ក្រុមហ៊ុនអាកាសចរណ៍ Ruili ចាប់ផ្តើមហោះហើរឡើងវិញមកកាន់ព្រលានព្រះសីហនុ

ក្រុមហ៊ុនអាកាសចរណ៍ Ruili របស់ប្រទេសចិនបានចាប់ផ្តើមធ្វើការហោះហើរត្រង់ឡើងវិញមកកាន់អាកាសយានដ្ឋានអន្តរជាតិព្រះសីហនុ បន្ទាប់ពីផ្អាកជើងហោះហើរដោយសារតែ​ការផ្ទុះការរីករាលដាលនៃជំងឺកូវីដ១៩។

យោងតាមការចេញផ្សាយរបស់ក្រុមហ៊ុន Cambodia Airports ក្រុមហ៊ុនអាកាសចរណ៍នេះបានចាប់ផ្តើមបកការហោះហើរថ្មីប្រចាំសប្តាហ៍ពីទីក្រុងអ៊ូស៊ី ប្រទេសចិន ទៅកាន់ខេត្តព្រះសីហនុ ប្រទេសកម្ពុជាចាប់ពីថ្ងៃទី១៨ ខែឧសភានវ។

Cambodia Airports បានលើកឡើងថា៖« នៅថ្ងៃទី ១៨ ខែឧសភា ឆ្នាំ ២០២៥ ក្រុមហ៊ុនអាកាសចរណ៍ Ruili នឹងចាប់ផ្តើមដំណើរការជើងហោះហើរថ្មីប្រចាំសប្តាហ៍ពីទីក្រុងអ៊ូស៊ី ប្រទេសចិន ទៅកាន់ខេត្តព្រះសីហនុ ប្រទេសកម្ពុជា! យើងពិតជារំភើបរីករាយក្នុងការស្វាគមន៍អ្នកដំណើររបស់យើង»។

លោក ស៊ិន ចាន់សិរីវុត្ថា អ្នកនាំពាក្យអាកាសចរណ៍ស៊ីវិលថ្លែងមកកាន់កម្ពុជាថ្មីនៅព្រឹកថ្ងៃទី១៩ ខែឧសភាថា ការត្រឡប់មកវិញរបស់ក្រុមហ៊ុនអាកាសចរណ៍នេះ បង្ហាញអំពីការកើនឡើងនៃតម្រូវការរបស់អ្នកដំណើរ។​

លោកបានថ្លែងថា៖«សម្រាប់ក្រុមហ៊ុននេះធ្លាប់ហោះហើរដោយផ្ទាល់មកកាន់ក្រុងកំពង់សោមយើងកាលមុនការផ្ទុះការរីករាលដាលនៃជំងឺកូវីដ១៩។ ដូច្នេះការចាប់ផ្តើមហោះហើរត្រង់មកវិញនេះគឺសញ្ញាវិជ្ជមានមួយដែលបង្ហាញអំពីកំណើននៃតម្រូវការរបស់ភ្ញៀវមកពីប្រទេសចិនមកកាន់ប្រទេសកម្ពុជាយើង ស្របពេលដែលប្រទេសយើងទាំងពីរក៏កំពុងជំរុញភ្ញៀវមកពីប្រទេសចិនឱ្យកាន់តែច្រើនផងដែរ»។

យោងតាម Cambodia Airports ក្រុមហ៊ុនអាកាសចរណ៍ Ruili នឹងធ្វើប្រតិបត្តិការជើងហោះហើរទៀងទាត់ប្រចាំសប្តាហ៍ទៅកាន់ទីក្រុងឆ្នេរសមុទ្ររៀងរាល់ថ្ងៃអាទិត្យ។

 កម្ពុជាបានស្វាគមន៍ភ្ញៀវទេចរអន្តរជាតិជាង​ ១,៨៣ លាននាក់ក្នុងត្រីមាសទី១ កើនឡើង១៦,១%ធៀបនឹងរយៈពេលដូចគ្នាកាលពីឆ្នាំមុន បង្ហាញអំពីភាពល្អប្រសើរនៃលំហូរទេសចរណ៍ទាំងក្នុងតំបន់ និងសកលលោក ទោះបីជាស្ថានភាពសេដ្ឋកិច្ចសកលនៅប្រឈមនឹងស្ថានភាពមិនច្បាស់លាស់ខ្ពស់ក្តី។

​យោងតាមរបាយការណ៍របស់ក្រ​សួងទេចរណ៍ចេញផ្សាយនៅព្រឹកថ្ងៃទី៩ ខែឧសភា​ថា ក្នុងចំនួននៃការមកដល់នៃភ្ញៀវទេចរអន្តរជាតិនេះ​ ភ្ញៀវទេចរមកពីក្នុងតំបន់អាស៊ានមានចំណែកនៃការមកដល់សរុបរហូតដល់ជាង៥៣% ភ្ញៀវទេចរមកពីអឺរ៉ុបមានចំណែក១៥,៥%​ និងផ្សេងៗទៀត។ ក្នុងនោះការមកដល់នៃភ្ញៀវទេសចរចិនសរុបចំនួន ២៨៦ ១៥៦ នាក់ក្នុង​ត្រីមាសទីមួយនៃឆ្នាំ ២០២៥ កើនឡើង ជិត៥១ ភាគរយពី ១៨៩ ៩៦១ ក្នុងរយៈពេលដូចគ្នាកាលពីឆ្នាំមុន៕