វិស័យ​កសិកម្ម​ខេត្តបាត់ដំបង កាន់តែពង្រីក​វិសាលភាព ក្រោយប្រព័ន្ធ​ធារាសាស្ត្រដ៏ធំមួយទៀតសាង​សង់​រួចរាល់

ប្រព័ន្ធធារាសាស្ត្រថ្មី​មួយ​ទៀត​ក្នុងខេត្តបាត់ដំបង ដែល​មានសមត្ថភាពស្រោចស្រពដំណាំស្រូវរហូតដល់ ១០ មុឺនហិកតា គ្រោង​​បញ្ចប់​ការ​សាងសង់​ក្នុង​រយៈពេល ៣ ឆ្នាំខាងមុខ​ទៀតនេះ។

ប្រព័ន្ធធារាសាស្ត្រដែលកំពុង​ដំណើរការ​សាងសង់ មានទីតាំង​ស្ថិតនៅក្នុងស្រុកសំឡូតមានឈ្មោះ “អាងស្តុកទឹកស្ទឹងក្រញួង” ដែលមានវិសាលភាពគ្រប​ដណ្តប់​លើស្រុកចំនួន ៥ ក្នុងខេត្តបាត់ដំបង។

លោក ឈឺន សុខុម ប្រធានការិយាល័យធារាសាស្រ្តកសិកម្ម នៃមន្ទីរកសិកម្ម រុក្ខាប្រមាញ់​ និងនេសាទខេត្តបាត់ដំបង​បានឲ្យដឹងថា អាងស្តុកទឹកស្ទឹងក្រញូងនេះ គឺជាគម្រោងគ្រប់គ្រងដោយ ក្រសួងធនធានទឹក និងឧតុនិយម មានប្រវែងជាង ១ គីឡូម៉ែត្រ។ ប្រព័ន្ធ​ធារាសាស្រ្ត​ថ្មីនេះបានចាប់ផ្តើមសាងសង់​ពីខែគុម្ភ: ឆ្នាំ២០២៥ ដោយ​គ្រោង​ប្រើរយះពេលសាងសង់​ចំនួន ៣ ឆ្នាំ។

លោកថា អាងនេះមានសមត្ថភាពស្ដុកទឹកជាង ១ រយលានម៉ែត្រគូប មានវិសាលភាពគ្របដណ្តប់លើស្រុក​ក្រុង​ចំនួន ៥ ក្នុងនោះមានដូចជា ក្នុងស្រុកបាណន់ ស្រុកសង្កែ ស្រុកម៉ោឫស្សី ស្រុកឯកភ្នំ និងក្រុងបាត់ដំបង ដែលអាច​បម្រើ​ការ​ស្រោបស្រប​លើផ្ទៃដីដាំដុះដំណាំ​ស្រូវវស្សាបានជាង ១០ ម៉ឺនហិកតា។

បច្ចុប្បន្នក្នុង​ខេត្ត​បាត់ដំបង មាន​ព័ន្ធធារាសាស្ត្រធំៗចំនួន ៤ ដែលមានស្រាប់ ដែល​រួមមាន ១, ប្រព័ន្ធធារាសាស្ត្រស្ទឹង​មោងឫស្សី ឬស្ទឹងដូនទ្រី មានសមត្ថភាពស្រោចស្រពលើផ្ទៃដីជាង ៥ ម៉ឺនហិកតានៅរដូវវស្សា និងជាង ២ ពាន់ហិកតានៅ​រដូវប្រាំង។ ២, ប្រព័ន្ធធារាសាស្ត្រស្ទឹងសង្កែ មានសមត្ថភាពស្រោចស្រពលើផ្ទៃដីជាង ៦ ម៉ឺនហិកតា នៅរដូវវស្សា និងជាង ១ ម៉ឺន ៧ ពាន់ហិកតានៅ រដូវប្រាំង។ ៣, ប្រព័ន្ធធារាសាស្ត្រស្ទឹងមង្គលបូរី អាចស្រោចស្រព លើផ្ទៃដីជាង ៦ ម៉ឺនហិកតានៅរដូវវស្សា និង រដូវប្រាំងបានជាង ២ពាន់៨០០ ហិកតា។ ៤, ប្រព័ន្ធធារាសាស្ត្រកំពីងពួយ មានសមត្ថភាព​ស្រោចស្រព លើផ្ទៃដីសរុប ២ ម៉ឺន ៣ ពាន់ ៦ រយហិកតា នៅរដូវវស្សា និងជាង១ម៉ឺន៨ពាន់ហិកតា នៅរដូវប្រាំង។

របាយការណ៍ពី​មន្ទីរកសិកម្មខេត្តបាត់ដំបង​បានបង្ហាញថា នៅឆ្នាំ ២០២៤ ខេត្តបាត់ដំបងបានដាំដុះដំណាំ​ស្រូវវស្សាបាន​ជាង ៤៥ ម៉ឺនហិកតា។ ដោយឡែក នៅក្នុងរដូវកាលឆ្នាំ២០២៥ នៅមិនទាន់មានទិន្នន័យជាក់លាក់នៅឡើយ ខណះការដាំដុះរបស់​កសិករ នៅកំពុងបន្តនៅឡើយ៕

អត្ថបទ÷សៅ សារិទ្ធ