ថៃ រៀបចំ«បន្ទប់​សង្គ្រាម» ត្រៀមឆ្លើយតប​គ្រោះ​មហន្តរាយ​​ ព្រោះ​​ព្យុះវីពផា​ នាថ្ងៃ​២២-២៣កក្កដា

ថៃ បាន​រៀបចំ«បន្ទប់​សង្គ្រាម» ដំណើរការ​២៤ម៉ោង​លើ​២៤​ម៉ោង ខណៈ​ប្រទេស​​មួយ​នេះ​ត្រៀម​ទទួល​រង​ឥទ្ធិពល​ដ៏​ខ្លាំងក្លា​ពី​ព្យុះ​វីពផា ដែល​រំពឹង​នឹង​កើត​ឡើង​នា​ថ្ងៃទី​២២និង​២៣​ខែកក្កដា។

យោង​តាម​ការ​ចុះផ្សាយ​របស់ Bangkok Post ព្យុះ​វីពផា អាច​បណ្ដាល​ឲ្យ​មាន​ភ្លៀង​ធ្លាក់​ខ្លាំង​​នៅ​ភាគ​ខាង​ជើង និង​ភាគ​ឦសាននៃប្រទេស​ថៃ ខណៈ​កម្ពស់​​ទឹក​ទន្លេ​មេគង្គ​វិញ​នឹង​ហក់​ឡើង​ខ្លាំង។

អគ្គនាយកនៃនាយកដ្ឋានបង្ការ និងកាត់បន្ថយគ្រោះមហន្តរាយ លោក Passakorn Boonyalak បាននិយាយថា អាជ្ញាធរបានបង្កើតកន្លែង​សង្គ្រោះ​ថ្នាក់ជាតិ ដែល​ដាក់​ឈ្មោះ​ថា«បន្ទប់​សង្គ្រាម» ដោយមានការចូលរួមពីភ្នាក់ងារជាច្រើន រួមទាំងនាយកដ្ឋានឧតុនិយម នាយកដ្ឋានធនធានទឹក ក៏ដូចជា​អង្គការ​ស្រាវជ្រាវ​លំហ Gistda ដើម្បីវាយតម្លៃ និងដោះស្រាយ​ផលប៉ះពាល់​នៃ​ព្យុះទីហ្វុង​វីពផា។

នាយកដ្ឋាន​ឧតុនិយម​ថៃ បាន​ឲ្យ​ដឹង​ថា ខេត្ត Chanthaburi, Trat, Ranong និង Phanngga ព្រម​ទាំង​តំបន់ភាគកណ្តាល និងភាគឦសានមួយចំនួននៃប្រទេសថៃ នឹង​​មាន​ភ្លៀង​ធ្លាក់​ខ្លាំង។ ពលរដ្ឋ​ដែល​រស់នៅ​ក្បែរផ្លូវ​ទឹក និង​តំបន់​ទំនាប​នានា ត្រូវ​ព្រមាន​ឲ្យ​បង្កើន​ការ​ប្រុង​ប្រយ័ត្ន​ចំពោះ​ទឹក​ជំនន់​ភ្លាមៗ។

សូម​រឭក​ថា ប្រទេស​ថៃ ធ្លាប់​រង​គ្រោះ​ព្រោះ​ទឹក​ជំនន់​ជា​ច្រើន​លើក​ច្រើន​ដង​មក​ហើយ និងបាន​ខាតបង់​ថវិកា​អស់​រាប់​សិប​ពាន់​លាន​ដុល្លារ​ថែម​ទៀត​ផង។ គ្រោះ​មហន្តរាយ​ដ៏​អាក្រក់​បំផុត​មួយ គឺ​​នៅ​ចន្លោះ​ពី​ខែ​កក្កដា​ឆ្នាំ​២០១១ ដល់​ខែ​មករា​ឆ្នាំ​២០១២ ដែល​ទឹកជំនន់បានប៉ះពាល់ដល់ខេត្តចំនួន៦៥ ធ្វើ​ឲ្យ​ប្រជាជនចំនួន ១៣,៦លាននាក់ត្រូវ​ផ្លាស់ទីលំនៅ និងជន់លិចដីស្រែចំការចំនួន ១,៣លានហិកតា។ ធនាគារពិភពលោកប៉ាន់ប្រមាណថា ការខាតបង់​សរុបមានចំនួនពី ៤៥ ទៅ ៤៦,៥​ពាន់​លាន​ដុល្លារ ប្រហែល ១២,៦% នៃផលិតផលក្នុងស្រុកសរុបរបស់ប្រទេសថៃ នៅពេលនោះ៕

ដោយ៖ ឈាង