ព័ត៌មានអន្ដរជាតិ

ប្រធានាធិបតីអ៊ីរ៉ង់ ប្រាប់ថាបើកចំហក្នុងការចរចាជាមួយអាមេរិក តែចោទអ៊ីស្រាអែលពីការប៉ុនប៉ងធ្វើឃាត

បានផុស

១២ ខែ មុន

នៅ

ថ្ងៃអង្គារ ៨ កក្កដា ២០២៥

ដោយ

Chheang

ប្រធានាធិបតីអ៊ីរ៉ង់ លោក Masoud Pezeshkian បានបង្ហាញឆន្ទៈក្នុងការបើកកិច្ចសន្ទនាឡើងវិញជាមួយសហរដ្ឋអាមេរិក ដោយសង្កត់ធ្ងន់ថា ទំនុកចិត្តលើគ្នាទៅវិញទៅមកត្រូវតែកសាងឡើងវិញជាមុនសិន។ ទន្ទឹមនោះ លោកក៏បានចោទប្រកាន់អ៊ីស្រាអែលពីបទប៉ុនប៉ងធ្វើឃាតរូបលោក អំឡុងពេលការវាយប្រហារថ្មីៗផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងបទសម្ភាសន៍ជាមួយអ្នកអត្ថាធិប្បាយព័ត៌មានល្បីរបស់អាមេរិក Tucker Carlson ដែលបានចេញផ្សាយកាលពីថ្ងៃចន្ទទី៧ខែកក្កដា លោក Pezeshkian បាននិយាយថា «យើងអាចដោះស្រាយភាពខុសគ្នា និងជម្លោះរបស់យើងជាមួយសហរដ្ឋអាមេរិកបានយ៉ាងងាយស្រួលតាមរយៈការសន្ទនា និងការពិភាក្សា»។ លោកបានជំរុញឲ្យប្រធានាធិបតីអាមេរិក ដូណាល់ ត្រាំ មិនត្រូវលូកដៃចូលក្នុងសង្រ្គាមបង្កឡើងដោយសកម្មភាពរបស់អ៊ីស្រាអែលទេ ដោយបន្ថែមថា លោក ត្រាំ មានអំណាចក្នុងការដឹកនាំតំបន់ឆ្ពោះទៅរកសន្តិភាព ឬ«ធ្លាក់ចូលទៅក្នុងរណ្តៅ»។

បន្ថែមពីនេះ លោក Pezeshkian បានចោទប្រកាន់អ៊ីស្រាអែលពីការប៉ុនប៉ងសម្លាប់រូបលោក ក្នុងអំឡុងពេលនៃការវាយប្រហាររបស់ពួកគេកាលពីខែមិថុនា ដោយប្រាប់ថា «ពួកគេបានប៉ុនប៉ង… ប៉ុន្តែពួកគេបានបរាជ័យ» ដោយសំដៅទៅលើការវាយប្រហារលើកិច្ចប្រជុំមួយដែលលោកបានចូលរួម។

សូមជម្រាបថា ការផ្ដល់សម្ភាសន៍របស់លោក Pezeshkian ធ្វើឡើងបន្ទាប់ពីសង្គ្រាមរយៈពេល១២ថ្ងៃ ដែលអាមេរិក និងអ៊ីស្រាអែលបានវាយប្រហារកំណត់គោលដៅលើទីតាំងនុយក្លេអ៊ែរ និងយោធារបស់អ៊ីរ៉ង់ មុនពេលឈានដល់បទឈប់បាញ់កាលពីថ្ងៃទី២៤ខែមិថុនា។ អ៊ីរ៉ង់បានរាយការណ៍ថា មានមនុស្សស្លាប់ជាង ១ ០៦០នាក់ដោយសារសង្គ្រាមមួយនេះ៕

ដោយ៖ ឈាង