ព័ត៌មានជាតិ

ជាង ២០ ឆ្នាំនេះ កំពង់ផែក្រុងព្រះសីហនុសម្រេចបានការអភិវឌ្ឍធំៗអ្វីខ្លះ?

បានផុស

១ year មុន

នៅ

ថ្ងៃសុក្រ ២ ឧសភា ២០២៥

ដោយ

កំពង់ផែស្វយ័តក្រុងព្រះសីហនុ គឺជាច្រកដឹកជញ្ចូនទំនិញចេញចូលតាមផ្លូវសមុទ្រដ៏សំខាន់របស់ប្រទេសកម្ពុជា។

ក្នុងរយៈពេលជាង ២០ ឆ្នាំ កំពង់ផែស្វយ័តក្រុងព្រះសីហនុ បានពង្រីកសមត្ថភាពដែលធ្វើឲ្យការធ្វើពាណិជ្ជកម្មដឹកជញ្ជូនមានការកើនឡើងពីមួយឆ្នាំទៅមួយឆ្នាំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចន្លោះឆ្នាំ២០០២ ដល់ឆ្នាំ ២០២៤ កំពង់ផែស្វយ័តក្រុងព្រះសីហនុ បានអភិវឌ្ឍសមត្ថភាពរបស់ខ្លួនជាច្រើនដំណាក់កាល ហើយសមិទ្ធផលធំៗដែលសម្រេចបានរួមមាន៖ ការសាងសង់ផែកុងតឺន័រប្រវែង ៤០០ ម៉ែត្រ ជម្រៅទឹក ១១,៥ម៉ែត្រ សាងសង់តំបន់សេដ្ឋកិច្ចពិសេស បំពាក់មធ្យោបាយលើកដាក់កុងតឺន័រទំនើបៗ ការសាងសង់ផែពហុបំណងប្រវែង ៣៣០ ម៉ែត្រ ជម្រៅទឹក ១៣,៥ម៉ែត្រ និងចំណតមូលដ្ឋានផ្គត់ផ្គង់ភស្តុភារសម្រាប់ការរុករកប្រេងដែលមានបណ្តោយប្រវែង ២០០ ម៉ែត្រ ជម្រៅទឹក ៧,៥ម៉ែត្រ កែសម្រួលផែទំនិញទូទៅទៅជាចំណតផែកុងតឺន័រជម្រៅទឹក ១០,៥ ម៉ែត្រ បូមស្តារជម្រៅទឹកចំណតផែកុងតឺន័ប្រវែង ៤០០ ម៉ែត្រ ជម្រៅទឹក ១១,៥ម៉ែត្រ ដែលអាចអនុញ្ញាតឱ្យនាវាដឹកកុងតឺន័រជម្រៅទឹក ១០,៤ម៉ែត្រ ចូលចតបាន ព្រមទាំងធ្វើឱ្យសមត្ថភាពកុងតឺណ័រឆ្លងកាត់សរុបកើនដល់ជាង ១លាន TEUs ក្នុងមួយឆ្នាំ និងឃ្លាំងទុកដាក់ទំនិញផ្សេងៗទៀត។

នៅក្នុងពិធីជួបសំណេះសំណាលជាមួយមន្ត្រីរាជការ បុគ្គលិក កម្មករ និយោជិតកំពង់ផែស្វយ័តក្រុងព្រះសីហនុ កាលពីព្រឹកថ្ងៃទី០១ ខែឧសភា ឆ្នាំ២០២៥ ម្សិលមិញនេះ សម្តេចមហាបវរធិបតី ហ៊ុន ម៉ាណែត បានគូសបញ្ជាក់ថា ការវិនិយោគលើកំពង់ផែស្វយ័តក្រុងព្រះសីហនុ គឺជាយុទ្ធសាស្ត្រយកលុយទៅបង្កើតលុយ។

រដ្ឋាភិបាលបានវិនិយោគទឹកប្រាក់ប្រមាណ ៧៥០ លានដុល្លារ ដើម្បីអភិវឌ្ឍកំពង់ផែខេត្តព្រះសីហនុទាំង ៣ ដំណាក់កាល ដើម្បីឆ្លើយតបទៅកំណើនការដឹកជញ្ជូនទំនិញតាមផ្លូវសមុទ្រ និងការធ្វើពាណិជ្ជកម្មរបស់ប្រទេសកម្ពុជា។

