រដ្ឋមន្ត្រីការបរទេស​អ៊ីរ៉ង់ ​ទៅជួប ​ពូទីន ដើម្បីសុំជំនួយ​យោធា

កាលពីថ្ងៃចន្ទទី២៣ខែមិថុនាឆ្នាំ២០២៥ រដ្ឋមន្ត្រីការបរទេសអ៊ីរ៉ង់ Abbas Araghchi បានជួបជាមួយប្រធានាធិបតីរុស្ស៊ី វ្ល៉ាឌីមៀរ ពូទីន នៅឯប្រទេសរុស្ស៊ី ដើម្បីពិភាក្សាបញ្ហានៃការវាយប្រហាររបស់សហរដ្ឋអាមេរិកលើទីតាំងនុយក្លេអ៊ែររបស់ទីក្រុងតេហេរ៉ង់ និងសុំជំនួយយោធាបន្ថែមទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ Wall Street Journal, ក្នុងជំនួបពិភាក្សានោះ លោក Araghchi បានពាំនាំលិខិតពីមេដឹកនាំកំពូលអ៊ីរ៉ង់ ដែលស្នើឲ្យរុស្ស៊ីជួយជំនួយយោធាបន្ថែម ដូចជាខែលការពារដែនអាកាស និងសុំឲ្យជួយការពារហេដ្ឋារចនាសម្ព័ន្ធនុយក្លេអ៊ែររបស់ខ្លួន ប៉ុន្តែមានសេចក្តីរាយការណ៍ថាលោក ពូទីន បានបដិសេធសំណើ ខណៈអ្នកវិភាគយល់ឃើញថា ការសម្រេចចិត្តរបស់មេដឹកនាំវិមានក្រឹមឡាំង គឺព្រោះតែរុស្ស៊ីមិនចង់លូកដៃចូលក្នុងសង្គ្រាមនៅមជ្ឈិមបូព៌ា ទាំងដែលខ្លួនកំពុងជាប់ដៃប្រយុទ្ធជាមួយអ៊ុយក្រែន និងរងទណ្ឌកម្មដែលដាក់ដោយលោកខាងលិចស្រាប់ហើយ។

ទោះយ៉ាងណា ក្នុងជំនួបនោះ លោកពូទីនបានថ្កោលទោសជាសាធារណៈចំពោះការវាយប្រហាររបស់សហរដ្ឋអាមេរិក ថាជា «អំពើឈ្លានពានមិនសមហេតុផល» និង «គ្មានយុត្តិធម៌ទាល់តែសោះ»។

លោក ពូទីន បាន​បញ្ជាក់​ពី​សាមគ្គីភាព​របស់​រុស្ស៊ី​ជាមួយប្រជាជន​អ៊ីរ៉ង់ និង​បង្ហាញ​ចំណាប់​អារម្មណ៍​ក្នុង​ការ​រិះរក​មធ្យោបាយ​ដើម្បី​កាត់​បន្ថយ​វិបត្តិ ហើយទីក្រុងមូស្គូបានប្តេជ្ញាចិត្ត ដើរតួជាអ្នកសម្រុះសម្រួលផ្នែកការទូត ក្នុងជម្លោះនេះ។

សូមជម្រាបជាថ្មី កាលពីចុងសប្តាហ៍ អាមេរិកបានបើកប្រតិបត្តិការ Midnight Hammer ដោយប្រើយន្តហោះទម្លាក់គ្រាប់បែកបំបាំងកាយ B-2 និងបាញ់មីស៊ីល Tomahawk ចេញពីនាវាមុជទឹក វាយប្រហាររោងចក្រនុយក្លេអ៊ែររបស់អ៊ីរ៉ង់ចំនួន៣កន្លែងដូចជា Isfahan, Natanz and Fordow។

ទង្វើរបស់លោក ត្រាំ បង្កឲ្យមានការរិះគន់យ៉ាងខ្លាំងនៅលើពិភពលោក ឈានដល់ការស្តីបន្ទោសថា អាមេរិក កំពុងធ្វើឲ្យភ្លើងសង្គ្រាមនៅមជ្ឈិមឆាបឆេះកាន់តែកញ្ជ្រោលឡើងៗ៕

អត្ថបទ៖ សុខ សុវណ្ណ

ចុចអាន៖ រដ្ឋមន្ត្រីការបរទេសអ៊ីរ៉ង់ ទៅរុស្ស៊ី ជួបពូទីន ចំពេលស្ថានការណ៍កំពុងក្តៅ