ដើម្បីប្រសិទ្ធភាព ប្រើឱ្យចំគោលដៅ តម្លាភាព! រដ្ឋ នឹងបង្កើតមូលនិធិគ្រប់គ្រងថវិកាបានមកពីការបរិច្ចាគគាំទ្រកងទ័ពកម្ពុជា

សម្ដេចធិបតី នាយឧត្ដមសេនីយ៍ ហ៊ុន ម៉ាណែត នាយករដ្ឋមន្ត្រីកម្ពុជា អរគុណសម្ដេចតេជោ ហ៊ុន សែន ផ្ដួចផ្ដើមកៀរគរថវិកាសម្រាប់ជួយកងទ័ពនៅជួរមុខ។ សម្ដេចធិបតី ថ្លែងថា ដើម្បីឱ្យថវិកាដែលសប្បុរសជនបរិច្ចាគប្រើប្រាស់ទៅចំគោលដៅ ហើយស្មើភាព រដ្ឋាភិបាលកម្ពុជា នឹងបង្កើតមូលនិធិមួយឆាប់ៗនេះ។ សម្ដេចធិបតី  ក៏បានអរគុណសប្បុរសជនទាំងចាប់តាំងពីមន្ត្រីជាន់ខ្ពស់ និងប្រជាពលរដ្ឋកម្ពុជាគ្រប់រូប ដែលបានបរិច្ចាគថវិកា។ សម្ដេចធិបតី ហ៊ុន ម៉ាណែត ប្រកាសដូច្នេះ នៅក្នុងសមាជព្រឹទ្ធសភា-រដ្ឋសភា នាថ្ងៃទី០៣ ខែមិថុនា នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្ដេចធិបតី ថ្លែងដូច្នេះ៖« ដើម្បីធានាប្រសិទ្ធនៃការប្រើប្រាស់ថវិកានេះ ឱ្យបានចំគោលដៅ និងមានតម្លាភាព រាជរដ្ឋាភិបាល នឹងរៀបចំមូលនិធិមួយ ដើម្បីគ្រប់គ្រងនូវមូលនិធិ ដើម្បីគាំទ្រទៅដល់កងទ័ពរ​បស់យើង និងធ្វើការជាមួយគណៈបញ្ជាការឯកភាពសមរភូមិមុខ ដើម្បីធ្វើការធានាដោះស្រាយបញ្ហា ធានាចាត់ចែងនូវថវិកានេះ ឱ្យចំគោលដៅកងទ័ពរបស់យើងនៅខាងមុខ។»។

ការបង្កើតមូលនិធិធ្វើឡើង បន្ទាប់ពីសម្ដេចតេជោ ហ៊ុន សែន ប្រកាសកៀរគរឱ្យពលរដ្ឋកម្ពុជា និងអ្នកមានធនធានទាំងឡាយ ជួយបរិច្ចាគ ផ្ដល់ការគាំទ្រទៅដល់កងទ័ពនៅជួរមុខ ដែលកំពុងប្រឈមមុខការពារបូរណភាពទឹកដីជាមួយប្រទេសថៃ។ សម្ដេចតេជោ ហ៊ុន សែន ប្រកាសឱ្យពលរដ្ឋ មន្ត្រីរាជការ អ្នកមានធនធាន បរិច្ចាគជួយដល់កងទ័ពនៅជួរមុខ ដើម្បីបង្ហាញអំពីការឯកភាពជាតិ ការរួមគ្នាជាធ្លុងមួយ និងឱ្យក្លាយជាខឿនការពារជាតិដ៏រឹងមាំ និងបង្ហាញថា កងទ័ពការពារនៅជួរមុខ ចំណែកប្រជាជនជាអ្នកនៅពីក្រោយផ្ដល់ការលើកទឹកចិត្តដ៏រឹងមាំជូនកងទ័ព។

ទាំងសម្ដេចតេជោ ហ៊ុន សែន និងសម្ដេចធិបតី​ ហ៊ុន ម៉ាណែត សុទ្ធតែធ្លាប់បានប្រកាសថា ការអំពាវនាវឱ្យពលរដ្ឋប​រិច្ចាគជូនកងទ័ពនេះ មិនមែនដោយសារតែខ្វះខាតថវិកាសម្រាប់កងទ័ព និងរដ្ឋាភិបាលឡើយ។

ជាការកត់សម្គាល់ នេះមិនមែនជាលើកទី១ ដែលរដ្ឋាភិបាលកម្ពុជា បង្កើតមូលនិធិបែបនេះឡើង ត្បិតកាលពីឆ្នាំ២០២៤កន្លងទៅ រដ្ឋាភិបាលបានបង្កើតមូលនិធិការសាងសង់ហេដ្ឋារចនាសម្ព័ន្ធតាមព្រំដែន ផ្ដោតលើផ្លូវក្រវ៉ាត់ព្រំដែន ដោយបើកផ្លូវឱ្យពលរដ្ឋចូលរួមបរិច្ចាគ ក្នុងបុព្វហេតុការពារបូរណភាពទឹកដីដូចគ្នា។​

កាលពីសង្គ្រាមជាមួយថៃ កាលពីចន្លោះឆ្នាំ២០០៨ ដល់ឆ្នាំ២០១១ កម្ពុជា ក៏បានបង្កើតមូលធិនិ ដើម្បីឱ្យពលរដ្ឋកម្ពុជាគ្រប់ស្រទាប់វណ្ណៈបរិច្ចាគគាំទ្រលើកទឹកចិត្តដល់កងទ័ពផងដែរ៕

ដោយ៖ ង៉ិល ណារ៉ាត់