អាជ្ញាធរស្រុកគិរីសាគរ មានបំណងសង់កំពង់ផែ ចំណតរថយន្ត និងអាហារដ្ឋាននៅពយជប៉ុន ឃុំកោះស្តេច

ក្រុមអាជ្ញាធរស្រុកគិរីសាគរ ខេត្តកោះកុង បាននិងកំពុងពិភាក្សាគ្នាលម្អិតលើគម្រោងអភិវឌ្ឍន៍ជាកំពង់ផែ ចំណតរថយន្ត និងអាហារដ្ឋាន ដើម្បីភាពទាក់ទាញពីមហាជនភ្ញៀវទេសចរ។

ថ្លែងប្រាប់ កម្ពុជាថ្មី នៅថ្ងៃទី១២ ខែកក្កដា ឆ្នាំ២០២៤ លោក ចេង មុនីរិទ្ធ អភិបាលស្រុកគិរីសាគរ លើកឡើងថា ដោយមើលឃើញពីបញ្ហាប្រឈមមួយចំនួនចំពោះការធ្វើដំណើរស្ពានផែចាស់ និងចង់លើកកម្ពស់សោភណ្ឌភាពអនាម័យបរិស្ថាននៅចំណុចពយជប៉ុន ស្ថិតនៅភូមិព្រែកស្មាច់ ឃុំកោះស្តេច ទើបក្រុមការងារពិនិត្យលើជាគម្រោងអភិវឌ្ឍន៍នេះឡើង។

លោកអភិបាលស្រុកគិរីសាគរ បានបន្ថែមថា រដ្ឋបាលរបស់លោក សហការជាមួយវិក្រុមហ៊ុន យូញៀន តំណាងក្រុមហ៊ុនវិរៈ ប៊ុនថាំ ដើម្បីធ្វើឱ្យគម្រោងធ្វើជាកំពង់ផែ ចំណតយានយន្ត និងអាហារដ្ឋាន ចេញជារាងរូបនៅដើមឆ្នាំ២០២៥​ខាងមុខនេះ។

លោក ចេង មុនីរិទ្ធ ក៏បង្ហាញការជឿជាក់ថា កំណើនភ្ញៀវទេសចរជាតិ អន្តរជាតិ នឹងមកលេងកម្សាន្តកាន់តែច្រើនប្រកបដោយសុវត្ថិភាពខ្ពស់ ក្រោមការអនុវត្តគម្រោងអភិវឌ្ឍន៍ចប់រួចរាល់ ខណៈកោះស្តេច មិនត្រូវតែជាឃុំមួយប៉ុណ្ណោះទេថែមទាំងជាកន្លែងទេសចរគួរឱ្យទាក់ទាញផងដែរ។

តំណាងប្រជាពលរដ្ឋ និងអ្នករកស៊ីរត់ទូកនៅតំបន់កោះស្តេច គាំទ្រពេញទំហឹងចំពោះគម្រោងរបស់អាជ្ញាធរស្រុក ព្រោះ​ថា បច្ចុប្បន្នកំពង់ផែឈើចាស់ មានសភាពមិនរឹងមាំនោះទេ ពោលវាអាចបង្កគ្រោះថ្នាក់ដល់ពលរដ្ឋ និងអ្នកទេសចរនៅថ្ងៃណា។ ពលរដ្ឋ ជំរុញដល់អាជ្ញាធរ និងក្រុមហ៊ុនឯកជន សិក្សាវាយតម្លៃធ្វើគម្រោងនេះបានឆាប់ៗ ក្នុងន័យបង្កើនភាពទាក់ទាញ និងសុវត្ថិភាពរបស់ពលរដ្ឋ ព្រមទាំងភ្ញៀវទេសចរគ្រប់មជ្ឈដ្ឋានដែលនិយមមកលេងកម្សាន្តនៅលើកោះស្តេច៕

អត្តបទ៖ សិរីវឌ្ឍនៈ