បាញ់កម្ពុជាមុនហើយ ស្រាប់តែថៃប្រកាសបិទសាលារៀនតាមព្រំដែនទាំងអស់

គណៈកម្មការអប់រំមូលដ្ឋានថៃ (OBEC) បានបញ្ជាឱ្យបិទសាលារៀនទាំងអស់ និងផ្អាកថ្នាក់រៀននៅតាមតំបន់ព្រំដែនថៃ ដែល​​​មាន​ការ​ប៉ះទង្គិចគ្នាបានកើតឡើង បន្ទាប់ពីមានការប្រឈមមុខដាក់គ្នារវាងយោធាថៃ និងកងកម្លាំងកម្ពុជា នៅជិតប្រាសាទតាមាន់ធំ និ​ង​តាមបណ្តោយ​ព្រំដែនកម្ពុជា-ថៃ​​។

យោងតាមការចេញផ្សាយរបស់ Khaosod ដោយសារការប៉ះទង្គិចគ្នាកាន់តែ​ខ្លាំង​ឡើង សិស្ស​សាលាថៃត្រូវ​បាន​ណែនាំ​ឱ្យ​ជ្រកកោន​​​​លាក់​ខ្លួន​ក្នុង​លេណដ្ឋាន​ដែល​បាន​រៀបចំ​ដើម្បី​សុវត្ថិភាព និង ជម្លៀសចេញ។ សាលារៀនទាំងអស់ដែលមាន​ទីតាំងនៅតាមតំបន់ព្រំដែន ឥឡូវនេះបានរៀបចំផែនការឆ្លើយតបបន្ទាន់។

គួរបញ្ជាក់ថា យោងតាមលោកស្រីឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិ​កម្ពុជា​​ នៅព្រឹកថ្ងៃទី២៤ ខែកក្កដា ឆ្នាំ២០២៥នេះ បានបញ្ជាក់ថា មានការផ្ទុះអាវុធវាយប្រហារគ្នារវាងកងទ័ពកម្ពុជា និងកងទ័ពថៃនៅតាមបណ្តោយព្រំដែនកម្ពុជាថៃក្នុងភូមិសាស្ត្រខេត្តឧត្តរមានជ័យ។

លោកស្រី អះអាងថា កងទ័ពថៃបានបើកការបាញ់ប្រហារមកលើកងទ័ពកម្ពុជាមុន។ កងទ័ពកម្ពុជាបានប្រើប្រាស់សិទ្ធិការពារខ្លួនក្នុងអធិបតេយ្យ និងបូរណភាពទឹកដីរបស់ខ្លួនប្រឆាំងនឹងការឈ្លានពានរបស់កងទ័ពថៃដែលបានបំពានលើបូរណភាពទឹកដីកម្ពុជា។

មកដល់ពេលនេះមិនទាន់មានព័ត៌មានផ្លូវការអំពីកងទ័ពឬជនស៊ីវិលស្លាប់និងរងរបួសនៅក្នុងការប៉ះទង្គិចគ្នារវាងកម្ពុជា-ថៃនៅឡើយនោះទេ ដោយស្ថានការតើនតឹងនេះកំពុងតាមដានយ៉ាងដិតដល់៕

អត្ថបទ៖ ប៊ុន សុភាព