ព័ត៌មានជាតិ

អាជ្ញាធរខេត្តព្រះវិហារជម្លៀសពលរដ្ឋពីតំបន់ជួរមុខទៅកាន់ទីកន្លែងសុវត្ថិភាព

បានផុស

១១ ខែ មុន

នៅ

ថ្ងៃព្រហស្បតិ៍ ២៩ ឧសភា ២០២៥

ដោយ

អាជ្ញាធរខេត្តព្រះវិហារបានសម្រេចជម្លៀសពលរដ្ឋចេញពីភូមិសែនតេជៈ ឃុំមរកត ស្រុកជាំក្សាន្ត ខេត្តព្រះវិហារ ទៅទីកន្លែងសុវត្ថិភាព នៅព្រឹកថ្ងៃទី២៩ ខែឧសភា ឆ្នាំ២០២៥ បន្ទាប់ពីស្ថានការណ៍ព្រំដែនកំពុងកើនកម្ដៅ។

តាមសេចក្ដីរាយការណ៍ពលរដ្ឋដែលត្រូវបានជម្លៀសមានចំនួន៧៥គ្រួសារ មានចំនួន២៤១នាក់ (ស្រី ១២១នាក់) ទៅស្នាក់នៅចំណុចទីធ្លាមណ្ឌលសុវត្ថិភាពតាកឹង ភូមិថ្នល់បែក ឃុំថ្មី ស្រុកគូលែន ខេត្តព្រះវិហារ ដោយមានការគាំទ្រសម្ភារៈ និងអាហារពីកាកបាទក្រហមកម្ពុជា និងមន្ទីរសង្គមកិច្ចខេត្តផងដែរ។

ថ្លែងមុនប្រជុំព្រឹទ្ធសភាព្រឹកថ្ងៃទី២៩ ខែឧសភានេះ សម្ដេចតេជោ ហ៊ុន សែន បានឱ្យដឹងការភៀសសឹកនេះត្រូវបានអាជ្ញាធរជម្លៀសដើម្បីរក្សាសុវត្ថិភាពជូនពលរដ្ឋ ខណៈសម្ដេចលើកទឹកចិត្តស្មារតីគាំទ្ររបស់ពលរដ្ឋលើកងទ័ពដែលបង្ហាញភាពរឹងមាំនៃខឿនការពារជាតិកម្ពុជា។

សម្ដេចតេជោថានៅរសៀលថ្ងៃទី២៩ ខែឧសភានេះមេទ័ពជើងគោកកម្ពុជា-ថៃ នឹងជួបពិភាក្សាគ្នាដោយសម្ដេចសង្ឃឹមថានឹងទទួលបានលទ្ធផលជោគជ័យរក្សាស្ថានភាពព្រំដែនឱ្យមានភាពស្ងប់ស្ងាត់ដូចដើម។

គួរឱ្យដឹងដែរថាទាហានប្រទេសថៃបានឆ្មក់ចូលបាញ់ទាហានខ្មែរនៅតំបន់មុំបី ស្រុកជាំក្សាន្ត ខេត្តព្រះវិហារកាលពីព្រឹកថ្ងៃទី២៨ ខែឧសភា ដែលបណ្ដាលឱ្យទាហានខ្មែរម្នាក់បានស្លាប់បាត់បង់ជីវិត។ ក្រោយហេតុការណ៍នេះកម្ពុជាបានបញ្ជូនសម្ភារៈយុទ្ធបករណ៍ធុនធ្ងន់ជាបន្តបន្ទាប់ទៅព្រំដែនជាការត្រៀមឆ្លើយតបផងដែរ៕