ស្វែងរកដំណោះស្រាយ ផលប៉ះពាល់តំបន់បេតិកភណ្ឌ ពីការប្រែប្រួលអាកាសធាតុ

អាជ្ញាធរជាតិអប្សរា នៅព្រឹកថ្ងៃទី០៦ ខែកក្កដា ឆ្នាំ២០២៣នេះ ស្វែងរកដំណោះស្រាយ ផលប៉ះពាល់តំបន់បេតិកភណ្ឌ ពីការប្រែប្រួលអាកាសធាតុ តាមរយៈកិច្ចប្រជុំស្តីពី ការកំណត់អត្តសញ្ញាណអ្នកពាក់ព័ន្ធ និងសិទ្ធអំពីការបម្រែបម្រួលអាកាសធាតុ និងការបន្សុំានៅតំបន់បេតិកភណ្ឌ នៅមជ្ឈមណ្ឌលបណ្តុះបណ្តាលអង្គរ នៃអាជ្ញាធរជាតិអប្សរា។

កិច្ចប្រជុំនេះ ដោយមានការចូលរួមពី លោក យិត ចាន់ដារដ្ឋ អគ្គនាយករង តំណាង បណ្ឌិត ហង់ ពៅ អគ្គនាយកអាជ្ញាធរជាតិអប្សរា លោកប្រធាន អនុប្រធាននាយកដ្ឋាន តំណាងស្ថាប័នអង្គការដៃគូ តំណាងអង្គភាពនគរបាលបេតិកភណ្ឌ តំណាងមន្ទីរបរិស្ថានខេត្ត អាជ្ញាធរក្នុងតំបន់ ព្រមទាំងមន្ត្រី-បុគ្គលិកអាជ្ញាធរជាតិអប្សរាជាច្រើនរូបទៀត។

កិច្ចប្រជុំនេះផ្តោតសំខាន់ទៅលើ ការចូលរួមចំណែកផ្សព្វផ្សាយ ការចែករំលែកចំណេះដឹង ការពិភាក្សារួមគ្នាអំពី ការប្រែប្រួលអាកាសធាតុ ដែលអាចមានផលប៉ះពាល់ជាមួយនិងបេតិកភណ្ឌ។

លោក យិត ចាន់ដារដ្ឋ អគ្គនាយករងអាជ្ញាធរជាតិអប្សរា បានលើកឡើងថា ការប្រែប្រួលអាកាសធាតុ គឺជាបាតុភូតទូទៅសម្រាប់សាកលលោកទាំងមូល មិនមែនកើតឡើងតែនៅប្រទេសកម្ពុជាមួយនោះឡើយ។ ដូច្នេះ បើសិនជាយើងបានគ្រប់គ្រងបានល្អប្រសើរ ផលប៉ះពាល់គឺមានតិច ជាពិសេសសម្រាប់តំបន់បេតិកភណ្ឌ។

លោក យិត ចាន់ដារដ្ឋ មានប្រសាសន៍បន្តថា អាជ្ញាធរជាតិអប្សរា មិនមែនទើបតែគិតអំពីបញ្ហាការបម្រែបម្រួលអាកាសនោះទេ ជាច្រើនឆ្នាំមកហើយដែល អាជ្ញាធរជាតិអប្សរា បានយកចិត្តទុកដាក់ខ្ពស់ទៅលើវិធានការណ៍មួយច្បាស់លាស់ក្នុងការទប់ទល់ និងបម្រែបម្រួលអាកាសធាតុនេះ។ ព្រោះអាចជះប៉ះពាល់ជាវិជ្ជមានទៅលើរមណីយដ្ឋានអង្គរដែលជាបេតិកភណ្ឌពិភពលោក មានដូចជា សកម្មភាពថែរក្សាទេសភាពវប្បធម៌ មានទាំងប្រាសាទ ទឹក និងព្រៃឈើ រួមបញ្ជូលគ្នា។

សកម្មភាពដាំដើមឈើឡើងវិញនៅតំបន់រមណីយដ្ឋានអង្គរ បានធ្វើឡើងជារៀងរាល់ឆ្នាំរហូតមកដល់បច្ចុប្បន្នសម្រេចបានប្រមាណ ២លានដើម បន្ថែមពីនេះការចែកជូនកូនឈើជូនសាធារណជនទូទៅយកទៅដាំដុះបន្ត។ ការស្តារឡើងវិញនូវប្រព័ន្ធធារាសាស្ត្រពីបុរាណ ជាការងារមួយដ៏ធំរបស់ អាជ្ញាធរជាតិអប្សរា ដោយបានស្តារប្រឡាយបុរាណ ត្រពាំងបុរាណ ការស្តារ និងបញ្ជូលទឹកក្នុងកសិន្ធុធំៗនៅក្នុងតំបន់អង្គរ។ ការបន្តសកម្មភាពជួសជុល និងបញ្ជូលទឹកនៅតាមបារាយណ៍បុរាណជាច្រើនទៀតនៅជុំវិញរមណីយដ្ឋានអង្គរ និងបន្តសហការជាមួយស្ថាប័នដៃគូនានា តាមដានអំពីគុណភាពខ្យល់ នៅតំបន់រមណីយដ្ឋានអង្គរជាដើម៕

អត្ថបទ៖ នាយកដ្ឋាន ស្រាវជ្រាវ បណ្តុះបណ្តាល និងផ្សព្វផ្សាយ, រូបភាព៖ លោក ហ៊ុំ រិទ្ធី