បាក់អណ្តូងរ៉ែ នៅភាគខាងជើងប្រទេសមីយ៉ាន់ម៉ាសង្កត់មនុស្ស ២០នាក់

យោងតាមការចេញផ្សាយរបស់ទីភ្នាក់ងារព័ត៌មាន​Xinhua នៅថ្ងៃទី២២ខែកក្កដា ហេតុការណ៍បាក់រលំអណ្តូងរ៉ែថ្មគុជនៅតំបន់ទីប្រជុំជន Hpakant ភាគខាងជើងប្រទេសមីយ៉ាន់ម៉ា បានសង្កត់មនុស្សប្រហែល២០ នាក់ ខណៈអ្នកស្លាប់អាចមានដល់១០នាក់ឯណោះ។

ហេតុការណ៍បាក់ដណ្ដូងរ៉ែថ្មគុជនេះ បានកើតឡើងនៅព្រឹកថ្ងៃទី២១ ខែកក្កដានៅពេលដែលផ្នែកខ្លះនៃអណ្តូងរ៉ែថ្មគុជ ក្នុងរដ្ឋ Kachin បានបាក់ បណ្តាលឱ្យមានការបាក់ដីជាបន្តបន្ទាប់។ មកទល់ពេលនេះ សាកសពពីរត្រូវបានរកឃើញ ហើយក្រុមអ្នកជួយសង្គ្រោះកំពុងបន្តស្វែងរកអ្នកផ្សេង។ មន្ត្រី​បារម្ភ​ថា​មនុស្ស​ជាង​១០​នាក់​អាច​ស្លាប់​ព្រោះ​ផ្ទះ​ក្បែរ​នោះ​ខ្លះ​ក៏​ត្រូវ​បំផ្លាញ​ដែរ​។

តំបន់ទីប្រជុំជន Hpakant គន្លងមកតែងតែមានឧបទ្ទវហេតុទាក់ទងនឹងការជីកយករ៉ែដោយសារតែសុវត្ថិភាពមិនល្អ និងភ្លៀងធ្លាក់ខ្លាំងក្នុងរដូវមូសុង ដែលអាចបណ្តាលឱ្យមានបំណាក់ដី។

គួរបញ្ជាក់ថាចាប់តាំងពីរដ្ឋប្រហារនៅក្នុងប្រទេសមីយ៉ាន់ម៉ា មានអណ្ដូងរ៉ែជាច្រើនបានដំណើរភាគច្រើនក្រោមការគ្រប់គ្រងរបស់ក្រុមហ៊ុនចិនខុសច្បាប់ ដោយមានដណ្ដូងរ៉ែមួយចំនួននៅក្បែរព្រំដែនថៃបានបង្កឲ្យមានការបំពុលទឹកទន្លេធ្ងន់ធ្ងរផងដែរ៕

អត្ថបទ៖ ប៊ុន សុភាព