ព័ត៌មានអន្ដរជាតិ

កូរ៉េខាងត្បូង ប្រាប់ថា ក្រុងព្យុងយ៉ាងត្រៀមបញ្ជូនទ័ពឲ្យរុស្ស៊ីថែមទៀតនៅខែកក្កដា

បានផុស

១ year មុន

នៅ

ថ្ងៃសុក្រ ២៧ មិថុនា ២០២៥

ដោយ

Chheang

ទីភ្នាក់ងារចារកម្មជាតិកូរ៉េខាងត្បូង បានលើកឡើងកាលពីថ្ងៃព្រហស្បតិ៍ទី២៦ខែមិថុនាឆ្នាំ២០២៥ថា កូរ៉េខាងជើងអាចនឹងដាក់ពង្រាយទាហានបន្ថែមទៅកាន់ប្រទេសរុស្ស៊ី ដើម្បីប្រយុទ្ធក្នុងសង្គ្រាមប្រឆាំងនឹងអ៊ុយក្រែននៅខែកក្កដា ឬខែសីហា ដែលទំនងជាគាំទ្រការវាយលុកដ៏ធំមួយរបស់រុស្ស៊ីនៅអ៊ុយក្រែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការដាក់ពង្រាយលើកនេះ ធ្វើឡើងបន្ទាប់ពីការបញ្ជូនទ័ពលើកមុនចាប់ពីចុងឆ្នាំ២០២៤ និងដើមឆ្នាំ២០២៥ នៅពេលដែលទាហានកូរ៉េខាងជើងប្រមាណពី ១០ ០០០ ទៅ ១២ ០០០នាក់ត្រូវបានបញ្ជូនទៅជួយរុស្ស៊ី ជាពិសេសនៅក្នុងតំបន់ Kursk។ កូរ៉េខាងជើង តាមសេចក្តីរាយការណ៍បានផ្គត់ផ្គង់សម្ភារៈសង្គ្រាមសំខាន់ៗ ដូចជា កាំភ្លើងធំ និងមីស៊ីល ដល់រុស្ស៊ី ដោយជាថ្នូរនឹងការទទួលបានបច្ចេកវិទ្យាណែនាំកម្រិតខ្ពស់សម្រាប់ផ្កាយរណប និងមីស៊ីលពីក្រុងមូស្គូវិញ។

កន្លងមក កូរ៉េខាងជើងមិនបានបញ្ជាក់ជាផ្លូវការទេ ទាល់តែរហូតដល់ចុងខែមេសាទើបប្រកាសថា ខ្លួនពិតជាបញ្ជូនទាហាន និងសព្វាវុធទៅកាន់ប្រទេសរុស្ស៊ី ខណៈដែលទំនាក់ទំនងយោធារវាងប្រជាជាតិទាំងពីរបានកើនឡើងយ៉ាងខ្លាំងក្រោមសន្ធិសញ្ញាភាពជាដៃគូយុទ្ធសាស្ត្រដ៏ទូលំទូលាយ ដែលបានចុះហត្ថលេខាដោយលោក គីម ជុងអ៊ុន និងប្រធានាធិបតីរុស្ស៊ី វ៉្លាឌីមៀរ ពូទីន កាលពីឆ្នាំមុន។

លោក គីម ជុងអ៊ុន បាននិយាយថា ការចូលរួមរបស់ប្រទេសលោកក្នុងសង្គ្រាមរុស្ស៊ី-អ៊ុយក្រែន គឺជារឿងយុត្តិធម៌ ដោយបានហៅវាថាជាការអនុវត្តសិទ្ធិអធិបតេយ្យភាពក្នុងការការពារ«ប្រជាជាតិបងប្អូន»។

លោក គីម បានរៀបរាប់ថា «ការចូលរួមរបស់យើងនៅក្នុងជម្លោះគឺត្រឹមត្រូវ ហើយវាស្ថិតនៅក្នុងសិទ្ធិអធិបតេយ្យភាពនៃសាធារណរដ្ឋរបស់យើង។ ខ្ញុំចាត់ទុកទាហានក្លាហានទាំងអស់ដែលបានចូលរួមក្នុងប្រតិបត្តិការ Kursk ថាជាវីរបុរស និងជាអ្នកតំណាងដ៏ខ្ពង់ខ្ពស់បំផុតនៃកិត្តិយសរបស់ប្រទេស»៕

ដោយ៖ ឈាង