នាយករដ្ឋមន្ត្រីម៉ាឡេស៊ី ពិភាក្សាអំពីការធ្លាក់យន្តហោះ MH17 ជាមួយលោក ពូទីន

នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម បានពិភាក្សាអំពីការធ្លាក់យន្តហោះម៉ាឡេស៊ី MH17 ជាមួយប្រធានាធិបតីរុស្ស៊ី លោក វ្ល៉ាឌីមៀ ពូទីន ក្នុងអំឡុងទស្សនកិច្ចនៅទីក្រុងមូស្គូ ប៉ុន្មានថ្ងៃបន្ទាប់ពីរបាយការណ៍របស់អង្គការសហប្រជាជាតិបានរកឃើញថា រុស្ស៊ីទទួលខុសត្រូវចំពោះគ្រោះមហន្តរាយនេះ។ នេះបើយោងតាមការចេញផ្សាយរប​ស់សារព័ត៌មាន ​CNA នៅថ្ងៃទី១៥ខែឧសភានេះ។

លោក អាន់វ៉ា ស្ថិតដែលនៅក្នុងប្រទេសរុស្ស៊ីក្នុងដំណើរទស្សនកិច្ចរយៈពេលបីថ្ងៃក្នុងគោលបំណងពង្រឹងកិច្ចសហប្រតិបត្តិការលើវិស័យជាច្រើនដូចជា ពាណិជ្ជកម្ម និងការវិនិយោគ កសិកម្ម ការអប់រំ លំហអាកាស និងថាមពល។លោកបានប្រាប់ប្រព័ន្ធផ្សព្វផ្សាយម៉ាឡេស៊ីកាលពីថ្ងៃពុធ ថាក្នុងនាមជាតំណាងរបស់ប្រជាជនម៉ាឡេស៊ី ជាពិសេសក្រុមគ្រួសារជនរងគ្រោះ លោកបានឆ្លៀតឱកាសដើម្បីលើកបញ្ហានេះជាមួយប្រធានាធិបតី វ្ល៉ាឌីមៀ ពូទីន ក្នុងអំឡុងពេលពិភាក្សាទ្វេភាគី ។

គួរបញ្ជាក់ថាក្រុមប្រឹក្សាអង្គការអាកាសចរណ៍ស៊ីវិលអន្តរជាតិ (ICAO) បានរកឃើញនៅសប្តាហ៍នេះថា រុស្ស៊ីជាអ្នកទទួលខុសត្រូវចំពោះការទម្លាក់យន្តហោះ MH17 ដែលត្រូវបានបាញ់ទម្លាក់នៅភាគខាងកើតអ៊ុយក្រែនក្នុងឆ្នាំ ២០១៤អំឡុងពេលប្រយុទ្ធគ្នារវាងក្រុមផ្តាច់ខ្លួនដែលគាំទ្ររុស្ស៊ី និងកងកម្លាំងអ៊ុយក្រែន។

ទោះយ៉ាងណាទីក្រុងមូស្គូបានច្រានចោលការរកឃើញរបស់ ICAO លើការធ្លាក់យន្តហោះដែលបានសម្លាប់អ្នកដំណើរ និងនាវិកទាំងអស់ចំនួន ២៩៨នាក់ ដោយហៅការសម្រេចថាមានភាពលំអៀង។

បើតាមការបង្ហោះរបស់លោក អាន់វ៉ា លើ Facebook កាល​ពី​ល្ងាច​ថ្ងៃ​ពុធ​ថា លោក​នឹង​បន្ត​សង្កត់​ធ្ងន់​លើ​ការ​ទទួល​ខុស​ត្រូវ​ជុំវិញ​គ្រោះ​មហន្តរាយ​នេះ ដោយប្រទេសម៉ាឡេស៊ីនៅតែមានការតាំងចិត្តក្នុងការធានានូវការទទួលខុសត្រូវ និងដំណោះស្រាយដ៏ត្រឹមត្រូវមួយសម្រាប់ជនរងគ្រោះ និងក្រុមគ្រួសាររបស់ពួកគេ ដែលបន្តទទួលបន្ទុកនៃសោកនាដកម្មនេះ។

នៅក្នុងជំនួបនោះ លោកពូទីនបានសម្តែងការរំលែកទុក្ខដល់ក្រុមគ្រួសារអ្នកស្លាប់ ដែលរួមមានពលរដ្ឋហូឡង់ ១៩៦នាក់ ម៉ាឡេស៊ី ៤៣នាក់ និងពលរដ្ឋអូស្ត្រាលី ៣៨នាក់ដែរ ។ លោក Putin ក៏បាន​អំពាវ​នាវ​ឱ្យ​មាន​ការ​ស៊ើប​អង្កេត​យ៉ាង​ហ្មត់ចត់ និង​គ្រប់​ជ្រុងជ្រោយ​ដែលមិនពាក់ព័ន្ធនឹង​នយោបាយ ហើយថារុស្ស៊ីបានត្រៀមខ្លួនរួចជាស្រេចក្នុងការផ្តល់កិច្ចសហប្រតិបត្តិការរបស់ខ្លួន ដើម្បីធានាថារបាយការណ៍នេះមានភាពជឿជាក់ជាងនេះ ។

គួររម្លឹកថារដ្ឋអាជ្ញាហូឡង់បានចោទប្រកាន់រុស្ស៊ីនៅក្នុងសំណុំរឿងតុលាការឆ្នាំ ២០២០ ពីបទព្យាយាមបំផ្លិចបំផ្លាញការស៊ើបអង្កេតលើការធ្លាក់យន្តហោះនេះ។ ក្រោយមកតុលាការបានកាត់ទោសភ្នាក់ងារចារកម្មរុស្ស៊ីពីរនាក់ និងមេដឹកនាំផ្តាច់ខ្លួនអ៊ុយក្រែនម្នាក់ពីតួនាទីរបស់ពួកគេក្នុងការវាយប្រហារ៕

អត្ថបទ៖ ប៊ុន សុភាព