យោធាមីយ៉ាន់ម៉ា សុំឲ្យបរទេសជួយ ស្របពេលកូវីដកាន់តែអាក្រក់

រដ្ឋាភិបាលយោធាមីយ៉ាន់ម៉ា កំពុងស្វែងរកជំនួយពីសហគមន៍អន្តរជាតិ ដើម្បីប្រយុទ្ធប្រឆាំងនឹងជំងឺរាតត្បាតកូវីដ-១៩ ខណៈប្រទេសនេះ កំពុងតស៊ូជាមួយរលកនៃការឆ្លងថ្មី។

ប្រទេសនេះ មានភាពច្របូកច្របល់ចាប់តាំងពីយោធាឡើងកាន់អំណាចកាលពីខែកុម្ភៈមក ដោយមន្ទីរពេទ្យជាច្រើនមិនមានបំពាក់សម្ភារៈគ្រប់គ្រាន់ ដើម្បីទប់ទល់នឹងការកើនឡើងនៃអ្នកជំងឺទេ បន្ទាប់ពីបុគ្គលិកពេទ្យជាច្រើន បានចេញតវ៉ាប្រឆាំងនឹងរដ្ឋប្រហារ។

បញ្ជាឲ្យស្នាក់នៅក្នុងផ្ទះ ដែលប៉ះពាល់ដល់មនុស្សរាប់លាននាក់ មិនអាចបញ្ឈប់ការកើនឡើងនៃករណីឆ្លងបានទេ ហើយក្រុមបូជាសពកំពុងបំពេញការងារតាមសមត្ថភាព ខណៈអ្នកស្ម័គ្រចិត្ត កំពុងធ្វើការដើម្បីយក សាកសពមនុស្សដែលបានស្លាប់ ចេញពីផ្ទះរបស់ពួកគេ។

មេដឹកនាំយោធាលោក Min Aung Hlaing បានប្រាប់កិច្ចប្រជុំស្តីពីការសម្របសម្រួល ដើម្បីបង្កើនកិច្ចសហប្រតិបត្តិការ ជាមួយសហគមន៍អន្តរជាតិថា ប្រទេសមីយ៉ាន់ម៉ា ប្រហែលជាស្វែងរកថវិកា ពីមូលនិធិឆ្លើយតបកូវីដ-១៩ ដែលបង្កើតឡើងដោយអាស៊ាន។

ស្របពេលជាមួយគ្នានោះ កាសែត Global New Light of Myanmar បានរាយការណ៍ថា កិច្ចខិតខំប្រឹងប្រែង កំពុងធ្វើឡើងជាមួយអាស៊ាននិងបណ្តាប្រទេសជាមិត្តផ្សេងទៀត។

ការឆ្លងកូវីដថ្មីក្រោម៥,០០០ករណី ត្រូវបានរាយការណ៍កាលពីថ្ងៃពុធ ប៉ុន្តែក្រុមអ្នកវិភាគនិយាយថា តួលេខពិតប្រាកដ ទំនងជាខ្ពស់ជាងនេះ ឆ្ងាយណាស់

គិតត្រឹមពេលនេះ ប្រជាជនប្រហែល ១.៧៥ លាននាក់ បានទទួលការចាក់វ៉ាក់សាំង ក្នុងចំណោមប្រជាជន ៥៤ លាននាក់៕

ប្រែសម្រួល៖ Vann Vann

ប្រភព៖ CNA

ចុចអាន៖ មីយ៉ាន់ម៉ា វេទនាខ្លាំង ព្រោះជួបទុក្ខផ្ទួនៗ