ព័ត៌មានអន្ដរជាតិ

អ៊ីរ៉ង់ នឹងបន្តកិច្ចចរចានុយក្លេអ៊ែរឡើងវិញ ជាមួយមហាអំណាចអឺរ៉ុប E3

បានផុស

៣ ថ្ងៃ មុន

នៅ

ថ្ងៃចន្ទ ២១ កក្កដា ២០២៥

ដោយ

Chheang

អ៊ីរ៉ង់ នឹងជួបជាមួយអង់គ្លេស បារាំង និងអាល្លឺម៉ង់ ដែលគេស្គាល់ថាជាមហាអំណាចអឺរ៉ុប E3 នៃកិច្ចព្រមព្រៀងនុយក្លេអ៊ែរឆ្នាំ២០១៥។ យោងតាមក្រសួងការបរទេសអ៊ីរ៉ង់ ការចរចាលើកម្មវិធីនុយក្លេអ៊ែរឡើងវិញនេះ នឹងធ្វើនៅទីក្រុងអ៊ីស្តង់ប៊ុល នាថ្ងៃសុក្រទី២៥ខែកក្កដាឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យក្រសួងការបរទេសអ៊ីរ៉ង់ លោក Esmail Baghae បានបញ្ជាក់ថា កិច្ចពិភាក្សានឹងធ្វើឡើងនៅថ្នាក់អនុរដ្ឋមន្ត្រីការបរទេស និងជាជំនួបផ្ទាល់លើកដំបូង ចាប់តាំងពីការវាយប្រហារតាមអាកាសរបស់អាមេរិក និងអ៊ីស្រាអែល ដែលបំផ្លាញរោងចក្រនុយក្លេអ៊ែរអ៊ីរ៉ង់កាលពីខែមិថុនា។

កិច្ចប្រជុំនេះ ធ្វើឡើងបន្ទាប់ពីមានសម្ពាធខ្លាំងពី E3 និងសហភាពអឺរ៉ុប ដើម្បីស្តារការចរចាការទូតឡើងវិញឲ្យបានឆាប់រហ័ស។ E3 បានព្រមានថា ប្រសិនបើគ្មានការរីកចម្រើនជាក់ស្តែងឆ្ពោះទៅរកកិច្ចព្រមព្រៀងនុយក្លេអ៊ែរនៅចុងខែសីហាទេ ពួកគេនឹងបង្កើតយន្តការ«snapback» ដើម្បីដាក់ទណ្ឌកម្មរបស់អង្គការសហប្រជាជាតិឡើងវិញលើទីក្រុងតេហេរ៉ង់។

រដ្ឋមន្ត្រីការបរទេសអ៊ីរ៉ង់ លោក Abbas Araqchi ធ្លាប់បានថ្លែងថា ទីក្រុងតេហេរ៉ង់បើកចំហសម្រាប់ការសន្ទនាជាមួយអឺរ៉ុប ប៉ុន្តែការចរចាជាមួយសហរដ្ឋអាមេរិកនៅតែផ្អាកដដែល លុះត្រាណាតែក្រុងវ៉ាស៊ីនតោនធានាថាឈប់កំណត់គោលដៅវាយប្រហារលើអ៊ីរ៉ង់ម្ដងទៀត៕

ដោយ៖ ឈាង