ហ្សេលេនស្គី ចុះហត្ថលេខាលើកិច្ចព្រមព្រៀងប្រគល់ធនធានរ៉ែកម្រឲ្យសហរដ្ឋអាមេរិក ជាថ្នូរនឹងជំនួយយោធារបស់ទីក្រុងវ៉ាស៊ីនតោន ជួយដល់ទីក្រុងកៀវ ដើម្បីយកទៅប្រយុទ្ធក្នុងសង្គ្រាមជាមួយរុស្ស៊ី។

មកទល់ពេលនេះ អ៊ុយក្រែន មិនទាន់សម្រេចចិត្តឡើយថាតើ ខ្លួននឹងត្រូវយល់ព្រមលើរឿងនេះដែរឬក៏អត់។

យ៉ាងណាក៏ដោយ តាមការចុះផ្សាយរបស់ RT នៅថ្ងៃអង្គារទី២៥ខែកុម្ភៈឆ្នាំ២០២៥ លោកពូទីន លើកឡើងថា រុស្ស៊ីមិនខ្វល់ចំពោះកិច្ចព្រមព្រៀងរវាងអាមេរិកនិងអ៊ុយក្រែនឡើយ ខណៈលោកសង្កត់ធ្ងន់ថា គេនៅតែមើលឃើញពីតម្លៃពិតប្រាកដនៃរ៉ែកម្ររបស់អ៊ុយក្រែន។

ស្របពេលជាមួយគ្នានោះ មេដឹកនាំរុស្សីអះអាងថា ទីក្រុងមូស្គូផ្តោតតែលើការអភិវឌ្ឍរ៉ែកម្រផ្ទាល់របស់ខ្លួនប៉ុណ្ណោះ ព្រោះវាមានសារៈសំខាន់ខ្លាំងណាស់នៅក្នុងវិស័យសេដ្ឋកិច្ច។

លោកពូទីននិយាយថា «យើងត្រៀមខ្លួនរួចជាស្រេចអស់ហើយ ដើម្បីធ្វើការជាមួយដៃគូអាមេរិករបស់យើង ប្រសិនបើពួកគេបង្ហាញចំណាប់អារម្មណ៍ក្នុងការធ្វើការជាមួយគ្នា ហើយនោះក៏រួមទាំងការអភិវឌ្ឍនៅក្នុងតំបន់ចំនួន៤ដែលបានវិលមកក្រោមការគ្រប់គ្រងរបស់រុស្ស៊ីវិញផងដែរដូចជា Donetsk,Lugansk, Kherson និង Zaporozhye»។

យោងតាមទស្សនាវដ្តី Forbes, អ៊ុយក្រែនមានធនធានរ៉ែតម្លៃជិត១៥ទ្រីលានដុល្លារក្នុងឆ្នាំ២០២៣ ខណៈពាក់កណ្តាលនៃទ្រព្យសម្បត្តិរ៉ែនោះ គឺស្ថិតនៅក្នុងតំបន់ Donetsk និង Lugansk នេះឯង៕

អត្ថបទ៖ សុខ សុវណ្ណ

ចុចអាន៖ ពូទីន៖ កងទ័ពរុស្ស៊ីប្រយុទ្ធនៅសមរភូមិជាមួយអ៊ុយក្រែន គឺដើម្បី យុត្តិធម៌