យោធាមីយ៉ាន់ម៉ាសម្លាប់មនុស្ស២០នាក់ ក្នុងការវាយប្រហារតាមដងទន្លេការពារក្បួនដឹកអាវុធ

យោងតាមការចេញផ្សាយរបស់សារព័ត៌មាន​The Irrawaddy មនុស្សយ៉ាងតិច២០នាក់បានស្លាប់កាលពីថ្ងៃទី១៨ ខែកក្កដា នៅពេលដែលយោធាមីយ៉ាន់ម៉ាបានបើកការវាយប្រហារតាមអាកាសទៅលើភូមិនានានៅតាមដងទន្លេ Irrawaddy ក្នុងតំបន់ទីប្រជុំជន Wetlet តំបន់ Sagaing។

ការវាយប្រហារនេះគឺសំដៅការពារក្រុមទូកយោធាដែលធ្វើដំណើរតាមដងទន្លេ ដើម្បីនាំយកទាហាន និងអាវុធបន្ថែមទៀតទៅកាន់ Bhamo ដែលជាទីក្រុងក្នុងរដ្ឋ Kachin ដែលកំពុងរងការវាយប្រហារដោយកងទ័ពឯករាជ្យ Kachin និងសម្ព័ន្ធមិត្តផ្សេងទៀត។

កងនាវាចរ ដែលរួមមាននាវាល្បាត និងនាវាដឹកជញ្ជូនជាច្រើន បានចាកចេញពីទីក្រុង Mandalay ហើយបានបាញ់កាំភ្លើងត្បាល់នៅតាមមាត់ទន្លេជាការការពារ ខណៈដែលយន្តហោះចម្បាំងបើកការវាយប្រហារអាកាស។ ក្នុងនោះយន្តហោះ Y-12 ផលិតនៅប្រទេសចិនបានទម្លាក់គ្រាប់បែកលើភូមិនានាសម្លាប់អ្នកស្រុកមួយចំនួន។

គួរបញ្ជាក់ថាដោយសារផ្លូវនានាក្នុងតំបន់ Sagaing ជារឿយៗត្រូវបានរារាំងដោយកងកម្លាំងប្រឆាំង យោធាកំពុងពឹងផ្អែកកាន់តែខ្លាំងឡើងលើផ្លូវទន្លេដើម្បីដឹកជញ្ជូនកងទ័ព និងការផ្គត់ផ្គង់។ បេសកកម្មស្រដៀងគ្នានេះកាលពីឆ្នាំមុនបានប្រឈមមុខនឹងការវាយឆ្មក់ ដោយនាវាមួយចំនួនត្រូវបានខូចខាត។ ការ​វាយលុក​ចុង​ក្រោយ​នេះ​បាន​ធ្វើ​ឲ្យ​អ្នក​ភូមិ​ផ្លាស់​ទីលំនៅ និង​ការ​ប្រយុទ្ធ​គ្នា​កាន់​តែ​ខ្លាំង​នៅ​ក្បែរ​ច្រក​របៀង​ទន្លេ Irrawaddy៕

អត្ថបទ៖ ប៊ុន សុភាព