កីឡា
កីឡាវាយសី កំពុងសាងសមិទ្ធផលថ្មី សម្រាប់ដំណើរឆ្ពោះទៅស៊ីហ្គេម ឆ្នាំ២០២៣
ឯកឧត្តម លី កុសល ប្រធានសហព័ន្ធកីឡាវាយសីកម្ពុជា ចាត់ទុកការប្រកួតកីឡាវាយសីជ្រើសរើសជើងឯកថ្នាក់ជាតិ ឆ្នាំ២០២២ ដែលទើបបិទកាលពីម្សិលមិញ គឺបានបញ្ចប់ដោយជោគជ័យ និងបន្សល់នូវសមិទ្ធផលថ្មីមួយចំនួន ដែលជាសញ្ញាណវិជ្ជមានសម្រាប់សហព័ន្ធ ក្នុងដំណើរឆ្ពោះទៅធ្វើម្ចាស់ផ្ទះការប្រកួតកីឡាស៊ីហ្គេមលើកទី៣២ ឆ្នាំ២០២២។
ឯកឧត្តម លី កុសល បានគូសបញ្ជាក់នូវសមិទ្ធផលសំខាន់ៗ២ដែលទទួលបានពីការរៀបចំព្រឹត្តិការណ៍ថ្នាក់ជាតិនេះគឺទី១-ការបើកវគ្គបណ្ដុះបណ្ដាលអាជ្ញាកណ្ដាល ចៅក្រម កម្រិតអន្ដរជាតិរយៈពេល៥ថ្ងៃ ចាប់ពីថ្ងៃទី២៧-៣១ ខែតុលាដែលបង្រៀនដោយលោកស្រី Yau Lin Na គ្រូឧទ្ទេសមកពីសហព័ន្ធកីឡាវាយសីអាស៊ី ធ្វើឲ្យសិក្ខាកាមបានសិក្សាទាំងទ្រឹស្ដី និងការអនុវត្តផ្ទាល់តែម្ដង។
បើតាមការបញ្ជាក់របស់ឯកឧត្តម «ការអនុវត្តផ្ទាល់នេះ គឺប្រើប្រាស់ភាសាអង់គ្លេសសុទ្ធសាធ ដូចគ្នាទៅនឹងការប្រកួតស៊ីហ្គេមអញ្ចឹងដែរ។ ខ្ញុំជឿជាក់ថា អាជ្ញាកណ្ដាល ចៅក្រម ដែលទើបបញ្ចប់វគ្គនេះ បានរៀនសូត្របទពិសោធន៍ថ្មីៗ ពីអ្នកគ្រូ ដើម្បីរួមគ្នាជាមួយសហព័ន្ធ ក្នុងដំណើរឆ្ពោះទៅស៊ីហ្គេម ២០២៣។ វគ្គបណ្តុះបណ្តាលមានរយៈពេល៥ថ្ងៃក៏ពិតមែនតែមុនពេលមកដល់របស់អ្នកគ្រូ គណៈកម្មការរៀបចំវគ្គ បានធ្វើការបណ្តុះបណ្តាលម្តងហើយ តាមប្រព័ន្ធ Online ដើម្បីឲ្យសិក្ខាកាមមានឱកាសទ្វេដងក្នុងការទទួលយកចំណេះដឹងពីការរៀនសូត្រនេះ»។ ចំណែកសមិទ្ធផលទី២ គឺការរៀបចំការប្រកួតដោយយកលំនាំតាមការប្រកួតកីឡាជាតិ ដើម្បីជាពិសោធន៍ត្រៀមឆ្នាំ២០២៣ ផងដែរ។
ឯកឧត្តម លី កុសល បន្ថែមថា «ការប្រកួតរបស់យើង គឺអនុវត្តតាមទម្រង់ទាំងស្រុងរបស់ការប្រកួតកីឡាជាតិ ដែលបានអនុវត្តតាមបទដ្ឋាននៃការប្រកួតស៊ីហ្គេម ដើម្បីឲ្យកីឡាករ-កីឡាការិនី និងមន្ត្រីរបស់យើងមានឱកាសបានត្រៀមលក្ខណៈសម្បតិ្តជាបណ្តើរៗ ក្នុងការរៀនសូត្រ ដកបទពិសោធន៍ជាក់ស្តែង ឈានធ្វើជាម្ចាស់ផ្ទះស៊ីហ្គេម ឆ្នាំ២០២៣»។
ឯកឧត្តម ជាម សុភា អគ្គលេខាធិការសហព័ន្ធ បានបញ្ជាក់ថា ជើងឯកថ្នាក់ជាតិកីឡាវាយសីឆ្នាំនេះ ធ្វើឡើងរយៈពេល៣ថ្ងៃ ពីថ្ងៃទី២៩-៣១ ខែតុលា ដោយមានកីឡាករ-កីឡាការិនីចូលរួមសរុប ១៣៨នាក់ មកពី ១៣សមាគម/ក្លិបទូទាំងប្រទេស។ ជាលទ្ធផលបច្ចេកទេស ក្លិបក្រសួងមហាផ្ទៃ ដណ្ដើមបានមេដាយច្រើនជាងគេ គឺមេដាយមាស ២គ្រឿងខណៈក្លិបកីឡាវាយសីក្រសួងសេដ្ឋកិច្ច និងហិរញ្ញវត្ថុ ឈរលេខ២ ឈ្នះមេដាយមាស ១ ប្រាក់ ២ និងសំរឹទ្ធ ១ និងខេត្តកណ្ដាល ឈរលេខ៣ ឈ្នះមេដាយមាស ១ និងប្រាក់ ២៕
អត្ថបទ៖ មន្នីរ័ត្ន
-
កីឡា៦ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៥ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
សន្តិសុខសង្គម៧ ថ្ងៃ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ជីវិតកម្សាន្ដ១ សប្តាហ៍ ago
មនុស្សស្និទ្ធស្នាលទម្លាយពីស្ថានភាព Ngoc Trinh ក្រោយចេញពីពន្ធនាគារជាង៣ខែ
-
ព័ត៌មានជាតិ៥ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ព័ត៌មានអន្ដរជាតិ៥ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ជីវិតកម្សាន្ដ៦ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ
-
ព័ត៌មានអន្ដរជាតិ៧ ថ្ងៃ ago
នាវាចម្បាំងថៃ ច្រឡំដៃបាញ់កាំភ្លើងធំ ចំនាវាគ្នាឯង