ព័ត៌មានអន្ដរជាតិ

ប្រមុខណាតូ៖ គ្មានជម្រើសផ្សេង ក្រៅពីការបង្កើនចំណាយយោធា ទប់ទល់ការគំរាមកំហែងពីរុស្ស៊ី

បានផុស

១០ ខែ មុន

នៅ

ថ្ងៃពុធ ២៥ មិថុនា ២០២៥

ដោយ

Chheang

អគ្គលេខាធិការអង្គការណាតូ លោក ម៉ាក រូតេ បានអះអាងនៅថ្ងៃពុធទី២៥មិថុនានេះថា គ្មានជម្រើសផ្សេងអ្វីឡើយក្រៅតែពីការបង្កើនចំណាយលើវិស័យការពារជាតិនៃរដ្ឋជាសមាជិក ដើម្បីឆ្លើយតបទៅនឹងការគំរាមកំហែងរបស់រុស្ស៊ីដែលកំពុងកើនឡើង។

លោក រូតេ បានប្រាប់អ្នកយកព័ត៌មានមុនពេលជួបជាមួយមេដឹកនាំពិភពលោកនៅឯកិច្ចប្រជុំកំពូលរបស់អង្គការណាតូនៅទីក្រុងឡាអេថា «មិនត្រឹមតែការគំរាមកំហែងរយៈពេលវែងរបស់រុស្ស៊ីចំពោះយើង ប៉ុន្តែក៏មានការបង្កើនកម្លាំងយោធាដ៏ធំនៅក្នុងប្រទេសចិន និងការពិតដែលថា កូរ៉េខាងជើង ចិន និងអ៊ីរ៉ង់ កំពុងគាំទ្រកិច្ចប្រឹងប្រែងធ្វើសង្គ្រាមនៅអ៊ុយក្រែន វាពិតជាមានសារៈសំខាន់ណាស់ដែលយើងត្រូវចំណាយច្រើនជាងនេះ»។

កន្លងមក លោក រូតេ បានព្រមានថា ស្តង់ដារចំណាយយោធា ២% នៃផលិតផលក្នុងស្រុកសរុប គឺមិនគ្រប់គ្រាន់ ដើម្បីទប់ទល់នឹងការគំរាមកំហែងយោធារបស់ទីក្រុងមូស្គូទេ។ លោកបានសង្កត់ធ្ងន់ថា រុស្ស៊ីដែលមានថវិកាការពារជាតិឥឡូវនេះលើសពី ៧% នៃផលិតផលក្នុងស្រុកសរុបរបស់ខ្លួន កំពុងផលិតគ្រាប់រំសេវក្នុងអត្រាមួយដែលលើសពីទិន្នផលរួមគ្នារបស់ណាតូទៅទៀត ដោយអះអាងថា ទីក្រុងមូស្គូចាយពេលផលិតតែ៣ខែប៉ុណ្ណោះ ដែលសម្ព័ន្ធភាពទាំងមូលផលិតក្នុងពេល១ឆ្នាំពេញ។

លោកបានបន្ថែមថា បើគ្មានវិធានការបន្ទាន់ទេ រុស្ស៊ីអាចត្រៀមខ្លួនជាស្រេចក្នុងការវាយប្រហារប្រឆាំងអង្គការណាតូក្នុងរយៈពេល ៥ឆ្នាំខាងមុខ។

ប្រមុខអង្គការណាតូរូបនេះ បានស្នើរដ្ឋជាសមាជិកឲ្យឈានដល់គោលដៅ ដោយជំរុញគោលដៅចំណាយការពារស្នូលរបស់ណាតូពី ២% ឡើងដល់ ៣,៥% និងចំណាយបន្ថែម ១,៥% លើកម្មវិធីពាក់ព័ន្ធដូចជា សន្តិសុខតាមអ៊ីនធឺណិត និងការសម្របសម្រួលផ្លូវ និងស្ពានសម្រាប់យានយន្តយោធា ជាដើម៕

ដោយ៖ ឈាង

ចុចអាន៖ សមាជិកណាតូយល់ព្រមដំឡើងចំណាយយោធាដល់ ៥% លើកលែងតែអេស្ប៉ាញ