ប្លែកភ្នែក AI បង្កើតរូបភាពមហេសីស្អាតដាច់គេក្នុងប្រទេសចិន ផ្ទុះការសរសើរព្រោងព្រាត

កាលពីពេលថ្មីៗនេះ វីដេអូមួយនៅលើបណ្តាញ​សង្គម TikTok បានទាក់ទាញការចាប់អារម្មណ៍ចំពោះការប្រើប្រាស់បច្ចេកវិទ្យា AI ដើម្បីបង្កើតរូបភាព​បញ្ឈររបស់មហេសី Yang Guifei ដែលជាស្រីស្អាតដ៏អស្ចារ្យម្នាក់ក្នុងចំណោម រាជិនីសម្រស់ដ៏អស្ចារ្យទាំងបួនរបស់ប្រទេសចិន។ លទ្ធផលនេះ បានធ្វើឲ្យមនុស្សជាច្រើនភ្ញាក់ផ្អើល ដោយសារតែសម្រស់ដ៏ស្រស់របស់នាង ខុសប្លែកពីរូបភាពដែលតែងតែឃើញក្នុងខ្សែភាពយន្ត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីមុន ការស្តាររូបភាពពីគំនូរបុរាណ ឬឯកសារប្រវត្តិសាស្ត្រគឺជារឿងមួយដ៏ពិបាកបំផុត។ ទោះបីជាយ៉ាងណាក៏ដោយ ជាមួយនឹងការអភិវឌ្ឍនៃបញ្ញាសិប្បនិមិត្ត (កម្មវិធី AI) នាពេលបច្ចុប្បន្ននេះ គេអាចបង្កើតរូបចម្លាក់ប្រវត្តិសាស្ត្រឡើង​វិញបានយ៉ាងច្បាស់ និងរស់រវើកជាងមុន។

នៅក្នុងវីដេអូដែលបានចែករំលែក បច្ចេកវិទ្យា AI បានបង្កើតមុខរបស់មហេសី Yang Guifei ឡើងវិញដោយផ្អែកលើឯកសារប្រវត្តិសាស្ត្រ និងការពិពណ៌នានៅក្នុងអក្សរសិល្ប៍។ លទ្ធផល​បាន​បង្ហាញ​ពី​នារី​ម្នាក់​ដែល​មាន​មុខ​មូល​ទន់ភ្លន់ ភ្នែកមូក្រឡង់ និង​ស្នាមញញឹម​ដ៏​ទាក់ទាញ បញ្ចេញ​សម្រស់​បែបថ្លៃថ្នូរ និង​សុភាពរាបសារ។

អ្នក​​លេង​អ៊ីនធឺណិត​ជា​ច្រើន​បាន​សម្ដែង​ការ​ភ្ញាក់​ផ្អើល និង​រីករាយ​ចំពោះ​រូបភាព​នេះ។ មតិមួយចំនួនបាននិយាយថា បើប្រៀបធៀបទៅនឹងរូបភាពដែលឃើញជាញឹកញាប់នៅក្នុងខ្សែភាពយន្ត កំណែដែលបង្កើតឡើងវិញដោយ AI ផ្តល់នូវអារម្មណ៍ជាក់ស្តែង និងជិតស្និទ្ធជាង។

នេះមិនមែនជាលើកទីមួយទេដែល AI ត្រូវបានប្រើដើម្បីបង្កើតឡើងវិញនូវរូបចម្លាក់ប្រវត្តិសាស្ត្រ។ កាលពីមុន គម្រោងស្រដៀងគ្នាជាច្រើនបានបង្កើតឡើងវិញនូវរូបភាពនៃឥស្សរជនល្បីៗដូចជាអធិរាជ ឈិនស៊ី​ , ស្តេចផារ៉ោន Cleopatra ឬ ណាប៉ូឡេអុង ដែលទាក់ទាញការចាប់អារម្មណ៍យ៉ាងខ្លាំងពីសហគមន៍អនឡាញ។

