ព័ត៌មានជាតិ

អ្នកនាំពាក្យថាកម្ពុជាកំពុងមានចំណាត់ការលើករណីថៃចូលបាញ់ដែលធ្វើឱ្យស្លាប់ទាហានខ្មែរ

បានផុស

១៣ ម៉ោង មុន

នៅ

ថ្ងៃពុធ ២៨ ឧសភា ២០២៥

ដោយ

អ្នកនាំពាក្យកងទ័ពជើងគោក លោកឧត្តមសេនីយ៍ទោ ម៉ៅ ផល្លា បានឱ្យដឹងថាករណីទាហានខ្មែរម្នាក់ស្លាប់ក្នុងហេតុការណ៍ប៉ះទង្គិចគ្នាជាមួយថៃនៅតំបន់មុំបី ស្រុកជាំក្សាន្ត ខេត្តព្រះវិហារ ថ្នាក់ដឹកនាំកងទ័ពកម្ពជាកំពុងមានវិធានការផ្លូវទូតដោះស្រាយហើយ ខណៈមូលហេតុនៃការប៉ះទង្គិចនេះនៅមិនទាន់អាចបញ្ជាក់បានទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ម៉ៅ ផល្លា បានប្រាប់មកកម្ពុជាថ្មីនៅល្ងាចថ្ងៃទី២៨ ខែឧសភានេះថា៖ «រឿងនេះគឺមានទំនាក់ទំនងទូត ដល់ថ្នាក់ជាតិហើយ»។

ទាហានដែលបានពលីក្នុងហេតុការណ៍ប៉ះទង្គិចនេះឈ្មោះ សួន រោន មានតួនាទីជាព្រិន្ទបាលឯក មានទីលំនៅរស់នៅឃុំយាង ស្រុកជាំក្សាន្ត ខេត្តព្រះវិហារ។

ក្នុងសេចក្ដីប្រកាសព័ត៌មានចុះថ្ងៃទី២៨ ខែឧសភា ឆ្នាំ២០២៥នេះ ក្រសួងការពារជាតិបញ្ជាក់ថាករណីប៉ះទង្គិចគ្នារវាងទ័ពខ្មែរ និងថៃ ព្រឹកនេះកើតឡើងដោយសារកងទ័ពថៃធ្វើការបាញ់ប្រហារមកមុនលើលេណដ្ឋាន ដែលទីតាំងឈរជើងរបស់កម្ពុជា។

ក្នុងសេចក្ដីប្រកាសបានសរសេរថា៖ «ការប៉ះទង្គិចនេះមិនមែនជាជម្រើសដែលកម្ពុជាចង់បាននោះទេ ហើយយើងនឹងបន្តពិភាក្សាជាមួយក្រសួងការពារជាតិថៃដើម្បីរកដំណោះស្រាយរួមក្នុងការធ្វើឱ្យស្ថានភាពវិលត្រឡប់ទៅដូចដើមវិញឱ្យបានឆាប់»។

បើតាមក្រសួងការពារជាតិកម្ពុជាប្រកាន់ខ្ជាប់នូវមធ្យោបាយការទូត និងដោះស្រាយដោយសន្ដិវិធី តែក្នុងនោះក៏ប្ដេជ្ញាការពារបូរណភាពទឹកដីឱ្យបានទោះក្នុងតម្លៃណាក៏ដោយ៕

អត្ថបទដោយ ហ៊ុន សិរីវឌ្ឍន៍