ផ្លែទៀបស្វិតខ្មែរ នៅតែរក្សាទីផ្សារបានល្អ រយៈពេល ២ ឆ្នាំ​ជាប់គ្នា

កសិករជាអ្នកដាំដុះដំណាំទៀបស្វិតរបស់ខ្មែរតាមដី​លំនៅដ្ឋាន នៅតែសង្ឃឹមលើទីផ្សាររក្សាបាន​តម្លៃនៅល្អ។ ការរក្សាបាន​ទីផ្សារនៅថេរសម្រាប់ផ្លែទៀបស្វិតខ្មែរនេះ ដោយសាតែអតិថិជនក៏ដូចជាអ្នកភូមិស្រុក បាននិយមបរិភោគទៀបស្វិតខ្មែរ​ច្រើនជាងទៀបពូជផ្សេងៗដូចជា ទៀបអូស្ត្រាលីជាដើម។

អ្នកស្រី វ័ណ្ណា វ័យ ៧២ ឆ្នាំ រស់នៅភូមិប៉ៃឡាំ ឃុំចែងមានជ័យ ស្រុកបាណន់ ខេត្តបាត់ដំបង ផ្តល់​បទ​កិច្ចសម្ភាសដល់​កម្ពុជា​ថ្មីថា អ្នកស្រីបានដាំដុះទៀបស្វិតរបស់ខ្មែរនៅលើដីលំនៅដ្ឋានរយះពេលជិត ៥ ឆ្នាំហើយ ដែលមានប្រមាណជិត ៣០ ដើម និងគ្រោងដាំបន្ថែមទៀត ខណះដំណាំប្រភេទនេះ អ្នកស្រីមានចំណូលចិត្តដាំ​ជាងដំណាំផ្សេងៗ ហើយវាបានផ្តល់ប្រយោជន៍ផ្តល់ចំណូលដល់​គ្រួសារ ខណះទីផ្សារ​មិនមានការប្រឈម និងតម្លៃក៏អាចទទួលយកបានគ្រប់រដូវកាល។

អ្នកស្រីបន្តថា “សម្រាប់ទីផ្សារ រាល់រដូវកាលខ្ញុំលក់បានក្នុង ១ គីឡូក្រាម ១២ ០០០ រៀល ហើយម៉ូយដែលមកដល់ចម្ការ​លក់ក្នុងតម្លៃបានចន្លោះពី ៨ ០០០ ទៅ ១០ ០០០ រៀល តាមប្រភេទផ្លែតូចឬធំ ហើយប្រមូលផលក៏បានជាបន្តបន្ទាប់ បើគិតទ្រួសៗទៅ រដូវនេះបានចំណូលជាង ២ លាននរៀល តែនៅបន្តប្រមូលឲ្យម៉ូយនៅក្នុងខេត្តបន្តទៀត។

កសិករម្នាក់ទៀត គឺអ្នកស្រី សួន សីថាវ រស់នៅភូមិឃុំជាមួយគ្នា បានលើកឡើងថា អ្នក​ស្រីធ្វើដំណាំដំឡូងនិងម្ទេស ដៃនាង តែមួយរដូវៗមិនបានសល់លុយដូចដាំទៀបស្វិតខ្មែរនោះទេ ឃើញថាមានទីផ្សារល្អ ហើយមិនសូវហត់នឿយផង។

អ្នកស្រីបន្តថា “ដោយសាតែទៀបស្វិតខ្មែរនៅតែពេញនិយម ឆ្នាំនេះខ្ញុំប្រមូលផលដំឡូងមី និងម្ទេសហើយ នឹង​ប្តូរមកដាំទៀបពូជរបស់ខ្មែរប្រភេទទៀបស្វិតវិញ ហើយពេលនោះខ្ញុំឈប់ដើរសុីឈ្នួលគេ នៅខេត្តប៉ៃលិនទៀតហើយ ព្រោះឃើញអ្នកជិតខាងដាំរកចំណូលបានយ៉ាងប្រសើរ តាមរយះដំណាំទៀបស្វិតរបស់ខ្មែរយើងនេះ”។

ដោយឡែក អាជីវករ តាមទីផ្សារក្នុងក្រុងបាត់ដំបង​បានត្អូញត្អែរប្រាប់កម្ពុជាថ្មីថា ពួកគាត់បានលើកផ្លែទៀបពូជពីប្រទេស​អូស្ត្រាលីមកលក់លើផ្សារ គឺលក់មិនសូវដាច់បើធៀបនិងផ្លែទៀបស្វិតរបស់ខ្មែរ។

អ្នកស្រី យិន បុប្ផា ជាអាជីវករនៅផ្សារថ្មីបាត់ដំបងបានបញ្ជាក់ថា “ខ្ញុំដាក់លក់ផ្លែទៀបពូជពីប្រទេស អូស្ត្រាលី ដោយលក់​ ១ គីឡូក្រាម ១០ ០០០ រៀល ស្មើ ៣ ផ្លែ ហើយទៀបស្វិតលក់ ១ គីឡូបាន ១២ ០០០ រៀល ស្មើ ៤ ទៅ ៥ ផ្លែ។

អាជីវករ​រូបនេះអះអាង​ថា ទៀបខ្មែរលក់ដាច់រហូត ខុស​ពី​ទៀប​ពូជអូស្រ្តាលី ពេលខ្លះសល់ខូចរលូយខាងសាច់ក្នុងខាតដើមក៏មាន។

អ្នកស្រី​ថា ទៀបពូជអូស្រ្តាលី​មានជាតិទឹកច្រើនមិនសូវផ្អែម ហើយទឹកមិនស្អិតជាប់ដៃដូចទៀបស្វិតខ្មែរ ។យ៉ាងណាមិញ អ្នកស្រី​ថា លើកនេះលក់អស់ អ្នកស្រី​ឈប់លក់ហើយ ងាក​ទៅលើកទៀបស្វិតខ្មែរតាមភូមិវិញ អាចរកចំណូលបានជាងនេះ​”។

មន្ត្រីកសិកម្មខេត្តបាត់ដំបង បានលើកទឹកចិត្តដល់ប្រជាពលរដ្ឋ ក្នុងការដាំដុះពូជទៀបស្វិតរបស់ខ្មែរ នៅលើដីទំនេរតាមភូមិ ព្រោះទៀបស្វិតខ្មែរ នៅតែពេញនិយមការបរិភោគភាគច្រើន បន្ថែមពីលើការ​ដាំ​ដំណាំផ្សេងៗឬការចិញ្ចឹមសត្វ​ដើម្បី​ដោះស្រាយ​ជីវភាព​កុំ​ឲ្យ​ប្រឈមការខ្វះខាត៕

អត្ថបទ÷សៅ សារិទ្ធ