អភិបាលខេត្តកោះកុង ប្រកាសជ្រើសរើសកម្លាំងពលកម្មប្រាក់ឈ្នួលទាបបំផុត ៣០០ដុល្លារ និងអត្ថប្រយោជន៍ផ្សេងៗ

អភិបាលខេត្តកោះកុង លោកស្រី មិថុនា ភូថង បានប្រកាសជ្រើសរើសកម្លាំងពលកម្មបន្ថែម ដើម្បីឆ្លើយតបតម្រូវការការងារ នៅតំបន់សេដ្ឋកិច្ចពិសេសខេត្តកោះកុង ដោយទទួលបានប្រាក់ឈ្នួលទាបបំផុត ៣០០ ដុល្លារ និងអត្ថប្រយោជន៍ផ្សេងៗជាច្រើនទៀត។

លោកស្រី មិថុនា ភូថង បានប្រកាសនៅលើបណ្តាញសង្គមហ្វេសប៊ុក នៅថ្ងៃទី​១៤ ខែមិថុនា នេះថា៖«ឱកាសការងារសម្រាប់បងប្អូនប្រជាពលរដ្ឋខ្មែរ! តំបន់សេដ្ឋកិច្ចពិសេសខេត្តកោះកុង ត្រូវការជ្រើសរើសកម្មករ-កម្មការិនីចំនួន២,៧០០នាក់ ប្រាក់ឈ្នួលទទួលចាប់ពី ៣០០ដុល្លារ និងមានការលើកទឹកចិត្តផ្សេងទៀត»។

ពលរដ្ឋខ្មែរមានចំណាប់អារម្មណ៍ធ្វើការទំនាក់ទំនងលេខទូរស័ព្ទ: ០១០ ២៣៦ ៦៥៥/០៩៦ ៩១៩១ ៩៩៨ ដែលអាចបម្រើការងារនៅទីតាំងស្ថិតនៅ ភូមិនាងកុក ស្រុកមណ្ឌលសីមា ខេត្តកោះកុង។ ការប្រកាសជ្រើសរើសកម្លាំងពលកម្មនេះ ​ស្របពេលដែលកម្ពុជា-ថៃ កំពុងមានភាពតានតឹងក្នុងជម្លោះព្រំដែន ហើយរីករាលដាលដល់វិស័យផ្សេងទៀត ក្នុងនោះប្រឈមប៉ះពាល់ដល់ពលខ្មែរដែលកំពុងបម្រើការងារនៅប្រទេសថៃ។

ដើម្បីដោះស្រាយបញ្ហាពលករខ្មែរវិលចូលស្រុកវិញ សម្តេចតេជោ ហ៊ុន សែន ប្រធានព្រឹទ្ធសភា បានណែនាំឱ្យស្ថាប័នពាក់ព័ន្ធត្រៀមទទួលពលករខ្មែរ និងដោះស្រាយការងារជូនពួកគាត់ ខណៈកម្ពុជាក៏កំពុងខ្វះកម្លាំងពលកម្មក្នុងស្រុកបើម្រើឱ្យវិស័យសំខាន់ៗជាច្រើនទៀត។

សម្តេចតេជោ ហ៊ុន សែន បានបង្ហោះសារនៅថ្ងៃទី ១៣ ខែ មិថុនា ថា ក្នុងករណីថៃមិនព្រមបើកច្រកព្រំដែនដែលខ្លួនបានបិទជាឯកភាគី កម្ពុជាត្រូវធ្វើ ៖« ត្រៀមទទួលយក និងដោះស្រាយការងារជូនពលករដែល និងវិលត្រឡប់ពីប្រទេសថៃ។ កម្ពុជាកំពុងខ្វះកម្លាំងពលកម្មទាំងក្នុងវិស័យឧស្សាហកម្ម ទាំងក្នុងវិស័យកសិកម្ម និងសំណង់រាប់សិបម៉ឺនកន្លែង។ បងប្អូនពលករអាចចាកចេញមកកម្ពុជាមុនថៃបណ្តេញចេញ ដែលពេលនេះកំពុងទទួលការមើលងាយ និងប្រមាថយ៉ាងធ្ងន់ធ្ងរនៅតំបន់មួយចំនួន»៕