យោធភូមិភាគទី៣ បើកវគ្គហ្វឹកហ្វឺនពលទាហានថ្មីបំពេញឱ្យក្របខណ្ឌកងទ័ពជើងគោក

នៅថ្ងៃទី៣ ខែមិថុនា ឆ្នាំ២០២៥ សាលាពលទាហានយោធភូមិភាគទី៣ បានបើកវគ្គហ្វឹកហ្វឺនដល់ពលទាហានថ្មីបំពេញក្របខណ្ឌឱ្យកងទ័ពជើងគោក ដែលមានចំនួន១៨១នាក់ សិក្សារយៈពេល ៩១ថ្ងៃ។ ពិធីបើកវគ្គនេះ ធ្វើឡើងក្រោមវត្តមានឧត្តមសេនីយ៍ទោ អ៊ុយ ហៀង មេបញ្ជាការយោធភូមិភាគទី៣។

ឧត្តមសេនីយ៍ទោ អ៊ុយ ហៀង បានណែនាំដល់សិក្ខាកាមពេលហ្វឹកហ្វឺន ត្រូវប្រឹងប្រែងយកចិត្តទុកដាក់រៀនសូត្រឱ្យបានល្អប្រសើរ ហើយចំពោះគ្រូធាចារ្យ ត្រូវរិះរកវីធីសាស្ត្រល្អៗធ្វើយ៉ាងណាឱ្យសិក្ខាកាមងាយយល់ និងចាប់បាន។ សម្រាប់ការងារហ្វឹកហ្វឺន លោក ថា ត្រូវបង្កសមត្ថភាពដល់ពលទាហានថ្មី ដើម្បីរួមចំណែកពង្រឹងខឿនការពារជាតិបានរឹងមាំ។

ឧត្តមសេនីយ៍ទោ អ៊ុយ ហៀង បានផ្តាំដល់សិក្ខាកាមពលទាហានថ្មីទាំងអស់ត្រូវក្តាប់ឱ្យជាប់រាល់មេរៀនដែលគ្រូបង្រៀន និងត្រូវប្រកានភ្ជាប់តួនាទីរបស់ខ្លួន ហើយត្រូវខិតខំរៀនសូត្រដើម្បីបង្កើនសមត្ថភាព ចំណេះដឹង ចំណេះធ្វើពិតប្រាកដ រួមចំណែកពង្រឹងខឿនការពារជាតិបានរឹងមាំ។

លោក សង្ឃឹមថា ពេលបញ្ចប់វគ្គហ្វឹកហ្វឺន គឺនឹងទទួលបានលទ្ធផលល្អប្រសើរ ហើយត្រូវស្មោះត្រង់ដាច់ខាតចំពោះជាតិ សាសនា ព្រះមហាក្សត្រ ការពាររដ្ឋធម្មនុញ្ញ ជាច្បាប់កំពូលរបស់ជាតិ ការពាររាជរដ្ឋាភិបាលស្របច្បាប់ ដែលប្រសូតចេញពីការបោះឆ្នោត៕