បើតាមនាយករដ្ឋមន្រ្តីកម្ពុជា ការអភិវឌ្ឍចំណតផែកុងតឺន័រថ្មីទាំង ៣ ដំណាក់កាល នឹងប្រែក្លាយកំពង់ផែស្វយ័តក្រុងព្រះសីហនុទៅជាកំពង់ផែអន្តរជាតិខ្នាតធំ (Hub Port) ដែលអនុញ្ញាតឱ្យនាវាកុងតឺន័រធុនធំៗមានផ្លូវដឹកជញ្ជូនពីគ្រប់តំបន់នៅក្នុងពិភពលោកអាចចូលចតបានដោយពុំមានឧបសគ្គលើជម្រៅទឹក។

ចំណតផែកុងតឺន័រទឹកជ្រៅជំហានទី១ ដែលកំពុងសាងសង់មានជម្រៅទឹក ១៤,៥ ម៉ែត្រ នឹងបញ្ចប់នៅឆ្នាំ ២០២៨ នឹងអាចឱ្យនាវាប្រមាណ ៩៣ ភាគរយ ក្នុងតំបន់ចូលចតនៅកំពង់ផែស្វយ័តក្រុងព្រះសីហនុបាន។ ចំណែកចំណតផែកុងតឺន័រទឹកជ្រៅជំហានទី ២ និងជំហានទី៣ នឹងពង្រីកលទ្ធភាពបន្ថែមទៀត ដែលទំនិញពីកម្ពុជាអាចដឹកចេញដោយផ្ទាល់ទៅបណ្តាកំពង់ផែក្នុងតំបន់អឺរ៉ុប និងអាមេរិក ដោយពុំចាំបាច់ឆ្លងកាត់បណ្តាកំពង់ផែបណ្តាប្រទេសនៅក្នុងតំបន់ទៀតឡើយ។

ការអភិវឌ្ឍសមត្ថភាពកំពង់ផែស្វយ័តក្រុងសីហនុ ជួយកាត់បន្ថយថ្លៃដឹកជញ្ជូន ដែលនឹងរុញឲ្យតម្លៃនៃការដឹកជញ្ជូននៅតាមផ្លូវសមុទ្រនឹងធ្លាក់ចុះ ហើយនឹងធ្វើឱ្យកម្ពុជាបង្កើនការប្រកួតប្រជែងកាន់តែខ្លាំងបន្ថែមទៀត។ នេះបើតាមនាយករដ្ឋមន្រ្តីកម្ពុជា ដោយបានបន្ថែមថា បច្ចុចប្បន្នកំពង់ផែស្វយ័តក្រុងព្រះសីហនុ អាចស្រូបយកចំណែកការដឹកជញ្ជូនបានជាង ៧០ ភាគរយ នៃការចរាចរណ៍ដឹកទំនិញចេញចូលប្រទេសកម្ពុជា។

កំពង់ផែស្វយ័តក្រុងព្រះសីហនុបម្រើនូវសេវាកម្មចំនួនបួនប្រភេទ ក្នុងនោះជាទីកន្លែងសម្រាប់ចំណតនាវាដឹកអ្នកធ្វើដំណើរទេសចរណ៍, សម្រាប់ដឹកជញ្ជូនទំនិញរាយ, សម្រាប់ដឹកជញ្ជូនកុងត័រនឺឆ្លងកាត់ និងសម្រាប់ជួយគាំទ្រជាមូលដ្ឋានភស្តុភារផ្គត់ផ្គង់ការរុករកប្រេង និងការធ្វើអាជីវកម្មប្រេងក្នុងដែនសមុទ្រកម្ពុជា។

ថ្លែងនៅក្នុងពិធីជួបសំណេះសំណាលជាមួយមន្ត្រីរាជការ បុគ្គលិក កម្មករ និយោជិតកំពង់ផែស្វយ័តក្រុងព្រះសីហនុ នាយករដ្ឋមន្រ្តីកម្ពុជា សម្តេចធិបតី ហ៊ុន ម៉ាណែត បានណែនាំឲ្យរក្សាផ្ទៃដីបម្រុងទុកនៅកំពង់ផែក្រុងព្រះសីហនុ ដើម្បីទុកអភិវឌ្ឍជាបន្តបន្ទាប់នៅពេលអនាគត៕