ការប្រើប្រាស់ AI ក្នុងការកសាងឡើងវិញជាប្រវត្តិសាស្ត្រមិនត្រឹមតែជួយយើងឲ្យមើលឃើញអតីតកាលកាន់តែប្រសើរឡើងប៉ុណ្ណោះទេ ប៉ុន្តែថែមទាំងបើកឱកាសជាច្រើនក្នុងការស្រាវជ្រាវ និងការអប់រំផងដែរ។ ទោះជាយ៉ាងណាក៏ដោយ វាក៏សំខាន់ផងដែរក្នុងការកត់សម្គាល់ថា ខណៈពេលដែល AI អាចបង្កើតរូបភាពរស់រវើក ភាពត្រឹមត្រូវនៅតែអាស្រ័យលើគុណភាព និងភាពជឿជាក់នៃសម្ភារៈប្រភព។

មហេសី Yang Guifei មានឈ្មោះ​ពិត Yang Yuhuan គឺជាមនុស្សស្រី​ដ៏​ស្រស់ស្អាតមួយរូប​ក្នុង​ចំណោម​រាជិនីសម្រស់​ដ៏​ល្បី​បំផុត​ទាំង​បួន​ក្នុង​ប្រវត្តិសាស្ត្រ​ចិន។ យោងតាមសៀវភៅប្រវត្តិសាស្ត្រ ទ្រងមានកម្ពស់ប្រហែល១មែត្រនិង៦៤សងទីម៉ែត្រ ទម្ងន់ប្រហែល ៦៨គីឡូក្រាម មានមុខភ្លឺថ្លា និងអាកប្បកិរិយាដ៏គួរឲ្យទាក់ទាញ។ ថ្វីដ្បិតតែមានរូបរាងធាត់ក៏ពិតមែន ប៉ុន្តែទ្រង់សក្តិសមនឹងស្តង់ដារសម្រស់នាសម័យនោះយ៉ាងល្អឥតខ្ចោះ ហើយត្រូវបានគេចាត់ទុកថាជានិមិត្តរូបនៃភាពទាក់ទាញយ៉ាងពេញទំហឹង។

សម្រស់របស់មហេសីត្រូវបានបង្ហាញនៅក្នុងកំណាព្យជាច្រើនជំនាន់។ សូម្បីតែកវី Li Bai ធ្លាប់ឧទ្ទិសកំណាព្យចំនួនបីដើម្បីសរសើរសម្រស់ និងក្លិនក្រអូបពីឋានសួគ៌ ធ្វើឲ្យរូបភាពរបស់ទ្រង់មានច្រើនតាមរយៈសៀវភៅប្រវត្តិសាស្ត្រ ហើយជ្រាបចូលយ៉ាងជ្រៅទៅក្នុងជីវិតវប្បធម៌ និងសិល្បៈចិន។

ក្នុងចំណោមសម្រស់ទាំងបួន រឿងស្នេហារវាងមហេសី Yang Guifei និងអធិរាជ Xuanzong នៃរាជវង្សថាង គឺល្បីល្បាញបំផុត ដោយបានក្លាយជាប្រធានបទមិនចេះចប់សម្រាប់កំណាព្យចិន ល្ខោន និងភាពយន្តមកទល់សព្វថ្ងៃនេះ។ ទោះជាយ៉ាងណាក៏ដោយ នៅពេលយកមកកែច្នៃជាខ្សែភាពយន្ត អ្នកផលិតភាពយន្តតែងតែបន្ថែមព័ត៌មានលម្អិតប្រឌិតជាច្រើន ដើម្បីបង្កើនសាច់រឿង ធ្វើឲ្យរូបភាពនៃព្រះនាងម្ចាស់ ជួនកាលហាក់ឆ្ងាយពីទិន្នន័យប្រវត្តិសាស្ត្រដើមថែមទៀតផង៕

អត្ថបទ៖ សាង ស្រីល័ក្ខ

ចុចអាន៖កំណាយ៤ ធំៗក្នុងផ្នូរអធិរាជ ឈិនស៊ី​ កម្រមានមនុស្សដឹងច្បាស់ណាស់